1 SAMUELE 1
1
I vora o Samuele
1I hinua i Rama igê na hungani i Eparaimi ki oga igê ta na mane o Elekana na atana. Ngaia ki na raraha iana o Eparaimi. Ngaia ki no karena o Jerogama ma o Elihu o virana. Ngaia ki na hitangita na ahemata iana o Togu. Na ahemata ngekê kani tapanena na hagosini nuni iana o Supu. 2O Elekana ki êragirerua na gete gi rua: ka Hana ma ka Penina. Ka Penina ki apara kare ma ka Hana ki mareha. 3I na ara ni harisi o Elekana ki arâ tenia i Rama tanga i Silo, hanana i rahesia ma ki vogasia igê na Araha God raramohaga hunia. I Silo karu oga igê o Gopini mo Pinegasi. Ngairerua ka no karena o Eli ma karu vora re na mane ni vogasiha iana na Araha. 4I na ara ni mateni o Elekana ki susu tanga na Araha, ngaia ki meratongani ka Penina ma na karena renigi na ganiani. 5Ma ngaia ki vatea ka Hana na mavorona koro ngavê na ganiana, suria ngaia ki takuia teha ngavê, henaka na Araha ki pe naka ke apara kare. 6Ka Penina ki ruhia ka Hana. Ngaia ki hagamamasiaga ma ki hagamakia, suria na Araha ki pe naka ke apara kare. 7Ngaia ki bani kato me vikana surigi na harisi ma na harisi. I na ara ni matena garu râ tanga na ruma iana na Araha, ka Penina ki hagaera obana ngavê tare ka Hana. Vikana ka Hana ki angiangi ma ki usisi vige ngêngê. 8O Elekana o vaniana ki hagatea tare, ki vivi: “Ka Hana, i hega kanigo angiangi? Tanu hega kanigo pe ngêngê? Tanu hega kani rugurugu tare na obamu? I hega inê kê pe tangago vari teharira manga vigu aparara na tangahuri kare mane?”
9-10I ta na tangiana i murina ga ngê hato i ruma iana na Araha i Silo, ka Hana ki aharaga. Ngaia ki era ngavê na obana ma ki angi ngavê, matena i nunginungi tanga na Araha. I na matena ngekana o Eli na mane ni vogasiha ki oga so igê na atohana hagarangia na maani ruma. 11Ka Hana ki nungi ki suru tanga na Araha, ki vi: “Araha raramohaga hunigo, gu takuiê na kariamu. Gu takusigi na mamasiaganiha iaku. Gu takiê. Siana ko kasi reniê! Manga go nakê kê apara kare mane, inê kê suru, vi inê kê page tagarenia tangago, ki voravora re na animu suria na ogaha iana hagenani ma ki apêpu na varehuna.”
12Ka Hana ki ama ni nunginungi nga arihu me noga tanga na Araha. O Eli ki hahutugigi na gaviharana. 13Ka Hana ki nunginungi munimuni. Na gaviharana ma ki manamunamu ma ki mareha vige rongoa. Tahema o Eli ki takusia ma vi ka Hana ki ruguhia na tonoha. 14Ngaia ki vi tanga, ki vi: “Inê ki usi na apeku renigo i ruguhigo na tonoha! Siana ko totono nikâ. Gu râ ma ku mêru, hanana ge koro aporo na takoha iamu.”
15Ka Hana ki arami, ki vi: “Mareha. Inê ki pe ruguhiê na tonoha! Inê kê pe tono rârâ. Na aitangihaku ki era ngavê. Inê kê nunginungi. Inê kê hagarongoa na Araha renigi na mamasiaganiha hato iaku. 16Siana ko takusia vi na gete era kani inê. Inê kê bani nunginungi me vikana, suria i era ngavê na obaku.”
17O Eli ki vi: “Na marapeha ke angarigo ma na God iata na Isiraelita ke aganaria na avarasiha iamu.”
18Ka Hana ki arami, ki vi: “Gê visigo koro renia na korohamu tangê.” Hemuri ngaia ki aharaga vê ki râ ki ngê ma ki obakoro aporo.
19Ki tangi me ma o Elekana ma na ahemata iana ka bani rite. Ngaira ka rahesia na Araha ma ka kahu aporo i Rama. O Elekana ki memêru kaniana ma na Araha ki aganaria na nunginungiha iana ka Hana. 20Ngaia ki atui ma ki obara ma ki apara na kare mane. Ngaia ki hêtana vi o Samuele, suria i nungia tenia na Araha.
21I râ me nikâ na matena tangara o Elekana ma na ahemata iana, hanana ga râ i Silo ka vogasia igê na Araha manga i na ara ni harisi. Ma o Elekana ki râ nikâ, hanana i hagamonaria na suruha ni vogasiha iana. 22Ma na matena ngekana ka Hana ki pe râ. Ngaia ki vi tanga o vaniana, ki vi: “Matena i kasikasi susu hato na kare, inê kê page torea tanga na ruma iana na Araha, hanana i gâga nga vê i ngekana suria na ogaha iana hagenani.”
23O Elekana ki arami, ki vi: “I koro ma. Go katoa na tarana go takusia vi i koro. Hoi, gu oga so ma, mataro me ki kasikasi susu na kare. Na Araha ke hagamonaria na suruha iamu.” Vikê ka Hana ki oga so ma, ma ki marupea o karena.
24Matena i kasi susu hato na kare, ka Hana ki merâ i Silo. Ngaia ki torea nikâ na puruka mane i tonga na harisi gi oru iana henigi na 20 kilo na koni ma na anga ga tagarahia renia na gavona na puruka, i vunu renia na vaini. Henaka o Samuele ki sisite mênga, ma ka Hana ki merâ tanga na ruma iana na Araha i Silo. 25Matena ga nahuia hato na puruka mane, ngaira ka merâ na kare tanga o Eli. 26Ka Hana ki vi tanga o Eli, ki vi: “Gu nakê be hagatego! I hega, igo vari ko bâgirarê mênga? Inê ka na gete go bâsiê, gê ura ikê kê nunginungi ea. 27Inê kê nungia na kare ikê tenia na Araha. Ma ngaia ki aganaria na nunginungiha iaku. 28Hoita, inê kê tagarenia tanga na Araha. Ngaia ki na anina na Araha suria na ogaha iana hagenani”
Hemuri ngaira ka rahesia na Araha i ngekana
Currently Selected:
1 SAMUELE 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific