Proverbios 6
6
Nqataxac da qaivita'a ca saishet da qaipaguelec
1'Am ỹalec, da 'anañan da 'auavigaqtaxaalec ca 'anauochaxaua
huo'otaq da 'anañan da 'autauan ca ỹaqa'a,
2nache maiche 'am da 'anañan da 'angui aca nqoina,
qataq maiche 'am loxonec naua maiche 'ara'aqtaqa.
3Qaq da yaqto' 'am huesoueeguesop damaye, 'am ỹalec,
nache 'auo'ot da 'eeta': 'Axanec da 'ana'amqaanaxac,
nache 'anqo'ona camaye nache 'auỹaxanot da 'am isheeten,
cha'aye mashe qoueto'oto naua lhuaxaye que'eca 'arỹa.
4Saishet qome da 'auo'ochetañi,
qataq saishet da cara'ac da 'anmatec,
5'auatauec qome qoneta'am aca ñi'imshe da dataueeguesop ca 'ipiaxaic,
'auatauec qome qoneta'am ca qoỹo da dataueeguesop aca nqoina.
Da qanhuogaxa ca hualaic
6'Am hualaic, 'anqo'ona qome da 'aumeten ca qaguesaq,
nache 'aumeteeta ca ỹo'ottacpi nache 'aue'enaxat camaye,
7cha'aye camayepi na'aictoxo' da qaica ca na'aco'
qataq qaica ca lataxala' da ỹamaqtac camayepi,
8qalaxaye iqataxanai' na aloq da nvi' na napaxaỹaxa,
qataq da ivita da qanqat na ala na nañiguishec,
nache choche ỹaỹamaxat na aloq.
9¡'Am hualaic, nache a'aye qome da 'aro'ochaxa!
¡Nache a'aye da choche 'annaatai'!
10Cha'aye da cara'acolec da 'auo'oche,
qataq 'ananaqteguiñi na 'aro'ochaxa,
qataq da 'ansoxoreuo naua 'arhua'q
da yaqto' 'onaxaic na 'aro'ochaxa,
11nache 'am naỹa'a ca nachoxoyec da 'am icogaxanapec,
'eeta'am ca shiỹaxaua queuoxoic maye na'atchigui ca lo'ogoxonaxat.
Da 'eetec da lataxac ca qauemaic
12Cam qauemaic qataq 'etaxaloxoic,
camaye ỹa'axattac na shepegaxanaxacpi,
13qataq naquiaxaatai'salo naqa'en naua la'ai'te,
da huo'o ye ỹecapega qalaq huota'aisalo
naua lapia'ate qataq naua llaxaata,
14da lhuennataxa qalaq huetaigui da ñe'etaxaloxo,
qataq nache lhuennataxa da ỹo'ot na qauemsat qataq da loquiaxac.
15Qaq ỹoqo'oye nque'elaxatta qome da nvita ca nlaguiñi naqa'en,
'eeta'am da choche nlouec qataq ỹamaxa't naua la'ai'te nache nlaguiñi,
huaña nache qaica ca ishet da ỹaỹamaxaañi.
Nam saisheteguetpi Ñim Nataxala'
16Huo'oi naua seis lataxaco maye saishetegueta Ñim Nataxala',
qataq siete naua ỹataqta sa ihuoonegueta Ñimaye:
17na'ai'te maye na'amqaanaxaiqa,
qataq nachaxat maye shepecaic,
qataq nhua'q maye ỹalaua't ca qaica ca ỹasouaxat,
18qataq nhuennataxac maye lapaxañi da ỹo'ot na ñe'etaxaloxosat,
qataq napia'ate maye nqalgoqta'a da ỹo'ot ca qauem,
19qataq ca saq'en ca ỹa'axat, qataq tenataxanaxaic,
qataq deloguiỹa't naqa'en ca nqaỹañecpi.
Da qaivitaqtaxanot da nauañe' aca sa nhua
20'Am ỹalec, ỹataqta 'aualaxagueta qome naua lamaxasoxonaxaco ca 'arta'a,
qataq saishet da qoca'aisalo naua lapaxaguenataxanaxaco aca 'arate'e.
21Ỹataqta 'auachaiguilo qome añi 'arquiyaqte,
qataq ỹataqta 'anqolaachiguiñalo qome,
22yaqto' 'am ỹaueca'agueta da huo'o ca 'aigue,
qataq 'am npaxattaleguete da 'auo'ocheta,
qataq da 'anlouec nache 'am detaqtacoto.
23Cha'aye naua namaxasoxonaxaco nachenaua naua ncoỹaraxanaxaqui',
qataq naua napaxaguenataxanaxaco naamaye 'ettaiguilo,
qataq naua ntelaqtaxanaxaco nachenaua naua ỹo'o't da llec da achaalataxac.
24'Am ntelaqna'agueta qome aca 'alo qauem da lataxac,
qataq naua amai' la'aqtaqa aca ỹaqa'a 'alo.
25Saishet qome da 'auqopitta'a da lyacỹaxac acamaye,
qataq sa 'anañaneguet da 'am loxonec da lmeenaxanaxac.
26Cha'aye aca quisheguetaxai choche quetague' da ilotaique ca aloq,
aca lauañe' ca sa lhua qalaq ca'atteguiñi' ca ỹale maye huo'o naqye.
27Cha'aye ca ỹachalec ana ltogue ca norec,
qalaq camaye ỹavi'c caua alogo.
28Qataq ca queuoỹapigui' quetangui aca poqopi,
qalaq camaye ỹavi'c naua lapia'ate.
29Qataq ca lauañe' aca ỹaqa'a 'alo,
qalaq camaye saishet da saqca ca nhuaxanaguec.
30Cha'aye saishet da qaỹo'otan ca cachaxaic,
da decache souaxat na lqouaxa,
31qaq da qaỹauanalec da decachetac,
nache camaye iuen da siete da ỹe'eguelaxalec da isheeten ca lcachaxat,
qataq ivira'a da ỹanec 'enauac ca lalamaxatpi.
32Qalaxaye ca lauatapiguiñi' aca ỹaqa'a 'alo
camaye ỹataqta qaica ca laỹaanataxanaxac.
¡Qaq cam ỹo'ottac de'era, camaye nlaxattapiguiñi da maiche nachaalataxac.
33Qaq camaye maiche talec ca nhuaxanaguec qataq ca nsheunaguec,
qataq qaica ca ishet da ỹapalaxat da ne'enaguec.
34Cha'aye ca ỹale ca'alaxanaxaic 'eeta'am ca norec,
sa dechoxonnataxan da ivita da ipalaique ca lvi',
35qataq saishet da ỹaconeguet ca nsheetenaguec,
qataq saishet da nmooñi naqa'en da lalemataic ca qalota nmepi.
Currently Selected:
Proverbios 6: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.