YouVersion Logo
Search Icon

Failauga 1

1
E Fa‘atauva‘a le Olaga
1O ‘upu nei a le Failauga, le atali‘i o Tavita, le tupu i Ierusalema.
2‘Ua fa‘apea mai le Failauga:
E matuā fa‘atauva‘a, e matuā fa‘atauva‘a; e fa‘atauva‘a mea uma lava.#Iopu 7.16; Sala 39.5; 144.4; Roma 8.20
3Se a se mea e maua e le tagata i ana galuega uma e tigā ai o ia i lalo o le lā?
4E mavae atu le tasi tupulaga, ‘ae sau le tasi tupulaga; a o le lalolagi e tumau lea e fa‘avavau.
5E alu a‘e fo‘i le lā, e alu ifo fo‘i le lā ma fa‘ata‘alise atu o ia i le mea na alu a‘e ai.
6E alu atu o ia i le itū i saute, e toe liliu mai fo‘i i le itū i matū. E agi le matagi ma liliu so‘o ma toe fo‘i le matagi i ona fa‘ata‘amiloga.
7O lo‘o tafe ifo vaitafe uma i le sami; ‘ae lē tumu ai le sami; o le mea e tafe mai ai vaitafe, e toe fo‘i atu o ia i ai.
8O mea uma e tele i ai galuega; e lē mafai e se tagata ‘ona fa‘amatalaina; e le malie mata i va‘ai, e le tūtūmu fo‘i taliga i fa‘alogo.#Fa‘ata 27.20
9Se a se mea ‘ua uma ‘ona tupu? O le mea lava lea e toe tupu.
Se a se mea ‘ua uma ‘ona faia? O le mea lava lea e toe faia;
‘ua leai lava se mea fou i lalo o le lā.
10E i ai ‘ea se mea e mafai ‘ona fai atu i ai, “‘Inā va‘ai mai ia, o le mea fou lenei?”
Sa i ai ia anamua i tausaga na muamua ‘iā i tatou.
11‘Ua lē manatua mea sa i ai anamua, o mea fo‘i o le a i ai i se aso,
o le a lē manatua ‘iā te i latou e mulimuli mai.#Fai 2.16; 9.5
O le Poto a le Failauga
12O a‘u nei o le Failauga, ‘ua fai a‘u ma tupu o Isaraelu i Ierusalema.#Kene 3.19; Fai 3.10 13‘Ua ‘ou fa‘asaga fo‘i lo‘u loto e sā‘ili ma su‘esu‘e ma le poto mea uma lava ‘ua faia i lalo o le lagi.
‘Ua tu‘uina mai lenei faiva faigatā e le Atua i tagata ‘ia latou galulue i ai. 14‘Ua ‘ou va‘ava‘ai i galuega uma ‘ua faia i lalo o le lā; fa‘auta fo‘i o mea fa‘atauva‘a uma lava ia ma le ‘ai i le matagi.#Fai 2.11; 4.4
15O le mea ‘ua pi‘opi‘o e lē mafa‘asa‘oina;
o le mea fo‘i ‘ua lē i ai e lē mafaitaulia.#Fai 2.11; 4.4
16Na ‘ou tautala ifo i lo‘u loto, ‘ua fa‘apea ifo, “Fa‘auta, ‘ua ‘ou fa‘ateleina lava le poto, o ē sili lava ‘iā te i latou uma sa pule i Ierusalema e muamua ‘iā te a‘u; e tele fo‘i le poto ma le iloa o mea na maua i lo‘u loto.”#1 Tu 4.29-31 17‘Ua ‘ou fa‘asaga fo‘i lo‘u loto ‘ia iloa le poto, ‘ia iloa fo‘i le fa‘alialia vale ma le valea; ‘ua ‘ou iloa ai fo‘i o le ‘ai i le matagi lea.
18Auā o le tele o le poto e tele ai le loto tigā;
o lē na te fa‘ateleina fo‘i le iloa o mea,
na te fa‘ateleina ai le fa‘anoanoa.#Fai 1.13-14; 2.12; 7.25

Currently Selected:

Failauga 1: RSCB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy