YouVersion Logo
Search Icon

1 Corinth Whutꞌenne 1

1
Yakꞌusda ba ꞌilhunaoodulhne keyoh Corinth tsꞌe, Paul hadih ꞌubulhni
1Si Paul Yakꞌusda hukwaꞌ ninzun kꞌunꞌa, ꞌi be Sizi Gri oosalꞌaꞌ-un#1:1 Ndi khuni whusálꞌaꞌ-un, ꞌi Abodun cha ni whe ꞌutni. suhutni, ꞌinkꞌez neulhutsin Sosthenes huyulhni, ꞌen cha.
2Keyoh Corinth tsꞌe Yakꞌusda ba ꞌilhunaoosdilne hinli, nohni ndi ꞌudustlꞌus kꞌut nohtsꞌo kꞌeꞌ usges. Gri Sizi ꞌen oochꞌeꞌne ꞌahli ꞌinka ꞌet whe Yakꞌusda ba ꞌudun nenohninla. Yakꞌusda oochꞌeꞌne nohuwhutni. Nohni ꞌinkꞌez mbene la neMoodihti Sizi Gri yooziꞌ be yutsꞌu tedudlihne, ꞌenne cha Yakꞌusda oochꞌeꞌne ꞌuhintꞌoh. ꞌEnne buMoodihti unli ꞌinkꞌez wheni cha neMoodihti unli.
3NeBá Yakꞌusda ꞌinkꞌez Sizi Gri neMoodihti tsꞌun nohba tenadusdli ꞌet whe nohdzi doghel ꞌinkꞌez ye unzoo-i nohbulh ootꞌeꞌ.
Yakꞌusda ꞌen gha tsꞌiyaintsuk nohghaltsꞌut
4Sizi Gri oochꞌeꞌne ꞌahli ꞌet huwa Yakꞌusda ye unzoo-i nohghaltsꞌut. ꞌEt huwa sYakꞌusda tsꞌun ꞌahoolhyiz musi dusni. 5Yakꞌusda ye unzoo-i nohghaltsꞌut. ꞌEt huwa ꞌen ghun tꞌeoonihzin ꞌinkꞌez ntsꞌenꞌa la ooghu yalhduk, ꞌet whuz unꞌa ꞌen gha tsꞌiyantsuk whe ꞌon nus unzoone sahliꞌ. 6Ntsꞌenꞌa la Gri ghun nohdasniꞌ-un, ꞌi tsꞌihꞌun unꞌa nohdzi yudiltsꞌut. 7ꞌEt huwa ꞌaw hoonliyaz nohgha untꞌai-i ꞌaw nohba ndukw lhiloh whe neMoodihti Sizi Gri netoh be hoodutaltsilh-un, ꞌet hukwa tsꞌe hooli. 8ꞌEt ꞌudekꞌez dzin whutsꞌun, ꞌet ꞌen gha be tsꞌilhtus-i be nudutalhyalh ꞌet whutsꞌun. ꞌEt whe la neMoodihti Sizi Gri oodzin de, ꞌet dzin ꞌaw be nohkꞌe holtsꞌit-i hootaloh. 9Yakꞌusda ꞌaw nohla dootnih aitꞌoh. ꞌEt huwa duYeꞌ bulh ꞌilho oohleꞌ ha nohkaꞌ daniꞌ. NeMoodihti Sizi Gri ꞌen ꞌuntꞌoh.
Lhchꞌaz úzdotni-un Gri neba hukwaꞌ ninzun eh?
10Sulhutsinke, neMoodihti Sizi Gri ꞌen booziꞌ gha nohtsꞌu tédusdlih, ꞌet nohnihchꞌoh nohtoh lhchꞌa natihdulh whuchꞌa, ꞌet huwa nohni ꞌilhoh kꞌunꞌa za nuni untihzut nohtsꞌu hukwaꞌ nuszun. ꞌEt whe ꞌilhone ꞌahli hukwꞌunꞌa ꞌutihnelh ꞌinkꞌez tsꞌiyantsuk whe lhgha nuni untihdeh ꞌinkꞌez lhkꞌunꞌa za ꞌutihtꞌelh. 11Sulhutsinke Chloe ooyoh dilhtsꞌine, whulohne, ꞌenne bula toh tsꞌe nohni lhedahdulh-un whulh ꞌúdastsꞌo. 12Njan ꞌet ꞌuwhudusni, whulohne nohtoh njan duhutni, “Paul oochꞌeꞌ usdli,” kꞌus “Apollos oochꞌeꞌ usdli,” kꞌus “Cephas oochꞌeꞌ usdli,” kꞌus “Gri oochꞌeꞌ usdli,” ꞌet whuz unꞌa hukwa lhedahdulh.
13ꞌEt tsꞌihꞌun ꞌuhoontꞌoh nuhzun eh? Gri chꞌaz ditni eh? Kꞌus Paul ꞌen eh tulalhgus kꞌut nohba dazsai? Kꞌus Paul booziꞌ, ꞌi gha eh too be ꞌulhya? 14Yakꞌusda musi dusni whe nohni nohtoh ꞌaw ꞌilhoghun hoontsꞌi too be lheꞌusdlel wheꞌ hoontꞌoh. Crispus ꞌinkꞌez Gaius ꞌenne za too beꞌ busdla, 15doo ka whulohne ꞌuhudooniꞌ, sichꞌoh sooziꞌ gha dune too beꞌ ísꞌen hudooniꞌ tilah. 16ꞌInkꞌez Stephanas ooyoh dilhtsꞌine, ꞌenne cha too beꞌ busdla. ꞌUyoonne cha tilah too beꞌ ꞌusdla ꞌet ꞌaw whunalhuzuzni. 17ꞌAw dune too beꞌ oosꞌen huba iloh whe Gri whuz de sutilhꞌaꞌ. Khuni unzoo-i be bubulh yatisduk huba ꞌusinla. ꞌAw dune khuni whunih be iloh njan nohbulh yasduk, doo ka la Gri ootulalhgus ꞌantsꞌi ꞌuntꞌoh ooleꞌ.
Yakꞌusda ye ulhtus-i ꞌinkꞌez ye whunih-i, Gri ꞌen ꞌuntꞌoh
18Mbene la nintaꞌ nisdilne ndi khuni tulalhgus ghun ꞌenne whusni khuni za buba yinli. ꞌEt hoontsꞌi wheni ꞌi be uzdutijihne tsꞌooleꞌ hubaꞌ hoontꞌoh, ndi khuni ꞌi Yakꞌusda ye ulhtus-i neba ꞌuntꞌoh. 19ꞌEt whuz unꞌa Yakꞌusda ooghuni ꞌukꞌeguz,
“Whunih naꞌdudilꞌine, ꞌenne hiye whunih-i musai tiselh, ꞌinkꞌez mbe la tsꞌiyantsuk tꞌeooninzunne, ꞌenne hiye tꞌeooninzun-i gak tiselh.”
20Ntsꞌe ꞌuhoontꞌoh whunihne hoonli? ꞌInkꞌez ntsꞌe ꞌuhoontꞌoh Moses be ꞌudustlꞌus ꞌukꞌu nunáguzne hoonih? ꞌInkꞌez ntsꞌe ꞌuhoontꞌoh ꞌukꞌenus whunih naꞌdunudzunne hoonli? ꞌEt ꞌalha ꞌuhoontꞌoh ndai la ndi yun kꞌut whutꞌenne ye whunih-i, ꞌi Yakꞌusda tsꞌiyawh be tsꞌuwhusnih yulhtsi? A, ꞌalha ꞌuhoontꞌoh. 21ꞌEt huwa Yakꞌusda whunih whe ꞌuntꞌoh ꞌet huwa whunenulhtun, ndi yun kꞌut whutꞌenne, ndai la hiye whunih-i, ꞌi be ꞌenne ꞌaw Yakꞌusda tꞌehinuzun. ꞌEt kꞌus ndi khuni unzoo-i ooba ꞌalhaꞌ lheꞌhootꞌohne, ꞌenne buba whusni kꞌunꞌa be yatsꞌulhduk leꞌ hoontꞌoh, ꞌet hoontsꞌi ꞌi be Yakꞌusda hoontꞌiꞌ whe mbene ooba ꞌalha ꞌuhoontꞌohne, ꞌenne hubulhyih. 22ꞌEt Lizwifne huwa ꞌitꞌen-un za hukonuta ꞌinkꞌez ndunne Greekne, ꞌenne hiye whunih-i za haꞌ hoozilhtsꞌai. 23ꞌEt hoontsꞌi wheni Gri tulalhgus kꞌut dazsai-un, ꞌet za howu yatsꞌulhduk. Lizwifne ꞌankwꞌus buba dzoh suliꞌ, ꞌinkꞌez ndunne Greekne, ꞌenne ndi khuni whusni buba yuzdliꞌ. 24ꞌEt hoontsꞌi mbene hudutijih ha bukaꞌ daniꞌ Lizwifne ꞌinkꞌez Greekne, Gri ꞌen Yakꞌusda ye ulhtus-i buba unli, ꞌinkꞌez ye whunih-i cha buba unli. 25Yakꞌusda ye whusni-i, ꞌi dune ye whunih-i, ꞌi anus ꞌultus, ꞌinkꞌez ndai la Yakꞌusda ye tetsun-i, ꞌi dune ye ulhtus-i, ꞌi anus ꞌultus ꞌet huwa.
NeMoodihti ꞌaw ꞌen za ncha tsꞌóolhꞌeꞌ hubaꞌ hoontꞌoh
26Sulhutsinke nohni ꞌoh daꞌ dutihjih ha nohkaꞌ daniꞌ inleꞌ, ꞌet dantꞌohne ꞌahli tꞌeoonuhzun. Yun kꞌut whutꞌenne whuz unꞌa ꞌuninzunne tsꞌiyawh, ꞌaw lhane iloh nohtoh duba whunihne unli, ꞌinkꞌez ꞌaw lhane iloh nohtoh dune be hoolhtus unline, ꞌinkꞌez ꞌaw lhane iloh nohtoh dune nchane unli. 27ꞌEt hoontsꞌi Yakꞌusda hukwaꞌ ninzun, ndi yun kꞌut ndai la whusni-i, ꞌi be ndunne duba nawhutnihne, ꞌenne yooya ubutilhtselh. ꞌInkꞌez ndi yun kꞌut ndai la huye tetsun, ꞌi be duba naltusne, ꞌenne yooya ubutilhtselh. 28ꞌEt telꞌen whe whuzdli, ꞌinkꞌez mbe la yuchꞌa yo nenilya, ꞌenne Yakꞌusda ꞌutahabanla. ꞌInkꞌez doo cha ndai la ꞌantsꞌi unli hoontsꞌi, ꞌi cha ꞌutahayanla, ꞌi be ndai la yun kꞌut ꞌuntꞌoh unli-i, ꞌi be gak yutilhtselh. ꞌEt whuz unꞌa Yakꞌusda hukwaꞌ ninzun. 29ꞌEt whe ꞌaw ꞌilhoghun hoontsꞌi Yakꞌusda nalh ncha naꞌdudolꞌeꞌ aitꞌoh. 30ꞌEt huwa Yakꞌusda gha Gri Sizi ꞌen oochꞌeꞌne ꞌahli. ꞌEn ꞌuntꞌoh Yakꞌusda gha be tsꞌuwhunih-i neba yulhtsi, ꞌinkꞌez be tsꞌihꞌun unꞌa ꞌuhoontꞌoh-i cha neba yulhtsi, ꞌinkꞌez ꞌen gha ꞌudun neneninla, ꞌinkꞌez naneoket cha ꞌuja. 31ꞌEt ꞌukꞌe yanguz whe ndutni,
“Mbe la ncha naꞌdudutalꞌeꞌ hukwa ꞌutꞌen, ꞌet ꞌaw ꞌuhotꞌeꞌ aitꞌoh.
NeMoodihti ꞌaw ꞌen za uzdólhtiꞌ hubaꞌ hoontꞌoh.”

Currently Selected:

1 Corinth Whutꞌenne 1: crx

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy