MAREKO 1
1
Na ateateha iana o Joane Batisita
(Mt 3.1-12; Lk 3.1-18; Jn 1.19-28)
1Ikê ki na Taroha Koro renia o Jesu Kirisito, o Karena God. 2Na Taroha Koro ngekê ki haganega manga i bani segea o Isaia, na poropete:
“God ki vi,
‘E, ikê ki na mane, i torea na tamasinga iaku.
Inê kê hagatorangenia, ki nanago taramu,
hanana i hagarêa na tara taramu.’
3Ta na enoni ki ngere i na manihê, ki vi,
‘Mu hagarêa na tara tarana na Araha,
ma kamu hagaotoa na tara tanga,
ki arâ igê.’”
4Vikê o Joane ki ata igê na manihê, ki hagabatesimora na enoni, ma ki ateate tangara na enoni, ki vi: “Mu murisigegi na tasi iami, ma kamu urisi parongami, ma kamu batesimo, ma God ki page bonotenigi na tasi iami.” 5Na enoni hato i Jutea ma na enoni hato i Jerusaleme ka râ ma ka karinga o Joane. Ngaira ka visigi mataha na tasi iata, ma ngaia ki hagabatesimora igê na ve i Jotano.
6O Joane ki tuguni renia na tuguni varevarehuga na varehuna na kamelo, ma ki hogotenia i kâna na hogosina, ga tagarahia renia na gavona na puruka. Ngaia ki ngêngê na papangari ma na pirui. 7Ngaia ki ateate tangara na enoni, ki vi: “I page hagemuriê me na mane, i tehariê. I pe arariê, vi ve maroro so ma be ruhasigi na varo na buti iana. 8Inê kê hagabatesimogamu renia na ve, ma ngaia nga ki page hagabatesimogamu renia na Higona Apu.”
I batesimo o Jesu ma na heuhungiha tanga
(Mt 3.13, 4.11; Lk 3.21-22; 4.1-13)
9I na murina ma o Jesu i râ me tenia i Nasarete, na hinua i Galilea, o Joane ki hagabatesimoa i ve i Jotano. 10Pusina ma o Jesu ki hura akê me tenia na ve, ngaia ki rigia na vavearo, i avaga, ma na Higona Apu ki maramara kuvê ki so me ki angaria. 11Ma igê na vavearo God ki tamasi, ki vi: “Igo o Kareku hetakui. Inê kê vagevage bâraha renigo.”
12Ngekana na Higona Apu ki merâ igê na manihê. 13Ma ngaia ki oga i ngekana surigi na tangiani tangahuru ge he, ma Satana ki uhungia igê. I ngekana ka oga nikâ igê na marâ vasiga, ma na angero ka râ me, ma ka tamania.
O Jesu ki unira na mane ge he ga hugohugo
(Mt 4.12-22; Lk 4.14-15; 5.1-11)
14Matena ga bani hagatotongoa o Joane, o Jesu ki râ i Galilea, ma ki ateate igê renia na Taroha Koro iana God. 15Ngaia ki vi: “Na matena koro tanga na Arahanga iana God ngekê, i sugia, vi ge ramata igê. Mu murisigegi na tasi iami, mu urisi parongami, ma kamu tongesuria na Taroha Koro!”
16Matena o Jesu i ritare i one igê na Rano i Galilea, ngaia ki bâsirerua na mane, garu hugohugo, o Simone mo Anterea; garu hugohugo igê na rano. 17O Jesu ki vi tangarerua, ki vi: “Râ me, kamuru takuê, ma be hagesurigamurua, hanana muru page hugora na enoni.” 18Ngekana ngairerua karu panigi so ototo râ nga na hugo iaterua, ma karu takua o Jesu.
19Ngaia ki ura vê sisite, ma ki bâsirerua nikâ tani o hegoana, o Jakobo mo Joane, o karena o Sebeteo. Ngairerua karu oga igê na kere haka iata, ma karu hagarêgi na hugo iata. 20Pusina ma o Jesu i bâsirerua, ngaia ki unirerua, karu takua. Ngekana ngairerua karu panira so o Sebeteo, o vaematerua, ma na mane tagara, ma karu takua o Jesu.
Na mane i atatarogo
(Lk 4.31-37)
21Ngaira ka ata me igê na hinua i Kapenamu, ma na matena i râ me na Tangiana ni Mamaroha, o Jesu ki banu i ruma ni sukuru, ma ki haganega ki hagesurira igê na enoni. 22Na enoni ka rongoa, ma ka kone renia na tauhana, matena i hagesurira. Ngaia ki pe mangara na mane ni hagesuringa ni rotu. Ngaia ki hagesurira hete manga na maneraha, i ramata.
23I na matena ngekana ki banu me i ruma ni sukuru na mane, i atataroga, ma ki ngere, ki vi: 24“Jesu ni Nasarete, na ta kanigo katoa tangagami? Go râ me vari hanana vigo erasigami? Inê kê girarago, vi o ti kani igo: igo ka no vani God i hagatorangenigo.”
25Mo Jesu ki ramonia na ataro, ki vi: “Gu muni, ma ku hura vê tenia o vaniakê!” 26Na mane ki hagaata bâraha, ma na ataro era ki ngere i harana ma ki hura vê tenia na mane akê. 27Na enoni ka gasuga, ma ka hetamatamasi, ka vi: “E, na ta ikê? Na hagesuringa haoru vari? Na maneraha ni ramata ngekini! Bâ, ngaia ki bonasira na ataro era, ma ngaira ka rongoa na tamasinga iana!” 28Ma na enoni ka tokorenia garigari na taroha renia na Jesu surigi na ara ni hinua hato rihia i Galilea.
O Jesu ki hagakomagara na enoni rako
(Mt 8.14-17; Lk 4.28-41)
29Ngaira ka pania na ruma ni sukuru ma ka oto râ tanga na ruma iaterua o Simone mo Anterea. Mo Jakobo mo Joane karu râ henira. 30Ka hungâna o Simone ki maeha, ki matoro, ki tâ igê na bea, ma pusina ma o Jesu i ata i ngekana, ngaira ka hagarongoa renia. 31O Jesu ki râ tanga na gete, ki tê i rimana, ma ki okea aharaga, ki oga. Ma ki avogea na matoroha, ma ngaia ki hagamako tangara.
32I bungi, bevoana i bani su na arito, na enoni ka torera me tanga o Jesu na ani ga maeha ma na ani ga atataroga. 33Ma na enoni hato i hinua ka haku ka oga i maana na ruma. 34Mo Jesu ki hagakomagara rako na enoni tenigi na ara ni mera hato, ma ki paira rako era na ataro tenira. Ngaia ki pe nakara na ataro, hanana vige visigi tani na marâ, renia ngaira ka girara, vi o ti kani ngaia.
O Jesu ki ateate i Galilea
(Lk 4.42-44)
35I na tangiana i muri, igê na mahogotana, igê na kahuagana na tangiana, o Jesu ki rite ma ki angarota. Ngaia ki râ vê tenia na hinua ma ki râ i bemu, hanana i nunginungi igê. 36O Simone ma na tamana ka râ ka garia, 37ma na matena ga tarahua, ngaira ka hagarongoa, ka vi: “Na enoni hato ka bâbâ renigo.” 38Mo Jesu ki aramira, ki vi: “E râ tanga tani na hinua hagarangia ikê. Inê ki tuguhiê, vi gê ateate tangara nikâ, suria tahema inê kê râ me.” 39Ma ngekana ngaia ki râhia i Galilea hagenani, ki ateate i ruma ni sukuru ma ki paira na ataro.
O Jesu ki hagamavoa na enoni i asiahu
(Mt 8.1-4; Lk 5.12-16)
40Ta na mane, i asiahu, ki râ me tanga o Jesu, ki susure, ma ki nungia, vi tamania, ki vi: “Manga igo, ma ko obania, ma ko hagamavoê.” 41O Jesu ki takuia bâraha, ma ki gusia na rimana ki hataria, ma ki aramia, ki vi: “Inê kê obania, gê hagamavogo. U mavo! 42Ki parama na asiahu ma ki hato tenia na mane, ma ngaia ki mavo. 43Mo Jesu ki ramonia ma ki hagatorangenia vê, ki vi: 44“Gu rongo! Siana ko hagarongoa rârâ ta na enoni renia na tarana ngekê. Ma ko ototo râ nga hete i pasina na mane ni vogasiha, ma ko hagabângenigo maremu tanga, ki bâsigo. Ma hemuri ko kahu tagarenia na vogasiha iamu, manga i bani visia o Moise, hanana na enoni ka girara, vi igo ko mavo.”
45Ma na mane ki râ vê, ma ki haganega ki tokorenia na taroha surigi na ara ni hinua. Hoi, ngaia ki tamasi bâraha vê. Tahema na enoni ka bani girara ototo râ nga, matena i atata me igê o Jesu i hinua. Tahema ngaia ki oga ma igê na agua hariri tenigi na hinua, ma na enoni tenigi na ara ni hinua ka ama ni arâ ma me i pasina.
Currently Selected:
MAREKO 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific