NAHUMI 1
1
1Na Araha ki hagamarutea o Nahumi renia i Nineve i vota. I pasina i Elekosi.
Na Araha ki mangariaga tanga i Nineve
2Na Araha God ki kitenira na ataro.
Ngaia ki mangariaga tangara na ani,
ka obania viga gâga parea.
Ngaia ki hagaitangira na ani ga urapusia
ma igê na mangariaganiha iana
ngaia ki hagamesira na merongana.
3Na Araha ki piringiape ma ki haritagi
ma ki raramohaga hunia nikâ.
Ngaia ki hagaitangira tare
na ani na bagaparongata.
Na agua na Araha ki arâ igê,
ka ahi igê na roga raha.
Na agua, ga pupu igê na êgana,
ka ahi igê na maguara.
4Manga ngaia ma ki obania,
ki mamata na asi,
na ve ka voravora re na marave,
na go i bena i Basani ka meme,
na vapuna igê na hungani i Karamele ka maria,
na mahe i Libanone ka maugu.
5Ka gisigisi na barani i maana na Araha.
Na hungani ka rono.
Na ano ki angingi.
Na maveta ma na enoni hato igê ka tatata.
6Matena na Araha ki mangariaga,
ti ki girara i tahitahi?
Ti ki girara i tahitahi
tenia na mangariganiha iana,
i manga na anguruna na gi?
Na mangariaganiha iana
ki sikisiki manga na gi,
i menamenarigi na hê mora.
7Na Araha ki koro teha.
Ngaia ki anumasira na kariana,
matena i tarahura na bagabevoani.
Ngaia ki marupera na enoni,
ga rukuruku i pasina.
8Ngaia ki erasira ngavê na merongana
manga na maganuha raha.
Ngaia ki hagamesira na ani
ga pe tê viteana.
9Ai ni Nineve,
na ta kamu harikato renia tanga na Araha?
Ngaia ki page hagaerasigamu ngavê,
naka ma na enoni, i hagenago ki rêra pusia,
ki asa, vige tahi.
10Ngaia ki page sungigamu
mangagi na tone ma na go maria,
ga hakugi ma ka sungigi.
11I berarogami, igamu na ai ni Nineve,
ki bani ura me na mane, i takusigi na eraha,
ma ki harikato renia na Araha.
12Ma na Araha ki tamasi vikê
tangara na kariana na Isiraelita, ki vi:
“Naka ma na ai ni Asiria ka ramo ma ka rako,
inê be hagamesira ma be hagamagahurura.
I monari, kariaku,
inê kê hagamamasiagagamu.
Ma ki hato ve kato vikana nikâ.
13Inê be hatungia
na raramohata na ai ni Asiria tangagamu,
ma be musigi na varo tenigamu.”
14Ai ni Asiria,
na Araha ki tohe, ki vi vikê:
“Igamu kamu page mutemute.
Inê be tahuru barugigi na nunuta na harasimi,
ga oga i ruma ni vogasiha iami.
Inê be nanê renia na matahu tangagamu.
I ararigamu mu meme!”
15Ai ni Juta, bâ!
Na mane i totora tamasinga ki arâ me,
ikana igê na hungana,
ma ki merâ me na taroha koro.
Ngaia ki arâ me, hanana i hagarongo,
vi Nineve ki vota!
Mu hagahigasigi na tangiani raha ni rotu iami,
ma kamu hagamonarigi na suruha iami tanga God.
Na eratagana na maneraha ngekana
henira na mane ni me iana
ki asa, vige page teharia nikâ na apanena iami.
Ngaira hato ka meme hagetage.
Currently Selected:
NAHUMI 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific