Jṉ. 11
11
Rásaru jakamu
1Petanianam áishmaṉ ni naari̱ Rásaru jaa pujumiayi. Nu péprunam Marí ni kai̱ji̱a̱i̱ Marta pujuarmiayi. 2Nisha Rásaru umái̱ ármiayi. Nu Marisha ukunmaṉka kuṉkuinian sumak Jesusan kuer ni intiashí̱ji̱a̱i̱ japirmiayi. 3Tura Rásaru jaakui ni umái̱ Jesusan chichaman akuptuiniak “Uuntá, ame amikrum jaawai” tiármiayi. 4Jesussha nuna antuk chichaak “Tuke jakataj tusa jaatsui. Antsu Yusa kakarmari̱sha tura ni Uchirí̱ kakarmari̱sha jú̱ suṉkur tsuármanum paant atí tusa jaawai” tímiayi. 5Jesus Mártancha ni kaincha tura ni umái̱ Rásaruncha nekas aneemiayi. 6Túmaitiat Rásaru jaawai táman antukiat ni pujamunam jimiará tsawant pujusmiayi. 7Nuyá̱ ni unuiniamuri̱n “Ataksha Jutanam wetái” tímiayi. 8Tura ni unuiniamuri̱sha chicharainiak “Uuntá, nuiksha Israer shuar kayaja̱i̱ tukurmar mantamatai tícharmaka. ¿Nui̱ ataksha wétai tamek?” tiármiayi. 9Jesussha ju̱ métektaku chichaman chichaak “Tsawai̱kia páantchakait. Tsawái̱ wekaana nu paant asamtai tukumkashtatui. 10Tura kashi wekaana nusha kirit asamtai tukumkáttawai. Núnisaṉ Wi tuke pujakun winia takatrun takastiniaitjiai. Túraknasha itiurchatan wáinkiashtatjai.” 11Nuya̱sha Jesus ataksha chichaak “Ii amikri̱ Rásaru kanarai. Wi ishintiartatjai.” 12Tutai ni unuiniamuri̱ chicharainiak “Uuntá, aya kanarka nui̱ṉkia péṉker ajastatui” tiármiayi. 13Jesuska Rásaru jakamu nékayat “kanarai” tímiayi. Tura ni unuiniamuri̱ Rásaru kajinmakua áintsaṉ kanarai enentáimprarmiayi.
14Jesus nuikia ti paant chichaak “Rásaru yamaikia jakayi. 15Tura nui̱ pujuscha asan kúntuts pujatsjai. Jean túrattajna nu íisrum ti nekas enentáimtursattarme. Nuna nekaan shiir enentáimjiai. Wátsek, iyutai” tímiayi. 16Nuyá̱ Jímiampramu Tumas chíkich unuiniamuri̱ nui̱ armia nuna “Iisha weri Niji̱a̱i̱ métek jakatai” tímiayi.
Jaka nantaktinkia Jesus nérenniuiti
17Nui̱ taa Rásarun kuatru tsawant ikiusman wainkiamiayi. 18Petania pépruka Jerusaréṉnumia̱ menaintiú kirumitru áinis tíjiu̱chiti. 19Tuma asamtai untsurí Israer shuar Mártasha Marisha ni umái̱ jakamtai utkui atsaṉkrataj tusa weriarmiayi. 20Mártasha Jesus tíjiu̱ch ajasún nekáa iṉkiuṉtajtsa wémiayi. Antsu Marikia je̱á̱ pujumiayi. 21Tura Marta Jesusan iṉkiuṉ chicharuk “Uuntá, Ame pujakminkia winia umar jákacha̱a̱yi. 22Tura tuke nékajai ashí Yus seamna nuna súramui” tímiayi. 23Jesussha chichaak “Ame umai̱misha nantaktiatui” 24takui̱ Mártasha chichaak “Nekas ashí amúamunam jákaru nantaktin tsawantai̱ nantakiartatui. Nuna nékajai.” 25Tutai Jesus chichaak “Iwiaaku átinia nérentin asan Wikia iniantkiartiniaitjiai. Winia enentáimturna nuka jakasha nantaktiatui. 26Tura ashí iwiaaku pujana nusha Winia enentáimturuka túkeka jákashtatui. ¿Nu nekasaiti tu enentáimtamek?” tímiayi. 27Takui̱ Marta “Ee, Uuntá, Ámeka Yusa Uchirí̱ Kristu jú̱ nuṉkanam tátinia núitme” tímiayi.
Jesus Rásaru iwiarsamunam taa utmia
28Mártasha nuna ti, ni kai̱ Marin untsuk ú̱kaṉ chicharuk “Uunt ju̱i̱ taa untsurmawai.” 29Tutai Marisha nuna antuk wárik wajaki̱ Jesusa iyuttsa wémiayi. 30Jesussha péprunam jeatsuk Marta iṉkiuṉmanum pujumiayi. 31Marí wari wajaki̱ wématai Israer shuar nu je̱a̱nam atsaṉkrattsa pujuiniasha nuna iisar iwiarsamunam úttiasa wéatsuash tusa weriarmiayi. 32Marisha Jesus pujamunam jeá tikishmátar chichaak “Uuntá, Ame pujakminkia winia umar jákacha̱a̱yi.”
33Jesussha Marincha tura niji̱a̱i̱ útuncha wainiak wáitnentaimta asa tí kuntuts pujusmiayi. 34Tura “Tui̱ iwiarsamarum” tutai nisha “Uuntá, iitiá” tiármiayi. 35Jesussha útmiayi. 36Israer shuarsha “Ti aneatsuk” tiármiayi. 37Tura chíkich “Kusurú tsuáruchukait. Ni pujakuisha Rásaru jáka̱a̱yash” tiármiayi.
Rásaru iniantkímiu
38Jesussha tí kuntuts enentáimiar iwiarsamunam weantkamiayi. Nainnium asa paka taurma áuyayi. Tura kaya atutkamuyayi. 39Tura Jesus “Kaya jurustarum” takui̱ Rásaru umái̱ Marta chichaak “Uuntá, kuatru tsawant jákaiti. Meje̱a̱tsuk” tímiayi. 40Tura Jesus chichaak “Yus enentáimtakmeka Yusa kakarmari̱ wainkiattame tíchamkajam” tímiayi. 41Nuikia kayarí̱n uratiarmatai Jesus nayaimpinmaani̱ íimias chichaak “Aparu, Winia anturtakmin yumiṉsajme. 42Winiasha tuke anturtame tura ju̱ shuaran péṉker enentáimtikrataj tusan tajai. Ame akuptúkuitmena nuna nekarmawarti.” 43Nuna tinia kakaram untsúak “Rásaru jiinkitia” tímiayi. 44Núja̱i̱ṉkia penuarmartiuk jiinkimiayi. Yapinmasha jaanchji̱a̱i̱ ijiamuyayi. Tura Jesus “Atirtárum. Wekasati” tímiayi.
Jesus achiktin chicham jurusma
(Mat. 26:1-5; Mar. 14:1-2; Ruk. 22:1-2)
45Untsurí Israer shuar Marin nemariaru Jesus túramun iisar enentáimtusarmiayi. 46Tura chíkichkia Pariséunam wéar Jesus túramun ujakármiayi. 47Nuna antukar Pariséusha Yúsnan pujurniu úuntri̱sha ashí naamka uunt armia nuja̱i̱ iruntrar chicharainiak “¿Warí itiurkamniait? Ju̱ áishmaṉka aentsti tujintiamun ti túratsuk. 48Aya jú̱nik iniaiyakrinkia ashí shuar Nin enentáimtuschartatuak. Nuyá̱ Rúmanmaya̱ apach taar mesetan najanawartatui tura iin amutmakar Yusa Uunt Je̱e̱ncha emesrartatui” tiármiayi.
49Nú uwitin Kaipias Yúsnan pujurniu úuntri̱yayi. Nisha chichaak “Átumka nékatsrume. 50¿Ashí Israer shuar jákartin péṉkerkait. Antsu aya chikichik áishmaṉ jákatin péṉkerchakait?” tímiayi. 51Kaipiaska aya ní enentáimmiaja̱i̱ṉ tíchamiayi. Antsu nu uwitin Yúsnan pujurniu uuntri̱ asamtai Yus nuna enentáimtikramiayi. Núja̱i̱ṉkia Israer shuar Jesus jaruktinian ujakmiayi. 52Tura aya Israer shuarnakcha antsu níji̱a̱i̱sha ashí nuṉkanam Yus shuar ajasárun irurtajtsa jákatniuyi. 53Tuma asamtai nu tsawantini̱ṉ Israer shuara uuntri̱ Jesus maatai tusar áujmatsarmiayi.
54Nu asamtai Jesus paant wantiniak Israer shuarnum wekaichmiayi. Antsu Jutanmaya̱ jiinkí̱ Eprainnium atsá nuṉka tíjiu̱ch wémiayi. Tura nui̱ ni unuiniamuri̱ji̱a̱i̱ pujusmiayi.
55Israer shuara namperi̱ Paskua ishichik jatemsamtai untsurí shuar yajaya̱ péprunmaya̱ Jerusaréṉnum káunkarmiayi. Kame Paskua jeatsa̱i̱ṉ Muisais timia núnisaṉ ni aya̱shí̱sha enentái̱sha iwiarnarat tusa wakeriarmiayi. 56Jesusnasha e̱a̱k yujarmiayi. Tura Yusa Uunt Je̱e̱n pujusár nuamtak aniniaisar “¿Warí enentáimiam. Nampernum tatimpiash?” tiármiayi. 57Pariséusha tura Yúsnan pujurniu peṉkeri̱sha akupáiniak “Jesus pujá nekaamka ujatkata” tiármiayi. Jesusan sepunam eṉkeatai tusar tiármiayi.
Currently Selected:
Jṉ. 11: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.