Jṉ. 21
21
Jesus ni unuiniamuri̱n wantintiukma
1Tipirias antumiaṉka kaanmatkari̱i̱n Jesus ni unuiniamuri̱n wantintiukmiayi. Jú̱nisaṉ ámiayi. 2Semuṉ Pítrusha Jímiampramu Tumassha Kariréanmaya̱ Natanaérsha Sepetéu uchirí̱sha tura chíkich jímiar unuiniamuri̱sha métek iruntrar pujuarmiayi. 3Semuṉ Pítrusha “Namakan nekaja̱i̱ naṉkíattsan wéajai” tímiayi. Chíkich mash “Iisha winittiaji” tiármiayi. Wéar uunt kanunam eṉkemprar nu kashi achitsuk tsawa̱rarmiayi. 4Káshik ai̱ṉ Jesus entsá kaanmatkari̱i̱n wantinkiamiayi tura ni unuiniamuri̱sha Jesusan nekaacharmiayi. 5Jesussha chichaak “Uchiru, ¿namak achikiurmek?” Tutai nisha “Atsá” tiármiayi. 6Takui̱ Jesus chichaak “Neka untsuurnumaani̱ aju̱ntkatarum. Nui̱ achiktatrume” tiármiayi.
Ni timia núnisaṉ túrawar namakan ti achikiar neka júsatniun tujintkiarmiayi. 7Núja̱i̱ṉkia Jesusa unuiniamuri̱ Jesus ti aneemia nu Pítrun chicharuk “Ii Úuntri̱nti.” Takui̱ Pítrusha áimiaku asa ni pushiri̱n entsar entsá iniaṉmiayi yukuak jeataj tusa. 8Chíkich unuiniamuri̱sha jeachat pujuiniachuk nekan japiki̱ kanuja̱i̱ kaanmatkanam jeawarmiayi. 9Kaanmatkanam jeawar ji kaí̱r ámanum namakan jiámun wáinkiarmiayi. Páṉnasha wáinkiarmiayi. 10Jesussha “Átum achikiurmena nuyá̱ jiátin itiatárum” tímiayi. 11Tutai Semuṉ Pítiur kanunam we nekan nekartiuk kaanmatak japiki̱ itiamiayi. Itiar namaknasha siantu seṉkuintitráis nekapmararmiayi. Ti untsurí áyat nekassha jáankachmiayi. 12Nuyá̱ Jesussha “Yurumáitiarum” tímiayi. Ni unuiniamuri̱sha “aya ii Uuntri̱ áminiaiti” tusar inintrústinian natsantiarmiayi. 13Nuyá̱ Jesus wajaki̱ páṉkan achik susar tura namaknasha súsarmiayi.
14Jesus jakamunmaya̱ nantaki̱ ju̱ja̱i̱ menaintiú ni unuiniamuri̱n wantintiukarmiayi.
Jesus Semuṉ Pítruja̱i̱ chichamu
15Nuyá̱ yurumáwar Jesus Semuṉ Pítrun aníak “Junasa uchirí̱ Semuṉká ¿ju̱ja̱i̱ naṉkaamas anentamek?” tútaisha Pítiur “Ee, Uuntá, wi wakerajme nu Ame nékame.” Jesussha “Nuiṉkia winia murikiur yamatskamchia nu ayurata” tímiayi. 16Ataksha aníak “Junasa uchirí̱ Semuṉká ¿Winia anentamek?” tutai Pítrusha “Ee, Uuntá, wi wakerajme nu Ame nékame” tímiayi. Jesussha “Winia murikiur wáinkiata” tímiayi. 17Nuyá̱ ataksha aníak “Junasa uchirí̱ Semuṉká ¿Winia wakerutamek?” Pítrusha menaintiú iníam kúntuts enentáimiar “Uuntá, ashí nékame. Wi wakerajme nu Ame nékame.” Jesussha “Winia murikiur ayurata. 18Maa, nekas tájame. Natsa asamka iwiarmampram ame wakeramunam wéuyame. Tura úuntach ajasmeka ame kunturam ayapá̱rakmin chíkich áentstamprattawai tura ame wétin nakitiam nui̱ juramkiartatui” tímiayi. 19Jesus núja̱i̱ṉkia Pítiur itiur jákatniuit nuna ujakmiayi. Tura núnisaṉ jakamtai Yusan shiir awajsattana nuna ujakmiayi. Nuyá̱ Pítrun “Nemartusta” tímiayi.
Juaṉ túrunatniun Pítiur Jesusan aniasma
20Pítrusha ayanmar chíkich unuiniamuri̱n Jesus ti anea nuna némarun wainkiamiayi. Kame nu unuiniamuka nuik Jesus jáatsa̱i̱ṉ yurumáiniakui “Uuntá, ¿ya surutmaktata?” timia núiti. 21Nincha Pítiur wainiak Jesusan aniasmiayi “Uuntá, ¿ju̱sha warí urukatniuit?” 22Jesussha aya̱k “Wi wakeraknaka iwiaaku pujai̱ṉ tátatjai tákuisha ¿warí itiurtama? Ámeka nemartusta” tímiayi. 23Núja̱i̱ṉkia nu unuiniamuri̱ jákashtatui tusa Yus shuarnum áujmatiarmiayi. Túrasha Jesus jákashtatui tíchamiayi antsu áyatik “Wi wakeraknaka iwiaaku pujai̱ṉ tátatjai tákuisha ¿warí itiurtama?” tímiayi. 24Wikia nú unuiniamuri̱ntjiai. Ju̱ papincha aaru asan mash nekasaiti tajai. Ashí shuarsha núnisaraṉ tuíniawai.
25Nu arantcha ju̱i̱ áarchamusha ti awai. Kame ashí aamka ti untsurí papí asa ashí nuṉkanam ikiuschamnia ainti.
Nuke atí.
Currently Selected:
Jṉ. 21: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.