Opetaia 1
1
O le Malaia o Etoma ma le Manuia o Isaraelu.
1O le fa‘aaliga ‘iā Opetaia.
O lo‘o fa‘apea ‘ona fetalai mai o le Ali‘i le ATUA ‘iā Etoma,
‘Ua tatou fa‘alogo i le tala mai le ALI‘I, ‘ua ‘auina atu fo‘i le sāvali i nu‘u ‘ese,
“Tula‘i ia ‘outou, ‘inā tatou si‘i atu i ai le tau‘a.”#Isai 34.5-17; 63.1-6; Iere 49.7-22; Eseki 25.12-14; 35.1-15; Amo 1.11-12; Mala 1.2-5
2Fa‘auta,
‘Ua ‘ou faia oe ia fa‘atauva‘a i nu‘u,
‘ua matuā ‘inosia lava oe.
3O le fa‘amaualuga o lou loto ‘ua fa‘asesēina ai oe.
O oe o lo‘o nofo i ana o le papa;
e maualuga, le mea e nofo ai o ia,
o lē fa‘apea i lona loto.
“O ai sē na te lafo ‘iā te a‘u i lalo i le ‘ele‘ele?”
4E ui lava ‘ina maualuga le mea ‘e te nofo ai
pei o le aeto ma e tu‘u lou ōfaga i fetū,
o lo‘o fetalai mai le ALI‘I,
‘ou te lafo ‘iā te oe i lalo i lea mea.
5‘Ana ō atu ‘iā te oe o gaoi, ana ō atu o ē fao mea i le po, auē! ‘ua fa‘aumatia oe,
po ‘ua latou le gaoi ‘ea mea e tusa ‘iā i latou?
‘Ana ō atu ‘iā te oe o ē tau vine,
po ‘ua latou le fa‘atotoe ‘ea nai toe fuifui vine?
6E! ‘ua su‘ena lava Esau; ‘ua sā‘ilia ana mea lilo.
7‘Ua molia oe i le tuā‘oi lava e tagata uma na ‘outou fai ai mavaega,
‘ua fa‘a‘ole‘ole ‘iā te oe, ‘ua manumālō fo‘i ‘iā te oe tagata sa ‘outou nofo lelei;
O ē na ‘a‘ai i au mea e ‘ai ‘ua latou tu‘u le mailei i lalo ‘iā te oe.
E leai se mafaufau ‘iā te ia.
8O lo‘o fetalai mai le ALI‘I:
‘Ou te lē fa‘aumatia ‘ea i lea aso tagata popoto i Etoma,
ma ‘ou fa‘aumatia le mafaufau ai le mauga o Esau?#Isai 29.14; Eseki 35.2, 9-10
9Timanu e, e matata‘u ou tagata totoa,
‘ina ‘ia fa‘aumatia tagata uma a‘i le mauga o Esau ‘ina ‘ua fasiotia.
O le Fa‘atafunaga o Etoma
10E matuā fa‘amāina oe ‘ona o lou sauā
i lou uso o Iakopo;#1.10 lou uso o Iakopo: o tagata Isaraelu e tupuga mai ‘iā Iakopo le uso o Esau, Esau lea e tupuga mai ai tagata Etoma.
e fa‘aumatia fo‘i oe e fa‘avavau.#Nume 20.20-21
11O le aso sa e tu ai e fa‘afeagai,
o le aso sa ‘ave ai fa‘atagataotau‘aina ana ‘au e tagata ‘ese.
Na ulu atu ai fo‘i tagata ‘ese i ona faitoto‘a
ma latou fai ai le vili i Ierusalema,
sa i ai lava oe fa‘apei o so latou.
12A ‘ua lē tatau ‘ina ‘ua e maimoa i le aso o lou uso,
o le aso o lona puapuagā.
‘Ua lē tatau fo‘i ‘ina ‘ua e fa‘atu‘umanaina i le fānauga a Iuta i le aso na fano ai i latou,
‘ua lē tatau fo‘i ‘ina ‘ua e tautala fa‘asiasia i le aso o le puapuagā.#Mika 4.11; 7.8
13‘Ua lē tatau ‘ina ‘ua e ulu atu i le faitoto‘a o lo‘u nu‘u i le aso o lo latou malaia;
‘ua lē tatau ‘ina ‘ua e maimoa,
o oe lava i le latou tigā i le aso o lo latou malaia;
‘ua lē tatau fo‘i ‘ina ‘ua e tago i o latou ‘oloa i le aso o lo latou malaia.
14‘Ua lē tatau fo‘i ‘ina ‘ua e tu i magāala e fasioti ai ona tagata na sao.
‘Ua lē tatau fo‘i ‘ina ‘ua e tu‘uina atu i nu‘u ‘ese ona tagata na totoe i le aso o le puapuagā.
O le a Fa‘amasinoina e le Atua Nu‘u ‘Ese
15Auā e latalata le aso o le ALI‘I i nu‘u uma;
e faia ‘iā te oe e pei ‘ona e faia;
e toe i‘u atu ‘iā te oe mea na e faia.#Eseki 35.15; Ioe 1.15; Sapa 2.8
16Auā e pei ‘ona ‘outou feinu i luga o lo‘u mauga pa‘ia,#1.16 mauga pa‘ia: po o mauga o Siona.
e fa‘apea ‘ona feinu pea lava nu‘u uma,
latou te feinu lava ‘ia inu tele,
e ‘avea i latou e peiseaī ‘ua leai lava i latou.
O le Manumālō o Isaraelu
17‘Ae peita‘i e i ai i le mauga o Siona
o ē ‘ua sao, e pa‘ia fo‘i ia.
O le ‘āiga fo‘i o Iakopo e fai mo i latou lava
o a latou lava mea.#Ioe 2.32; Amo 9.8, 12
18E fai fo‘i le ‘āiga o Iakopo ma afi,
e fai fo‘i le ‘āiga o Iosefa ma afi mumū.
‘Ae fai le ‘āiga o Esau ma tagutugutu o saito;
latou te fa‘amū fo‘i ‘iā te i latou,
ma fa‘auma ‘iā te i latou;
e leai fo‘i sē toe i le ‘āiga o Esau;
auā ‘ua fetalai mai ai le ALI‘I.#Isai 10.17; Saka 12.6
19O i latou fo‘i o i le itū i saute e fai mo i latou le mauga o Esau;
o i latou fo‘i o i le itū maulalo e fai mo i latou le nu‘u o Filisitia;
e fai fo‘i mo i latou le lau‘ele‘ele o Efaraima,
ma le lau‘ele‘ele o Samaria;
e fai fo‘i Kiliata mo Peniamina.
20O le tāfeaga fo‘i o lenei itūtau‘a a le fānauga a Isaraelu o ē ‘ua i sa Kananā e o‘o i Sarefatā,
o le tāfeaga fo‘i o Ierusalema o i Sefarata, e fai mo i latou o ‘a‘ai o i le itū i saute.#1 Tu 17.9; Luka 4.26
21E ō a‘e fo‘i fa‘aola i le mauga o Siona,
‘ina ‘ia fa‘asalaina le mauga o Esau;
e fai fo‘i le mālō mo le ALI‘I.#2 Tu 13.5; Isai 19.20; Tani 2.44; Luka 1.33; 1 Kori 15.24; Fa‘aa 11.15; 19.6
Currently Selected:
Opetaia 1: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.