1 Peter 1
1
Lizwifne lhelhdun keyoh whutꞌenne huzdliꞌ, ꞌenne Peter hadih ꞌubulhni
1Si Peter Sizi Gri ꞌen gha whelꞌaꞌ-un usdli. Nohni Lizwifne dukeyoh whutꞌenne ꞌahli inleꞌ. ꞌAwet lhelhdun keyoh whutꞌenne sahliꞌ. Pontus, Galatia, Cappadocia, Asia, ꞌinkꞌez Bithynia cha. ꞌEt ꞌóh ho ndulcho whe ꞌatsulyaz huba nenáhtna. Yakꞌusda ba ꞌutahalyane ꞌahtꞌoh. Nohni nohtsꞌo kꞌe ꞌisguz.
2Yakꞌusda neBá nus whudizulh-un tsꞌiyawh tꞌeooninzun. ꞌEt huwa ꞌutahalyane ꞌahtꞌoh. Ndiz unꞌa nohba ꞌet ꞌúhooja, Ndoni Yakꞌusda ba ꞌudun nenóhninla Sizi Gri ookꞌuneꞌ tihtꞌen ha, ꞌinkꞌez buzkaiꞌ nohba nadíltꞌiꞌ ꞌi be nohlubeshi tsꞌiyawh nohba gak suliꞌ. Ye unzoo-i ꞌinkꞌez Yakꞌusda tsꞌun be tsꞌihꞌun ꞌahtꞌoh-i, ꞌi lhanꞌun te nohgha óokat.
Yakꞌuz tsꞌe neba ꞌet ꞌuzdla-un
3Yakꞌusda, Sizi Gri neMoodihti ooBá, ꞌen uzdílhtiꞌ. Hooncha whe negha teꞌnanzin whe nanehílhnaꞌ. ꞌEt huwa hoonzoo-un hukwa tse tsꞌúholeꞌ hubaꞌ hoontꞌoh. Sizi Gri ꞌen yaidlane butoh dunadija. ꞌEt huwa wheni cha ꞌilhiz tsꞌukhutinalh-un hukwa tse tsꞌúhooli. 4ꞌAndit ꞌawet neBá yutꞌi-i negha ítalelh-i, ꞌi cha wheni neba ꞌuntꞌoh. ꞌAw oolhjut aitꞌoh. ꞌAw ntsiꞌ cha ooleꞌ aitꞌoh, ꞌinkꞌez dutoodeh aitꞌoh. ꞌI ꞌudaꞌ yakꞌuz tsꞌe nohba ꞌet whuzdla. 5Nohni nohba ꞌalha ꞌuhoontꞌoh-un be Yakꞌusda ye ulhtus-i búghudli whe whéhudutijih-un huhootálhchulh. ꞌEt ꞌudekꞌez dzin de, yakꞌuz tsꞌe ꞌet neba whuzdla-i, ꞌi tsꞌiyawh tsꞌet ha óotikulh ꞌet wheni lhaóodintꞌoh. 6ꞌEt whe hoonáhtꞌiꞌ. ꞌEt hoontsꞌi ꞌandit ꞌatsulyaz wheni tilah lhelhdun whe dzoh nahzut-un, ꞌet whe nohóolhdzi. 7ꞌEt whuz unꞌa whe nohba ꞌalha ꞌuhoontꞌoh-un, ꞌet nohba ꞌon nus hoonzoo tileh. Gold kwun ꞌi be ꞌuzooꞌ huyulhtsi, ꞌet whe soo tsꞌihꞌun oozai za lhih, ꞌet hoontsꞌi ꞌi cha hooloh tileh. Nohba ꞌalha ꞌuhoontꞌoh-un gold anus whudíztiꞌ wheꞌ hoontꞌoh. Whuz unꞌa za ndet dzin Sizi Gri nenalhtsꞌet be hóodiltsai de, ꞌet de bé nohba ꞌalha ꞌuhoontꞌoh-un huwa Sizi Gri nohba whudutálhtiꞌ, ꞌinkꞌez nohba hooncha tileh. 8Sizi Gri ꞌaw lhuzihꞌen ꞌet hoontsꞌi ookꞌehtsiꞌ. ꞌAw lhuzihꞌen ꞌet hoontsꞌi nohba ꞌalhaꞌ ꞌuntꞌoh. ꞌInkꞌez ndi be tsꞌuhoontꞌiꞌ-i ncha kꞌet ꞌaw ꞌuzdooniꞌ aitꞌoh, ꞌinkꞌez tube diztiꞌ whe ꞌuntꞌoh. ꞌEt huwa hoonáhtꞌiꞌ. 9ꞌUdekꞌez dzin de nohba ꞌalha ꞌuhoontꞌoh ꞌet whe nohzul dutijih wheꞌ hoontꞌoh.
10Ndunne Yakꞌusda be nus honꞌenne, ꞌenne ndi ye unzoo-i nohtsꞌu hóoltsꞌulh-un, ꞌet huwun nus huhonꞌen. Ndi whézdujis-un, ꞌet huwun ꞌet soo tsꞌihꞌun ꞌukꞌenus huwaꞌ hooli whe nahahootáꞌalh hukwaꞌ hutꞌen. 11ꞌOh daꞌ Gri ooyughi buyudinda ꞌinkꞌez ꞌuwhutanelh whutso, ꞌen bugha yalhduk ntsꞌenꞌa la Gri dzoh nutizut, ꞌet hukwꞌelhꞌaz ooba hooncha tuneꞌ titꞌen-un ꞌuwhutanelh. ꞌEt nduhoontꞌoh-un nkede njan ꞌet nduwhutanelh, ꞌinkꞌez ntsꞌenꞌa ꞌuwhutanelh, ndunne nus honꞌenne nahahootáꞌalh hukwaꞌ hutꞌen. 12ꞌInkꞌez ndunne nus hooꞌenne, ꞌenne Yakꞌusda whubunilhtan ꞌaw ꞌenne buba lheꞌhootꞌoh. ꞌEt kꞌus wheni za neba nus húhonꞌen. ꞌEt ꞌawet ndunne khuni unzoo-i be yalhdukne, ꞌenne Ndoni yakꞌuz ndus de hálꞌaꞌ-un, ꞌen be nohodániꞌ. ꞌInkꞌez nduhoontꞌoh-un, lizasne, ꞌenne hoontsꞌi nahahootáꞌalh hukwaꞌ huninzun.
Yakꞌusda neBá, ꞌen ookꞌunꞌa za ꞌutsꞌootꞌeꞌ
13ꞌEt huwa noheni lhadáhle. Huwahli. ꞌEt whuz unꞌa ye unzoo-i nohtsꞌu tihkulh, whula toh whutsꞌun ooka tse hóohli. Ndet dzin ꞌutinelh Sizi Gri nenalhtsꞌet be hóodutaltsilh. ꞌOh de whézdujis-un, ꞌet nohgha whútaltsꞌulh. 14Tsꞌoodunne kꞌunꞌa ꞌukꞌuneꞌ ꞌutꞌenne oohleꞌ. ꞌAw niz de ha ꞌíhtꞌen, Yakꞌusda tꞌenuzahzun, ꞌet huwa hoontsiꞌ tsꞌunáhtꞌi. ꞌAw ꞌon ꞌun ndóhtꞌen junih. 15ꞌEt hoontsꞌi mbe la dutihjih ha nohkaꞌ daniꞌ-un, ꞌen lubeshi ooghu hooloh, nohni cha ndahtꞌen-un la ꞌen ookꞌunꞌa za toohdilh. 16Whuz unꞌa ꞌukꞌe hóoguz whe njan ndutni, “Si lubeshi ooghu hooloh-un ꞌustꞌoh. ꞌEt huwa nohni cha ꞌet dóhtꞌeꞌ hubaꞌ hoontꞌoh.”
17ꞌIlhoghun tsinli whe ntsꞌenꞌa la datsꞌitꞌen-un, neBá ꞌaw lhdítni whe neba nahutiyeh. ꞌInka ꞌen tsꞌun za tenadahdli de, soo cho khahdli. ꞌEn be nulhjut whe ndi yun kꞌut ꞌoh whuya lhóhdilh. 18ꞌOh daꞌ ndet la nohdusneke whunohodalhꞌeꞌ-un, whulohkhun ꞌaw hoonli lhuhooloh inleꞌ. Silver, gold nduwhi, ꞌi be iloh Yakꞌusda nanohoket. ꞌI tsꞌiyawh hooloh tileh ꞌet huwa. 19ꞌEt hoontsꞌi Gri buzkaiꞌ diztiꞌ-i, ꞌi be naneonket. ꞌEn ꞌusbaiyaz ꞌaw hoonli-unyaz bulhodíꞌoh kꞌunꞌa ꞌuntꞌoh. 20ꞌUdaꞌ ndi yun ꞌutilnelh, whutsodaꞌ Yakꞌusda daóotanelh-un ꞌudaꞌ tꞌewhunínzun. ꞌEt njan ꞌudekꞌez dzin nohba whuzꞌai-un, Sizi Gri ꞌandit nohba tsꞌet ha hóoltsꞌut. 21ꞌEn gha Yakꞌusda ootꞌa ninahtan. ꞌEn ꞌuja yaidlane butoh dunaidilhti ꞌinkꞌez ye diztiꞌ-i, ꞌi cha yugha nínꞌai. ꞌEt Yakꞌusda ootꞌa ninahtan, ꞌinkꞌez ndet la hukwa tse hoohli-un, ꞌet Yakꞌusda ꞌen gha tsꞌiyawh whusaóotiltsꞌulh.
Khuni ꞌilhiz ꞌuntꞌoh-i
22Ndoni ꞌen be ndi khuni ꞌalhaꞌ ꞌuntꞌoh-i, ꞌi ookꞌuneꞌ ꞌahtꞌen, ꞌi be nohdzi ꞌaw lubeshi ooghu hooloh sulhtsi. Nohdzi ndulcho-i be ooba ꞌalha ꞌuhoontꞌohne bukꞌehtsiꞌ. Nohdzi ꞌaw lhdutsun whe ꞌilhoghun ꞌahli whe soo cho lhkꞌe oohsiꞌ. 23Yakꞌusda ooghuni ꞌi be doo cha za nawhuzáhdli. Nedusneke gha ꞌilhiz tsꞌukhoonaꞌ aitꞌoh. Yakꞌusda ooghuni ꞌi be za ꞌilhiz tsꞌukhutinalh wheꞌ hoontꞌoh. 24ꞌEt huwa ndi khuni njan ndutni,
“Tsꞌiyanne ꞌantsꞌi tlꞌo leꞌ hintꞌoh.
Ndi tlꞌo ꞌatsulyaz ꞌuntꞌoh.
ꞌInkꞌez dune ye diztiꞌ-i,
ꞌi oomaiꞌ leꞌ ꞌuntꞌoh.
Tlꞌo bisdai dugih ꞌinkꞌez nakuk.
25ꞌEt hoontsꞌi neMoodihti ooghuni ꞌilhiz wheni ꞌet dizꞌai.”
Ndi khuni ꞌi khuni unzoo-i be nohbulh yainduk, ꞌi ꞌuntꞌoh.
Currently Selected:
1 Peter 1: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.