JOELE 1
1
1Na Araha ki tamasia na rongoha ikê tanga o Joele, karena o Petuele.
Na enoni ka angisigi na mu iata
2Igamu na enoni raha mu rongo!
Ai ni Juta mu karinga!
I hega, na tarana manga ngekê
ki bani tarahugamu vari,
se i bani tarahura na uvarimi i nago?
3Mu hagarongora na karemi renia.
Ma ngaira ka page hagarongora nogata na kareta,
ma ngaira ka page hagarongora nogata na kareta.
4Na ruruha ma na ruruha ni pê
ka taheagani me
ma ka gahuigi na mu.
Tani na ruruha ki ngêngê kasigi, ki arâ
ma tani ki ngêngê hatungigi, ki mumuri.
5Mu rite ma kamu angi,
igamu na enoni mu tono tare na vaini.
Ki rugurugu na obami,
igamu na enoni, i ruguhigamu.
Na vaini ki hato ngavê tenigamu,
suria na mu ni vaini ka matarotaro ngavê.
6Na ruruha raha ni pê ka sinoa na agua.
Ngaira ka raramohaga ma ka rako teha ngavê.
Na rivota ka masi manga na rivona na laione.
7Ngaira ka erasigi na mu ni vaini iaka,
ma ka ngasigi na apinige na olive iaka.
Ngaira ka ngê sibisibigi
ma na mahuhugani ka tâ i ano,
ma na arani ka oga ma na gonarini.
8Igamu na enoni, mu angiangi,
manga na kere gete i angiangi maramara,
renia i me na mane vi auragia.
9Mane ni vogasiha, mu angiangi,
suria ga hato hagetage na ngêra ma na vaini
tanga na vogasiha i Ruma ni Rotu.
Ki bara tangagamu, vigamu vogasia na Araha.
10Na mu ka matarotaro.
Na mako ki avagavaga.
Na ngêra ka mêgu ma ka tarataraga.
Na guani na vaini ka mêgu ma ka mamata.
Na apinige na olive ka maria.
11Mu angiangi,
igamu na enoni mu tagara i mu!
Mu angiangi,
igamu na enoni mu tagarahigi na pariki ni vaini!
Ga tara hato vê na êhi ma na hana,
ma na ara ni ngêra hato ka bani magahuru.
12Na varo ni vaini ma na apinige ni olive
ka maria hato.
Na apinige hato ni ngêra ka bani turi
ma ka me.
Na enoni hato ka oga ruruhitaga.
13Mane ni vogasiha, mu angiangi
ma kamu katoa na enangiha.
Mu bêbanu i Ruma ni Rotu
ma kamu katoa na enangiha
suria na bungiana hagenani.
Ga hato hagetage na ngêra ma na vaini,
vigamu vogasia God renigi.
14Mu bonasira na enoni, ka harihari.
Mu hagahakura na enoni.
Mu unira me haku i Ruma ni Rotu,
na enoni raha ma na enoni purua,
na enoni hato i Jutea.
Mu avarasia na Araha God iami.
15Na tangiana iana na Araha
ki hagarangi me noga:
na tangiana God raramohaga hunia
ki migirâ me igê na hagaitangiha.
Na tangiana ngekana ki era ngavê!
16Na ngêra iaka ka magahuru i maaka.
Ma na ta ke katoa?
Igia ki hato, vige page vagevage,
se vige page obakoro nikâ,
matena ga rahesia God i Ruma ni Rotu.
17Na marâ, ga hasigi,
ka meme igê na mako avagavaga.
Na bea ni ngêra ka baguru,
ma na ruma ni harisi
ka baguru ma ka ahoge.
18Na puruka ka angiangi, suria ga magê.
Ki hato hagetage na go tenira.
Ma na totoha ni sipi ka mamasiaga nogata.
19Araha, inê kê avarasigo.
Na pariki ni go ma na apinige
ka maria hato, manga i ngêgi na gi.
20Na marâ vasiga i bemu ka avarasigo nogata,
suria ga mamata tenira na ve
ma na go ka maria.
Currently Selected:
JOELE 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific