2 Thessalonica Whutꞌenne 2
2
Whuchꞌa nahusdilh whutáleh-un
1ꞌEt neulhutsinke, neMoodihti whusanátidalh-un ꞌinkꞌez ꞌen tsꞌun ooba ꞌilhunatsꞌootádulh, ꞌet huwun soo cho neoozúlhtsꞌai. 2Dune Ndoni gha nohbulh yalhduk naꞌdudilꞌi whe ꞌunohúlhni Gri oodzin, ꞌet dzin ꞌudaꞌ whusahooltsꞌut. Kꞌus dune dichꞌoh dughuni be nohbulh yálhduk, kꞌus ꞌuyoon nohtsꞌo kꞌe ꞌanguz ꞌinkꞌez si ꞌusdla leꞌ ꞌúntꞌoh de, ꞌet nduhúja de, khun huwun khun nantoohdilh junih, ꞌet nohtsꞌun tezdudlih. 3Khun te dune nanohnooꞌah junih. Sizi Gri oodzin whusaóotiltsꞌulh ꞌet whutso, ꞌet ꞌudechoo whuchꞌa nahusdilh whutáleh, ꞌinkꞌez ndun lubeshi ꞌulhꞌen-un, ꞌen tsꞌiyanne nalh be hoodutaltsilh. Ndun lubeshi ꞌulhꞌen-un, musai yulhtsi-un, ꞌen ooyeꞌ ꞌuntꞌoh. Hukwꞌelhꞌaz ꞌet de za ꞌet dzin whusaóotiltsꞌulh. 4Yakꞌusda chꞌaz ditni, ꞌinkꞌez yando ꞌuntꞌoh naꞌdudilꞌí-un, ꞌen tsꞌiyanne budutanelh, “Si za Yakꞌusda usdli. ꞌUyoon Yakꞌusda ootsꞌu tenadoohdli junih!” ꞌEt whuz unꞌa Yakꞌusda oolugliz whucho ꞌet dayaih ꞌinkꞌez ꞌet Yakꞌusda buba naꞌdudilꞌi.
5ꞌAw eh whunalhuzulhni? Nohbulh ꞌustꞌen daꞌ nohdasniꞌ inleꞌ. 6ꞌEt ꞌawet ndai kꞌoh yúnilhtꞌi-i, ꞌi nohni tꞌenahzun. ꞌEt ꞌoh de ndun lubeshi ꞌulhꞌen-un tsꞌiyanne ba be hoodatꞌen tileh. 7ꞌEt ndi dune hukwꞌun nulhéꞌustꞌen ubulhtsih-un, ꞌet wheꞌ hoontꞌoh hooyoh-un, ꞌet ꞌudaꞌ ꞌandit nduwhútꞌen wheꞌ hoontꞌoh. ꞌEt hoontsꞌi ndun kꞌoh ꞌúnilhtꞌi-un, ꞌet za ndutitꞌelh whusanátiltelh whutsꞌun. 8ꞌInkꞌez ꞌet de ndun ukꞌunulheꞌustꞌen-un, ꞌen be hóodutaltsilh. ꞌEn itilelh neMoodihti dichꞌoh ye ꞌusjiz-i, ꞌi be ndun gak yutilhtselh. ꞌEt whuz unꞌa neMoodihti whusanátidalh-un, ndi ootsꞌu ha yánduz-i, ꞌi be ndun yukꞌunulheꞌustꞌen-un, ꞌen ꞌilhiz wheni hooloh yutilhtselh. 9Ndun yukꞌú nulhéꞌustꞌen-un whusatiyalh-un, ꞌen be ꞌutꞌen kꞌoh, ntsꞌenꞌa Satan ꞌutꞌen, ꞌet whuz unꞌa za ꞌutitꞌelh. Hoolhtus tunéꞌ titꞌen, ꞌinkꞌez hooncha tunéꞌ titꞌen cha ꞌutitꞌelh. ꞌInkꞌez ꞌukꞌenus whutsꞌit-un, ꞌet buba hooncha tíleh. 10Ndunne kwuncho yo tsꞌu tudilhne, ꞌenne tsꞌiyawh tsꞌihꞌun unꞌa lheꞌhootꞌoh-i, ꞌi be nabunaꞌah. Khuni ꞌalhaꞌ ꞌuntꞌoh-i, ꞌi hikꞌelhítsiꞌ, ꞌet huwa ꞌaw hudoojih aitꞌoh. 11ꞌEt huwa hoonli nabunaꞌah-i, ꞌet Yakꞌusda whuz unꞌa whute bula dutitnih. ꞌEt ndi whutsꞌit-i, ꞌi za buba ꞌalhaꞌ yutátꞌelh. 12ꞌEt ndunne khuni ꞌalhaꞌ ꞌuntꞌoh-i, ooba ꞌalhaꞌ lheꞌyitꞌohne, ꞌet nduntꞌohne, ꞌenne ndet tsꞌihꞌun lheꞌhóotꞌoh-un, ꞌoh ho za ꞌet huhoontꞌiꞌ whe ꞌoh te neꞌhutꞌen, ꞌenne tsꞌiyawh Yakꞌusda buba nahutiyeh.
Soo cho whulh núdolhyaꞌ
13ꞌEt hoontsꞌi neulhutsinke neMoodihti nohkꞌentsiꞌ. ꞌEt ꞌudechoo whutsꞌun ꞌutáhanóhanla dutihjih ha. ꞌEt huwa Yakꞌusda ꞌahoolhyiz musi nohba tsꞌutni. Ndoni be Yakꞌusda ba ꞌudun nenóhninla ꞌinkꞌez ndi khuni ꞌalhaꞌ ꞌuntꞌoh-i, ꞌi nohba ꞌalhaꞌ ꞌuntꞌoh. 14ꞌEt whuz unꞌa neghuni unzoo-i, ꞌi be Yakꞌusda dutihjih ha nohkaꞌ daniꞌ. ꞌEt neMoodihti Sizi Gri ye diztiꞌ-i, ꞌi nohgha tíkulh. 15ꞌEt ꞌinka neulhutsinke, soo cho núdulhya. ꞌInkꞌez ntsꞌenꞌa la ndi hiye hodulhꞌeh-i, ꞌet wheni negha hodilhꞌeꞌ, neghuni gha, kꞌus nedustlꞌus gha cha, ꞌi tsꞌiyawh soo cho oohtun.
16ꞌEt neMoodihti Sizi Gri dichꞌoh, ꞌinkꞌez Yakꞌusda neBá, ꞌen nekꞌentsiꞌ. ꞌEn ye unzoo-i, ꞌi be ꞌilhiz wheni whuz nenilhtꞌi whe ꞌet ooka tse tsꞌuholeꞌ. 17Nohdzi óozooꞌ, ꞌinkꞌez khuni unzoo-i, ꞌinkꞌez ꞌutꞌen unzoo-i toh nenóholelh.
Currently Selected:
2 Thessalonica Whutꞌenne 2: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.