1 JOANE 1
1
Na Tamasinga na mêriha mora
1Igami kami sege tangagamu renia na Tamasinga na mêriha, i bani goga me tenia na haganegana. Igami kami bani rongoa, ma kami bani bâsia, renigi na maamami maremami. I monari, igami kami bani bâsia, ma kami bani hataria renigi na rimamami maremami. 2Igami kami bâsia na mauriha ngekana, matena i vora me. Tahema igami kami tamasi renia, ma kami hagarongogamu renia na mêriha mora ma tarema, i oga henia God Vaemana, ma ki vora i pasimami. 3Igami kami bani bâsia, megami kami bani rongoa, ma kami hagarongogamu renia nikâ, hanana vi gamu hakunigami, suria igami ka na kariaterua na Vaemana mo Jesu Kirisito, o Karena. 4Tahema igami kami segea na tarana ngekê tangagamu, hanana i hagamanava obamami ngavê.
God ki na marara mora
5Hoi, na tamasinga, mi rongoa tenia o Jesu Kirisito, ma kami hagarongogamu renia kani ikê: God ki na marara, ma na roto hono ki mareha i pasina. Mareha vê! 6Tahema, manga vi igia, ma ka visigia mareka, vi na kariana God, matena igia ka mauri igê na roto hono, igia ka hagaparu, ma ki pe oto na parongaka. 7Ma ki manga igia, ma ka mauri igê na marara, tagenana manga God i oga igê na marara, igia ka hetakuiheri, ma na gapuna o Jesu, o Karena, ki hagamagahurugi râ na ara ni tasi iaka.
8Manga vi igia, ma ka visia, vi na tasi ki mareha igê na aitangihaka, igia ka hagaparugia mareka, ma ka pe nahunia na monariha iana God. 9Ma ki manga igia, ma ka visigi mataha na tasi iaka tanga God, ngaia ki bonotenigi na tasi iaka, ma ki hagamagahurugi râ na ara ni tasi iaka. Igia ka girara ga hagêguritogo renia God, suria ngaia ki hagamonaria tare na tamasinga iana, ma na parongana ki koro ma ki oto tare. 10Manga vi igia, ma ka visia, vi i asa iaka, vi ge tasi, igia ka haritohea God, ma ka mareha vi ge paronga suria na tamasinga iana.
Currently Selected:
1 JOANE 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific