2 Timothy 2
2
Ndi Sizi Gri ye unzoo-i, ꞌi be soo ilhtus ónleꞌ
1ꞌEt huwa syeꞌ nyun Sizi Gri ye unzoo-i, ꞌi be soo ilhtus ónleꞌ. 2ꞌInkꞌez lhane nalh daja nyudásniꞌ-un, ndi khuni Sizi Gri tsꞌu ditnine tlꞌa dínle, ꞌon ꞌun ꞌuyoonne huye hódoolhꞌeh ha. 3ꞌEt huwa Sizi Gri oosalda unzoo-un kꞌunꞌa, howu whúlnaꞌ-un hoontsꞌi whulh ónyin. 4Dune salda unli-un, ꞌen dumoodih ba za ꞌutꞌen. ꞌAw ꞌudun ꞌutꞌen-i gha lhasnoh. 5ꞌInkꞌez cha, mbe la noye toh whuchꞌaꞌ ꞌulhdeh-un, tsꞌihꞌun unꞌa whuchꞌaꞌ nilhde de, ꞌet de za hiba kꞌelha whulhtsih. 6Mbe la tube ꞌutꞌen-un haꞌ nulhyeh-un, ꞌen haínalhyai-i, ꞌen cho yuloh yolhchoot hubaꞌ hoontꞌoh. 7Ndet la nyudúsni-un howu nuní ninzut. ꞌInkꞌez neMoodihti, ꞌen nla ꞌutꞌen whe tsꞌiyantsuk tꞌeoononzeh ngha hoꞌalh.
8Whunailnih, Sizi Gri yaidlane butoh dunadija. David ootsꞌu haínzut-un cha ꞌuntꞌoh. ꞌEt ndi sghuni unzoo-i ꞌuntꞌoh whe nyudásniꞌ. 9ꞌEt huwa dune unsiꞌ-un kꞌunꞌa ꞌadusꞌai whe dzoh nuszut. ꞌEt hoontsꞌi Yakꞌusda ooghuni ꞌi ꞌaw lhilghel whe ꞌuntꞌoh. 10ꞌEt huwa ꞌutahalyane, ꞌenne buba whulh susyin. ꞌEt de la ꞌutꞌahályane, ꞌenne cha Gri Sizi ꞌen ye néulhyis-i, ꞌi huyólhchoot ꞌinkꞌez ꞌilhiz huhótꞌeꞌ.
11Ndi khuni ꞌi soo cho ootꞌa niuznootan ꞌet ndutni,
“ꞌEn bulh datsꞌuzsai de,
ꞌet de ꞌilhiz wheni bulh ꞌúztitꞌelh cha ꞌuztitꞌelh.
12Ntsꞌoh dawhutꞌen hoontsꞌi whulh tsꞌúzyin de,
ꞌet de ꞌen bulh lerwe ꞌuztileh.
Oochꞌaz natsꞌulhꞌa de,
didut cha nechꞌaz nátilꞌa.
13Oolazditni de,
ꞌet hoontsꞌi ꞌaw didut nela dootnih aitꞌoh,
ꞌinkꞌez ꞌaw ꞌatsꞌun unꞌa naꞌootneh aitꞌoh ꞌet huwa.”
Sizi Gri ba neꞌutꞌenne, ꞌenne whulohne hinzoo ꞌinkꞌez whulohne cha hintsiꞌ
14ꞌEt ndi khuni ꞌi buba oonailnih. NeMoodihti nalh budutánelh, ꞌet khun ꞌi khuni gha hukwa lhdulhyoh ꞌuhudootniꞌ junih. Tsꞌiyawh buba lheꞌyízooꞌ. Mbe yudántsꞌone tsꞌiyawh nintaꞌ butálhꞌelh. 15ꞌEt Yakꞌusda ba dune unzoo-un ꞌonleꞌ, whuz unꞌa hukwa ꞌintꞌen. Nye ꞌutꞌen ꞌaw la hukwa yálhuzonleꞌ. Ndi khuni ꞌalhaꞌ ꞌuntꞌoh-i tsꞌihꞌun unꞌa dune hubodilhꞌeh. 16ꞌEt hoontsꞌi ꞌantsꞌi ꞌoh nuyálhdukne ꞌinkꞌez Yakꞌusda ghudlóhne, ꞌenne buzih nónyaꞌ junih. Nduntꞌohne, ꞌenne ꞌuyoonne ꞌon nus Yakꞌusda chꞌaz yalhdukne ubuhutilhtselh. 17Bughuni, dada kꞌunꞌa la butaidózit. Nyoonne Hymenaeus ꞌinkꞌez Philetus cha, nduntꞌohne hinli. 18ꞌEt nduntꞌohne dune ndi khuni ꞌalhaꞌ ꞌuntꞌoh-i tankꞌus ꞌuhintꞌoh huwa hichꞌa súdil. ꞌEnne ꞌuhutni, ndi dunahudutádulh-un, ꞌudaꞌ ꞌuhooja hutni. ꞌEt whula gha tsꞌe whulohne be ꞌalha ꞌuhoontꞌoh-i, tsꞌiyawh buba musai suliꞌ. 19ꞌEt hoontsꞌi Yakꞌusda ooyoh ookꞌu whuzꞌai-i whudutsꞌo. ꞌAw gak hóleꞌ aitꞌoh. ꞌI kꞌut khuni ꞌukꞌe yánguz-i ndutni, “Mbene la neMoodihti oochꞌeꞌ unline, ꞌenne tsꞌiyawh tꞌebunínzun.” ꞌInkꞌez cha, “Mbene la ꞌuhutni, Gri ooduneꞌne tsinli de, ꞌenne ꞌutꞌen ꞌutsiꞌ-i tsꞌu níntꞌine, ꞌet ndoohoontꞌoh-un, ꞌet tsꞌiyawh whuchꞌaz náhoolyeh.”
20Ntsꞌe yoh whucho whambez tsꞌe tsꞌiyaitsuk ꞌet ꞌusdla. Beꞌ tsꞌutnai-i ꞌinkꞌez bé uzutꞌalh-i, whulohkhi gold, ꞌinkꞌez silver cha, ꞌi be ꞌulya. Whulohkhi duchun ꞌinkꞌez whutlꞌus be ꞌulya, ꞌi cha ꞌet ꞌusdla. Whulohkhi unzoo ꞌinkꞌez whulohki ꞌaw lhízooꞌ. 21ꞌEt huwa mbe dichꞌoh lubeshi ꞌuchꞌaz nálhꞌa de, ꞌet de duMoodihti ba ꞌuduneꞌududulti ꞌinkꞌez ooMoodihti yeꞌ titꞌelh, ꞌutꞌen unzoo-i tsꞌiyawh yeni lhadíntꞌoh whe ꞌuntꞌoh.
22ꞌInkꞌez ntsꞌenꞌa chilke ntsiꞌ-i buyustꞌe ootsꞌi nintꞌi-i, ꞌi oochꞌa tilgaih. Kꞌus tsꞌihꞌun ꞌuhoontꞌoh-un, be ꞌalha ꞌuhoontꞌoh-i, be lhkꞌe tsꞌutsiꞌ-i be nedzi soo óotꞌeꞌ-i cha, tsꞌiyawh bunanyalh. ꞌInkꞌez ndunne budzi yo lubeshi ooghu hooloh whe neMoodihti tsꞌu dedudline, ꞌenne bubulh ínꞌus. 23ꞌEt hoontsꞌi whusni ghuni ꞌinkꞌez khuni tꞌenusdzun-i, ꞌi hoontsꞌi be yáhalhduk, ꞌi tsꞌiyawh oochꞌoh ꞌonleꞌ. Tꞌeoonínzun ndi khuni nduntꞌoh-i, ꞌi dune huyé lhdulhyoh ꞌutni-i, ꞌi ꞌuntꞌoh. 24ꞌEt neMoodihti be ꞌulhna-un, ꞌen ꞌaw dune élhdoosyaih. Kꞌus tsꞌiyanne dune dachꞌe núlheꞌustꞌen ꞌinkꞌez soo dune hodulhꞌeh-un ꞌonleh. Tsꞌiyanne nanilhtsulyaz neꞌboolhꞌen. 25Yo ꞌúdudildzun ꞌinkꞌez buchꞌaz ditnine tsꞌihꞌun bubulh nenáhohoꞌalh. ꞌEt tilah Yakꞌusda dudeni nahundunizdla uboolhtselh. ꞌEt de sih khuni ꞌalhaꞌ ꞌuntꞌoh-i tꞌehinoozeh. 26ꞌInkꞌez ꞌet la bubeni bugha nádoltsꞌit, ꞌinkꞌez netsudule hubilhchoot inleꞌ hikꞌuneꞌ ootꞌen ha, ꞌet la ntsꞌoh whe tankꞌus hunintꞌi-un whuchꞌa nahoojaꞌ. ꞌEt ꞌudekꞌez dzin whenghoh de, tube howa whútilnaꞌ.
Currently Selected:
2 Timothy 2: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.