YouVersion Logo
Search Icon

TAGARAHA IATA NA APOSOTOLO 1

1
O Jesu ki surua na Higona Apu
1Teopilo koro. Inê kê bani segea na buka gi tage iaku renigi na marâ hato, i katogi o Jesu, ma ki hagesurira na enoni renigi, i haganega igê na tangiana, i anega igê na tagaraha iana, 2mataro me na tangiana, i aporo i pasina God Vaemana. Na matena i mamênga, vi ge aporo, ngaia ki hagesurira na mane, i bani atera ka vora re na aposotolo iana, igê na raramohana na Higona Apu. 3I na murina i me, ngaia ki vora hagarako tangara na kariana surigi na tangiani tangahuru ge he. Renigi na tarani ngegana na enoni ka girara bâkoro, vi ngaia ki mêri aporo, ma ki mêri monari. Ngaira ka bâsia, ma ngaia ki meratamasi renia na Arahanga iana God. 4Ma na matena i gâga mênga henira, ngaia ki bonasira, ki vi: “Siana kamu arâ pania i Jerusaleme, mu gâga nga, ma kamu naasia na votovoto, i bani surua o Vaemaku, gê bani hagarongogamu renia. 5Renia o Joane ki hagabatesimora na enoni renia na ve, ma ki sugia ma, vi igamu kamu batesimo renia na Higona Apu.”
O Jesu ki aporo i pasina God Vaemana
6Matena na aposotolo mo Jesu ka oga haku, na aposotolo ka hagatea, ka vi: “Araha, i na matena i ngekê vari igo ko page kasira na Ai ni Isiraele, ka araha aporo?”
7O Jesu ki aramira, ki vi: “O Vaemaku, ngaia getea ma, ki giraragi na bevoani ma na tangiani, ma igamu, ki pe ararigamu, vi gamu giraragi. 8Ma igamu kamu page raramohaga, matena na Higona Apu ki angarigamu, ma igamu kamu page taroheniê tangara na enoni i Jerusaleme, ma i Jutea hagenani me Samaria, ma tangara na enoni i na agua getigi i maveta.” 9I vi hato vikê, ma ngaia ki aporo i pasina God Vaemana, matena ngaira ka boretenia, ma na vaha ki pinihia tenira.
10Matena ngaia ki râ vê tenira, ma na matena ngaira ka bâbâ kê mênga i vavearo, ki parama, ma karu vora me na mane, garu tuguni siki, ma karu ura henira. 11Ma karu vi: “Mane ni Galilea, na ta kanimu ura kamu bâbâ kê renia i vavearo? O Jesu, ngaia ki bani aporo i pasina God Vaemana panigamu, ma ki page aporo me, tagenana ma, manga mu bâsia, i aporo i pasina God Vaemana.”
O Matia ki urusia o Juta
12Ma na aposotolo ka râ pania na Hungana ni Olive, ma ka aporo i Jerusaleme. Na Hungana ni Olive ki hagarangia na hinua raha. 13Ngaira ka banu i Jerusaleme, ma ka akê igê na kiboru i haha i ruma, ga oga igê. Ngaira ngegê ka no Petero, mo Joane, mo Jakobo, mo Anterea, o Pilipo mo Toma, o Batolomeo mo Mateo, o Jakobo o karena o Alapeo, o Simone na mane ramo, mo Juta o karena o Jakobo. 14Ngaira hato ka hakuhaku, ma ka nunginungi haku hagarako henira na gete, ma henia ka Maria kenana o Jesu, ma henira na goana o Jesu.
15Ma na matena ngekana na enoni, ga tongesuri, ka hekarigi. Ngaira hato ka vora na tangarê gi tage matara na tangahuru gi rua vari. Mo Petero ki aharaga, ma ki tamasi, ki vi: 16“Goaku, na segesegeha i na Buka Apuna ki bani monari, renia na Higona Apu ki bani tamasi i harana o Tavite renia o Juta, i hagaotora na mane, ga rakua o Jesu. 17O Juta, ngaia ki na tamamami, suria o Jesu ki bani atea, ki tamanigami igê na tagaraha iamami.”
18(O Juta ki vuria na mako renigi na haga na meni na parongana, i era. Ma i ngekana ngaia ki vota, ki raboa na obana, ma ki hura na angena, ma ki me. 19Na Ai ni Jerusaleme ka rongoa. Tahema igê na tamasinga iata ka hêtana na mako ngekana, vi Akeletama. Na girarana na tamasinga ngekê ki vi “Mako na Gapu”.)
20O Petero ki tamasi, ki vi: “Tani na tamasinga igê na buka ni Ki Apuna ki vi,
‘I araria, i baguru na ruma iana.
Ki araria, i hihiruga.’
Ma na Buka Apuna ki vi nikâ,
‘Ta na enoni ki araria,
i urusia igê na tagaraha iana.’
21-22“Tahema ki tuguhia ta na mane, vi bêbanu me henigami, hanana i tarohenia na mêriha aporo iana na Araha o Jesu tangara na enoni. I tuguhia ta na hitangita na mane, ga oga henigami suria na bevoana hagenani, matena na Araha o Jesu i arârâ henigami, haganega tenia na matena o Joane i ateate renia na batesimo iana, mataro me na tangiana o Jesu i aporo i pasina Vaemana panigia.”
23Vikana ngaira ka takusirerua na vererua na mane: o Josepo, ga hêtana vi o Basabasi (ma tatana nikâ ka hêtana vi o Jusito), mo Matia. 24Ma ngaira ka nungi vikê: “Araha, igo ko giraragi na parongata na enoni hato. Tahema, Araha, gu hagabâsigami, renia vi o ti na hitangiterua na vererua ngegana kani go bani atea, 25hanana vi tanua na tagaraha na aposotolo, ma ki urusia o Juta, renia o Juta ki pania na tagaraha ikê, ma ki râ tanga na agua, i araria.” 26Ma hemuri ngaira ka kasi pepa renirerua, hanana vi o ti kani page rêrâ. Ma na atana na mane, i ura, ngaia ka no Matia. Ma ngaia ki hagatonganira na aposotolo tangahuru matara ki tage.

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy