1 Thessalonica Whutꞌenne 1
1
Thessalonica whutꞌenne Paul hadih ꞌubulhni
1Wheni tane tsinli Paul, Silvanus, Timothy, nohni keyoh Thessalonica tsꞌe Yakꞌusda neBá ꞌen ba ꞌilhunaoodulhne, hadih nohtsꞌutni. NeBá Yakꞌusda ꞌinkꞌez Sizi Gri neMoodihti tsꞌun nohba tenazdudli, ꞌet whe ye unzoo-i ꞌinkꞌez nohdzi dizghel nohbulh ootꞌeꞌ.
Hoonzoo kꞌunꞌa neꞌhutꞌen
2ꞌAhoolhyiz nohni nohghun Yakꞌusda tsꞌun musi tsꞌutni. Netenadudli toh nohnatsꞌulnih. 3Nohnatsꞌulnih-un ꞌaw ꞌetsul lheꞌtsꞌusne, be ꞌalha ꞌuhoontꞌoh-i, ꞌi ghun nohꞌeꞌutꞌen. ꞌInkꞌez be nékꞌetsꞌinsiꞌ-i be soo cho ꞌahtꞌen. ꞌInkꞌez neMoodihti Sizi Gri ꞌen ghun hukwa tse hoohli-un, ꞌaw whula lhduzahni. Yakꞌusda neBá ꞌen oonalh ꞌet ndahtꞌen.
4Neulhutsinke tꞌetsꞌoninzun Yakꞌusda nohkꞌentsiꞌ ꞌinkꞌez ꞌutáhanóhanla. 5ꞌEt neghuni unzoo-i, ꞌaw khuni za iloh unli whe nohtlꞌa díltsꞌut. ꞌEt hoontsꞌi be hoolhtus-i be ꞌinkꞌez Ndoni gha cha, ꞌet nohtlꞌa díltsꞌut. ꞌEt ntsꞌenꞌa nohtlꞌa díltsꞌut ꞌet whe la tꞌeoonuhzun ndi khuni ꞌi tsꞌihꞌun unꞌa ꞌuntꞌoh. ꞌEt huwa ꞌoh daꞌ nohtoh uzdilhtsꞌi whe nohni nohba dantꞌohne dune tsinli, ꞌet tsꞌiyawh tꞌeoonáhzun. 6ꞌEt wheni ꞌinkꞌez neMoodihti cha, nekꞌunꞌa ꞌahtꞌoh sahliꞌ. Tube dzoh nusuhde whe Ndoni ye whunilhni-i, ꞌi be Yakꞌusda ooghuni unzoo-i hoonáhtꞌiꞌ whe ulhchoot. 7ꞌEt nohni nohgha ntsꞌoh tuneꞌ ꞌahtꞌen-un, ꞌet ndunne Macedonia ꞌinkꞌez Achaia yun kꞌut cha, ndunne Sizi Gri ooba ꞌalhaꞌ ꞌuntꞌohne, ꞌenne nohkꞌunꞌa ꞌuhintꞌoh huzdliꞌ. 8ꞌEt Macedonia whutꞌenne ꞌinkꞌez Achaia whutꞌenne cha, ꞌenne neMoodihtih ooghuni, ꞌi tsꞌiyawh nohni nohgha huyulh ꞌudantsꞌo. ꞌEt hoontsꞌi ꞌaw ꞌet za iloh, Yakꞌusda tsꞌun nohba ꞌalhaꞌ ꞌuntꞌoh-un, ꞌalhgoh ndulcho whe tꞌehinanzin, ꞌet huwa wheni ꞌaw ꞌon ꞌun daja ꞌuzdooniꞌ aitꞌoh. 9ꞌEnne didutchꞌoh nohni nohghun nebulh nahuhoolnuk ꞌet whe kꞌeke nedáhtni. ꞌInkꞌez ntsꞌenꞌa ꞌukꞌeltsi nohba ꞌalhaꞌ ꞌuntꞌoh-un, ꞌet whuchꞌa nasahdil whe Yakꞌusda tsꞌu nasulhya. Yakꞌusda, mbe khuna-un, ꞌinkꞌez ꞌalhaꞌ Yakꞌusda unli-un, ꞌen za ooba oohtꞌen ha. 10ꞌInkꞌez ooYeꞌ, yakꞌuz tsꞌu hainya-un, ꞌen cha ooba sulhꞌi. Sizi ꞌen ꞌuntꞌoh. ꞌEn yaidlane butoh dunaidilhti ꞌinkꞌez Yakꞌusda ye nebulh hunilchꞌe-i negha tikulh-i, ꞌi chꞌa neulhyis-un, ꞌen ꞌuntꞌoh.
Currently Selected:
1 Thessalonica Whutꞌenne 1: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.