3 Jṉ. 1
1
Kayu tí peṉker shuaraiti
1Wi Juaṉ Yus shuara uuntri̱ asan winia amikrun Kayun ju̱ papin áateajai. Wisha ti nekas aneajme. 2Aneamu yatsuru, Yusja̱i̱ péṉker wekaakum ame wakanim péṉker pujana núnisaṉ ame aya̱shmisha péṉker atí tusan Yusan áujtajme. 3Ame nekas chicham umirman shuar ju̱i̱ taar ujatkarmayi. Tura nuna antukan ti warasmajai. 4Yus shuar nekas chichaman umiiniakui imiá shiir enentáimtuiniajai.
5Aneamu yatsuru, chíkich Yus shuar tí peṉker yaya̱me. Kame yajaya̱ yujainia nusha nekas yaya̱me. Nu péṉkeraiti. 6Nu shuar ame nekas anenamun ju̱i̱ taar Yus shuar iruntramunam etserkarai. Ataksha irauwenakui atsumainiana nu susam shiir akupkarta. Péṉker wáinkiumka Yus shiir enentáimtikrattame. 7Nu shuar Jesukrístun takarsatai tusar wekainiawai. Túrawar Yus shuarcha ainia nuna kuítri̱ji̱a̱i̱ yurumátniun nakitrarmatai 8ii Yus shuartikia ni atsumainia nu ajamsatniuitji. Nekas chichaman etserainia nu, yaiṉkiartai tusar túratniuitji.
Tiútrepes yajauch túriniaiti
9Ashí Yus shuar árumna nuna papin akuptúkmajrume. Kame nékajai, Tiútrepes naṉkamantu enentáimtumak ii tájinia nuna umiktinian nakitiawai. 10Nu asamtai nui̱ jean ni yajauch túramun etsertuktatjai. Ni ántar ti áujmatuk tsanumprutmaji. Tura nu arantcha Yúsnan takainia nu irainiakui awayá̱iniatsui. Tura chíkich awayá̱taj tákuisha suritiawai. Tura nuyá̱ Yus shuarja̱i̱ iruntratniun surimiawai.
11Aneamu yatsuru, nu yajauch túramu jumamkiirap antsu péṉker túratarum. Péṉker túrinia nuka Yúsnaiti. Antsu tunáa túrinia nuka Yusan nékachuiti.
Timitriu péṉker túriniaiti
12Imiá nekas péṉker shuar asamtai ashí shuar Timitriun péṉker áujmatainiawai. Iisha núnisrik péṉker shuaraiti tákurin nekas tájinia nusha nékarme.
Amikmamu chicham
13Wi tí nukap títinian wakerajme. Túrasha ju̱ papinium mash áatrashtatjame 14wárik íitin asan. Nui̱ jean chichasmi.
15Shiir pujusta. Ju̱yá̱ amikrum amikmátmainiawai. Ii amikrí̱sha chikichik chikichik amikmatruata.
Currently Selected:
3 Jṉ. 1: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.