YouVersion Logo
Search Icon

Galatia Whutꞌenne 1

1
Yakꞌusda ba ꞌilhunaoodulhne, Galatia yun kꞌut dilhtsꞌine Paul hadih ꞌubulhni
1Si Paul whelꞌaꞌ-un usdli. ꞌAw dunene, ꞌenne bugha iloh ꞌusja, kꞌus ꞌilhoghun dune za iloh gha ꞌusja. ꞌEt hoontsꞌi Sizi Gri ꞌinkꞌez Yakꞌusda neBá, ꞌen ꞌuntꞌoh Sizi yaidlane toh dunaidilhti, ꞌen gha whelꞌaꞌ-un ꞌustꞌoh. 2ꞌInkꞌez neulhutsinke mbene la szih dilhtsꞌine, ꞌenne tsꞌiyawh nohni yun kꞌut Galatia tsꞌe Yakꞌusda ba ꞌilhunaoodulhne ꞌahli, nohni tsꞌiyawh hadih nohtsꞌutni.
3Yakꞌusda neBá ꞌinkꞌez Sizi Gri neMoodihti, ꞌen ye unzoo-i ꞌinkꞌez dzi dinghel-i, nohgha óoninꞌai, bulh óohtꞌeꞌ. 4ꞌEn ꞌuja nelubeshi gha huwaꞌ dudulti. ꞌEt whe ndi yun kꞌut ntsiꞌ-i yuchꞌa naneoozdla. Yakꞌusda neBá, ꞌet whuz unꞌa hukwaꞌ ninzun. 5ꞌIlhiz wheni ooba tsꞌodílhtiꞌ, ꞌet ndo honeh.
ꞌAw ꞌuyoo khuni unzoo-i hooloh
6Tube sba hooncha whe ꞌahtꞌen. Gri ye unzoo-i, ꞌi be dutihjih ha nohkaꞌ daniꞌ, ꞌet hoontsꞌi ꞌen ꞌahoh oochꞌaz násulhya ꞌinkꞌez ꞌuyoo khuni unzoo-i nahzun, ꞌi tsꞌu násulhya. 7ꞌEt hoontsꞌi ꞌaw ꞌuyoo khuni unzoo-i hooloh. Whulohne dune nohba lhtanahuhólelh hukwaꞌ hutꞌen. Gri ooghuni unzoo-i ꞌutsꞌun unꞌa nohba naꞌhuyooleh hukwaꞌ hutꞌen. 8ꞌEt hoontsꞌi wheni kꞌus yakꞌuz whulizas hoontsꞌi, ꞌuyoo khuni unzoo-i ꞌutsꞌun unꞌa ꞌuntꞌoh-i, ꞌi be nohbulh yatsꞌulhduk de, ꞌet de Yakꞌusda hoontsiꞌ tsꞌe yulhni whutooltsꞌit. 9Ntsꞌenꞌa nohtsꞌudániꞌ, ꞌet doo cha za nohtsꞌutni, ndi khuni unzoo-i ꞌudaꞌ ulhchoot, ꞌinkꞌez mbe ꞌutsꞌun unꞌa nohulhni de, mbe hoontsꞌi ꞌutni-un, Yakꞌusda hoontsiꞌ tsꞌe yulhni whutooltsꞌit.
10Daja nuhzun? Yakꞌusda tilah kꞌus dune tilah ba whudóstiꞌ? Soo cho whunulhꞌen, dune ba ꞌuszoo naꞌduduzꞌi de, ꞌet de Gri be ꞌulhna-un tisdleh, ꞌaw oosdleꞌ aitꞌoh.
Yakꞌusda ꞌutahásalhti ꞌen ba whelꞌaꞌ-un tisdleh
11ꞌEt sulhutsinke njan nohdúsniꞌ tꞌeoonóhzin ha ndi khuni unzoo-i be nohbulh yasduk, ꞌaw dune ghuni be lheꞌduzusnih. 12ꞌEt ꞌaw ndi dune tsꞌun uschoot iloh, ꞌinkꞌez ꞌaw dune whusodalhꞌeꞌ cha iloh, Sizi Gri ꞌen gha whusunilhtan.
13ꞌEt whutsꞌo daꞌ si lizwifne bube ꞌutꞌen kꞌoh huwasna inleꞌ, ꞌet tsꞌiyawh whulh ꞌudahtsꞌo. Yakꞌusda ba ꞌilhunaoodulhne, ꞌenne tube dzoh nubusdeh ꞌinkꞌez musai ubooselh hukwa ꞌustꞌen inleꞌ. 14ꞌInkꞌez stsodaꞌne dahántꞌeꞌ la ꞌet ꞌonus hostun hukwa ꞌistꞌen. ꞌEt whe lizwifne bube ꞌutꞌen kꞌoh huwun, ndunne sulh didowhne, mbene la sundultꞌohne, ꞌet hoontsꞌi tsꞌiyawh buba nus unzoo-un susdliꞌ inleꞌ. 15ꞌEt ꞌawhuz chadusda whe, ꞌet Yakꞌusda ba hoonzoo whe ꞌutahasálhti ꞌinkꞌez ye unzoo-i be dutisjih ha skaꞌ daniꞌ, 16ꞌinkꞌez duYeꞌ yusunilhtan. ꞌEt ꞌen ghun ꞌudun yun kꞌut whutꞌenne, ꞌenne ndi khuni unzoo-i be bubulh yátisduk ha. ꞌEt sulh dizulhne ꞌaw huwun bubulh yalhusdih 17ndo Jerusalem tsꞌe hoontsꞌi lhtúsyal whe ndunne, mbene la stso whelꞌaꞌ unline, ꞌenne bubulh yalhusdih. ꞌEt hoontsꞌi yun kꞌut Arabia tsꞌe whesya. ꞌEt hukwꞌelhꞌaz doo cha za keyoh Damascus tsꞌe naoozúsja.
Datꞌen keyoh whuti Jerusalem tsꞌe
18ꞌEt tat yus kꞌut hukwꞌelhꞌaz, ꞌet ndo Jerusalem tsꞌe whesya. Peter ꞌen tisꞌelh ha ꞌinkꞌez whunizyat ꞌon ꞌat kwulat dzin oozih usda. 19ꞌEt ꞌonghohne whelꞌaꞌne, ꞌenne ꞌaw lhubusꞌel. NeMoodihti bulhutsin James, ꞌen za ꞌusꞌen. 20ꞌInkꞌez ndi nohtsꞌo kꞌesges-i, Yakꞌusda nalh ꞌunohdúsni, ꞌaw lhozustsꞌit. 21ꞌEt hukwꞌelhꞌaz yun kꞌut Syria ꞌinkꞌez Cilicia, ꞌoh ho nususya. 22ꞌEt Judea yun kꞌut tsꞌe, mbene la Gri ba ꞌilhunaoodulhne, ꞌenne ꞌawhuz sulh lhuhisꞌen. 23ꞌAntsꞌi sulh ꞌuhudantsꞌo. Ndiz unꞌa hodantsꞌo, “Whutsꞌo daꞌ dzoh nuneulhdzut inleꞌ-un, ꞌen ꞌawet be ꞌalha ꞌuhoontꞌoh-i ghun, tsꞌiyanne khuni unzoo-i be bubulh yalhduk suliꞌ, ꞌudaꞌ musai yoolhtselh hukwaꞌ yalhꞌen hoontsꞌi.” 24ꞌInkꞌez si sgha Yakꞌusda hudálhtiꞌ.

Currently Selected:

Galatia Whutꞌenne 1: crx

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy