1
Na Tamasinga i votoa na mêriha mora
1I nago kere vê noga, matena na maveta ki mamênga, vi ge voravora me, na Tamasinga ki bani oga me. Ngaia ki bani oga me henia God, ma ki maratorana God. 2I nago kere vê noga na Tamasinga ka bani oga me henia God. 3Ma renia ngaia God ki hagavorara na ara ni marâ hato; ma na ara ni marâ hato ka vora me renia ma ngaia. 4I pasina na Tamasinga ki gâga na mêriha mora, ma na mêriha mora ngekê ki na marara, i mavesigi na obata na enoni. 5Na marara ki mave igê na roto, ma na roto hono ki asa, vi ge teharia.
6God ki hagatorangenia me ta na mane, i torea na tamasinga iana. Na atana ki no Joane. 7Ngaia ki râ me, tanga i tarohenia na marara tangara na enoni, hanana vi ngaira ka rongoa na tamasinga ma ka tongesuria. 8Na marara ngekê ki mareha vi ngaia marena. Ngaia ki râ me, hanana ma i tarohenia na marara. 9Na morana na marara, i mavesigi na obata na enoni hato, ki sugi râ me noga i maveta.
10Hoi, na Tamasinga ki oga i maveta. God ki bani hagavora na maveta renia ngaia. Henaka i manga ngekana, ma na enoni ka pe tongesuria. 11Ngaia ki râ me i pasina, ma na enoni i pasina ka kitenia. 12Ma tani ka obania ma ka tongesuria. Tahema ngaia ki katora, ka vora re na karena God. 13Ngaira ka vora re na karena God, mareha vi igê na tarana na enani kare ga hagavora igê na kareta, se vi igê na tarana na mane i aparara igê na karena, ma God ngaia marena hete kani katora, ka vora re na karena.
14Na Tamasinga ki vora enoni, ma ki oga i pasika. Igami kami rigia na raramohana, i hagabângenirerua na korohana raha teha ma na monariha renia God. Na raramohana ngekê o Vaemana kani vatea renia, suria ngaia ki na Kare gi tage togo iana.
15O Joane ki tarohenia, ma igê na ringena raha ki vi: “Ikê nga na ani, gê bani visia, matena gê vi, ‘Ngaia ki hagemuriê me, ma ngaia ki raha tehariê, suria ngaia ki bani oga me, matena inê kê mamênga ve voravora.’”
16Suria ngaia ki koro ngavê, ngaia ki takuigia hato ma ki korokoro tangagia tare ma tare ma. 17God ki nakagi na ramata tangara na enoni renia o Moise, ma ngaia ki hagabângenia na korohana ma na monariha tangagia renia o Jesu Kirisito. 18Mareha vê ta na enoni, vi ge bâsia God. Ngaia getea ma o Karena i tage, i maratorana God ma ki obahaku henia o Vaemana, ngaia ki hagagirarara na enoni renia.
Na tamasinga iana o Joane Batisita
(Mt 3.1-12; Mk 1.1-18; Lk 3.1-18)
19Na meraha iata na Siu, ga oga i Jerusaleme, ka hagatorangenira tani na mane ni vogasiha ma tani na mane ni hagarahenga tanga o Joane, hanana ga hagatea, ka vivi, “O ti kani igo?” 20O Joane ki aramira ototo râ, ma ki tamasi mataha i maata na enoni, ki vi: “Inê ki mareha vi na Mesaia.”
21Ngaira ka hagatea, ka vi: “Hoi, mo ti ma kani igo? O Elia vari kani igo?” O Joane ki arami, ki vi: “Mareha. Inê ki mareha.” Ngaira ka hagatea, ka vi: “Na poropete vari, ga naasia kani igo?” Ngaia ki arami, ki vi: “Mareha.” 22Ngaira ka vi: “Visia me tangagami, o ti kani igo, hanana mi hagarongora na enoni, ga hagatorangenigami. Ma igo, ko visigo maremu, vi o ti?”
23O Joane ki arami (igê na tamasinga iana na poropete o Isaia) ki vi: “Inê kê manga ikê:
‘Na ringena na enoni, i ngerenge igê na manihê, ki vivi:
Mu hagaotoa na tara tanga na Araha, ki arâ igê!’”
24Na Pariseo ka hagatorangenira na mane tora tamasinga. 25Ma ngaira ka hagatea o Joane, ka vi: “Manga vi igo, ma ko mareha vi na Mesaia, se vi o Elia, se vi na poropete, ga naasia, ma ki tanu hega, kanigo hagabatesimo?” 26Mo Joane ki arami, ki vi: “Inê kê hagabatesimo renia na ve; ma i pasimi ki gâga na ani, igamu kamu pe girara. 27Ngaia ki hagemuriê me, ma inê ka na enoni purua, i pe arariê, vi ve ruhasigi na santele iana.”
28Na marâ hato ngegana ka vora me i Betani i na apanena akê na ve i Jotano, i na agua, i hagabatesimo igê o Joane.
Na Karena Sipi iana God
29Igê na tangiana i muri o Joane ki bâsia râ o Jesu, i arâ me tanga, ma ki vi: “Bâ, na Karena Sipi iana God ikana, i bonotenigi na tasi iata na enoni i maveta! 30Ngaia nga nga na ani, gê bani tamasi renia i nago, matena gê vi, ‘Ta na mane i hagemuriê me, ngaia ki raha tehariê inê, suria ngaia ki bani oga me, matena inê kê mamênga, ve voravora.’ 31Inê kê pe girara, vi ngaia ki na ani ta na mane. Ma inê kê râ me, tanga gê hagabatesimo renia na ve, hanana gê hagagirarara na enoni i Isiraele renia ngaia.”
32O Joane ki tarohenia vikê, ki vi: “Inê kê bâsia na Higona Apu i maramara kuvê so me tenia na vavearo ma ki angaria. 33I nago inê ke pe girara, vi ngaia ki na ani ta na mane. Ma God, i hagatorangeniê, kê hagabatesimo renia na ve, ngaia kani vi tangê, ki vi, ‘Igo ko page bâsia na Higona Apu, i soso me i pasina ta na mane ma ki angaria. Ngaia nga ki na ani, i hagabatesimo renia na Higona Apu.’” 34O Joane ki vi: “Inê kê bani bâsia, ma be vi tangagamu, ngaia ki no Karena God.”
Na kariana hagenago o Jesu
35I na tangiana i muri o Joane ki oga nikâ i ngekana henirerua na kariana gi rua. 36Matena i bâsia o Jesu, i ritare, ngaia ki vi: “Bâ, na Karena Sipi iana God ikana!”
37Na kariana gi rua karu rongoa, i tamasi vikana, ma ngairerua karu râ suria o Jesu. 38O Jesu ki ahoro me, ki bâsirerua, ma ki hagate, ki vi: “Na ta kanimuru obania?” Ma ngairerua karu arami, karu vi: “Rabai, i he kanigo gâga igê?” (Na tamasinga “Rabai” ki vi “Mane ni Hagesuringa”.) 39Ngaia ki arami, ki vi: “Râ me, kamuru bâ.” (Na matena ngekana ki na ararina i pepe i he na arito.) Ngekana ngairerua karu takua ma ka râ igê na agua, i oga igê, ma karu oga henia igê na tangiana ngekana.
40Na hitangiterua, garu rongoa o Joane ma karu râ suria o Jesu ngegê, ngaia ki no Anterea, o vesina Simone Petero. 41O Anterea ki oto râ ma ki tarahua o Simone, o veogana, ma ki vi tanga, ki vi: “Igamirua kamuru tarahua na Mesaia.” (Na girarana na tamasinga ngekê ki vi “Kirisito”.) 42Ma ngaia ki merâ o Simone tanga o Jesu. O Jesu ki bâ rapurapu renia, ma ki vi: “Igo o Simone. O vaemamu o Joane. Ga page hêtamu vi o Kepa.” (Na girarana na tamasinga ngekê ki vi “Petero”, i vi “Na Hê.)
O Jesu ki unirerua o Pilipo mo Natanaele
43Na tangiana i muri o Jesu ki vi, vi arâ i Galilea. Ngaia ki tarahua o Pilipo, ma ki vi tanga, ki vi: “Gu takuê!” 44O Pilipo i pasina kani i Betesaita, na hinua garu oga igê o Anterea mo Petero. 45Mo Pilipo ki tarahua o Natanaele, ma ki vi tanga, ki vi: “Igami kami tarahua na ani, o Moise ki bani sege renia igê na Buka ni Ramata, ma na poropete ka bani sege nogata renia. Ngaia ki no Jesu. Na hinua iana kani i Nasarete. O vaemana ka no Josepo.” 46O Natanaele ki hagate, ki vi: “E, na marâ koro ta kani vora me i Nasarete?” O Pilipo ki arami, ki vi: “Râ me, ku bâ!”
47Matena o Jesu ki rigia râ o Natanaele, i arâ me, ngaia ki tamasi, ki vi: “Bâ, na Isiraelita monari kani ngaia! Ngaia ki na mane, i oto!” 48O Natanaele ki hagatea, ki vi: “Tanu hega kanigo aitangisiê, vi inê ki na mane vikê?” O Jesu ki arami, ki vi: “Inê kê bâsigo, go gâga i mamarugana na apinige na fiki, ma i hemuri ma o Pilipo ki kahu unigo.”
49O Natanaele ki arami, ki vi: “Rabai, igo ki no Karena God! Igo ki na ani, i marungia i Isiraele!” 50O Jesu ki arami, ki vi: “I hega, igo ko tongesuriê, suria ma vari vi inê kê vi tangago, vi inê ke bâsigo i mamarugana na apinige na fiki? Hoi, igo ko page bâsigi na tarani raha ngavê teharia na ani ngekana!” 51Ma ngaia ki vi tangara, ki vi: “I monari, gê vi tangagamu: igamu kamu page bâsia na vavearo, i tahataha, ma na angero iana God ka akê tenia o Karena Enoni ma ge soso tanga!”
Loading reference in secondary version...