Filemoni 1
1
O ‘Upu Fa‘afeiloa‘i
1O Paulo, o lē ‘ua noanoatia ‘ona o Keriso Iesu, o Timoteo fo‘i lo tatou uso. #Efe 3.1
‘Iā Filemoni o le pele na tatou galulue fa‘atasi; 2ma Afia lo tatou tuafafine pele ma Arekipa o lē na tatou matata‘u fa‘atasi, ‘atoa ma le ekalesia i lou fale. #Kolo 4.17; 2 Timo 2.3
3‘Ia ‘iā te ‘outou le alofa tunoa ma le manuia mai le Atua lo tatou Tamā, ‘atoa ma le Ali‘i o Iesu Keriso.
O le Alofa a Filemoni ma lona Fa‘atuatua
4‘Ou te fa‘afetai atu i lo‘u Atua, pe a ‘ou ta‘uta‘ua oe e lē aunoa i a‘u tatalo, 5‘ina ‘ua ‘ou fa‘alogo i lou alofa ma le fa‘atuatua i le Ali‘i o Iesu, ‘atoa ma le ‘au pa‘ia uma. 6‘Ina ‘ia galue lava le mafuta fa‘atasi i lou fa‘atuatua, ‘ina ‘ia matuā iloa mea lelei uma o ‘iā te i tatou ‘iā Keriso. #Fili 1.9 7Auā lo‘u uso e, ‘ua tele lo‘u fiafia ma le mafanafana ‘ona o lou alofa, ‘ina ‘ua fa‘amafanafanaina le ‘au pa‘ia ‘ona o oe. #2 Kori 7.4
O le Talosaga a Paulo e uiga ‘iā Onesemo
8O lenei, e ui lava ‘ina ‘ua ‘ou fa‘amalosi e poloa‘i atu ai ‘iā te oe ‘ona o Keriso, i mea e tatau, 9‘ae ‘ou te ‘ai‘oi atu ‘ona o le alofa, o a‘u nei lava o Paulo le toeaina, o lē ‘ua noanoatia nei fo‘i ‘ona o Iesu Keriso.#1.9 o Paulo le toeaina, o lē ‘ua noanoatia nei fo‘i ‘ona o Iesu Keriso: po o o Paulo le ‘au‘auna a Keriso, o lē ‘ua noanoatia ‘ona o lona finagalo. 10‘Ou te ‘ai‘oi atu ‘iā te oe mo lo‘u atali‘i o Onesemo, o lē na fānaua e a‘u, a o noanoatia a‘u. #Kolo 4.9; Kala 4.15; 1 Kori 4.15 11Sa lē aogā#1.11 O le igoa o Onesemo i le gagana Eleni o lona uiga “Aogā.” o ia ‘iā te oe, a o lenei e aogā tele ‘iā te oe ‘atoa ma a‘u.
12‘Ou te fa‘afo‘i atu ‘iā te ia; ‘inā e talia mai o ia, o lo‘u lava tino ia. 13Na ‘ou loto ‘ina ‘ia tāofi pea ‘iā te ia ma te nonofo ma a‘u, ‘ina ‘ia fai mou sui, na te ‘au‘auna mai ‘iā te a‘u i ‘ou noanoataga ‘ona o le tala lelei. 14A ‘ou te lē fia faia se mea e tasi pe a le tō mai sau pule, ‘ina ne‘i pei o se mea ‘ua fa‘atauānauina lou agalelei mai, a ‘ia faia ma le loto. #2 Kori 9.7; 1 Pete 5.2
15Auā atonu o le mea lea na te‘a ‘ese ai o ia i sina itū aso, ‘ina ‘ia e toe maua o ia e fa‘avavau; 16e lē toe fa‘apei o se pologa, ‘ae sili i le pologa, o le uso pele ia ‘iā te a‘u lava; e lē sili ‘ea ‘ona fa‘apea ‘iā te oe i la le tino ‘atoa ma la le Ali‘i. #1 Timo 6.2
17O lenei ‘āfai ‘e te manatu i la tā uō, ‘ia e talia mai o ia e pei o a‘u lava. 18‘Ae ‘āfai na ia agaleaga ‘iā te oe, po ‘ua ‘iā te ia sau mea, ‘ia e tu‘u mai lea mea ‘iā te a‘u. 19O a‘u o Paulo, ‘ua ‘ou tusi atu i lo‘u lava lima, ‘ou te taui atu lava; ‘ae ‘ou te lē fai atu, i la oe ‘aitalafu ‘iā te a‘u, o oe lava lea. #Kala 6.11; 2 Tesa 3.17 20E moni, lo‘u uso e, se‘i ē fa‘afiafia mai ‘iā te a‘u i le Ali‘i, ‘inā fa‘amafanafana mai ia i lo‘u loto i le Ali‘i.
21‘Ua ‘ou tusi atu ‘iā te oe, auā ‘ou te fa‘atuatua i lou gaua‘i mai, ‘ua ‘ou iloa ‘e te faia mea e sili lava i mea ‘ou te fai atu ai. 22Tasi fo‘i lea mea, ‘ia e sauni se mea ‘ou te nofo ai; auā ‘ou te fa‘amoemoe e tu‘uina atu a‘u ‘iā te ‘outou, ‘ona o a ‘outou tatalo. #Fili 1.25; 2.24
O le ‘Upu Mulimuli
23O lo‘o alofa atu ‘iā te oe o Epafara, o lo‘o noanoatia fa‘atasi ma a‘u ‘ona o Keriso Iesu. #Kolo 1.7; 4.12 24O lo‘o alolofa atu fo‘i Mareko, ma Aritako, ma Tema, ma Luka, ē ‘ua galulue fa‘atasi ma a‘u. #Kolo 4.10, 14
25‘Ia i o ‘outou agaga le alofa tunoa o lo tatou Ali‘i o Iesu Keriso.#1.25 O nisi fa‘aliliuga e fa‘aopoopo i ai le Amene.
Currently Selected:
Filemoni 1: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.