Proverbios 22
22
1Ỹataqta ỹactec da huo'o naq naigui da no'on
na'aqtaguec ca shiỹaxaua qaq saq 'ena'am ca nsallaxa,
qataq da no'on da na'aqtaguec ca shiỹaxaua saq 'ena'am ca qalota oro qataq plata.
2Ca sallaxanec qataq ca choxoraq caamaye nache 'eeta'a't,
cha'aye caamaye maiche lo'onataqa Ñim Nataxala'.
3Ca huo'o na ỹaỹaten da ila'a ca lchec
nache naneltaxaneguet,
qaq ca qaica ca ỹaỹaanapec qalaq nache queta
ime qaq maiche nque'etaxangui camaye.
4Da qaica ca na'amaqchec qataq da huo'o naq 'enec qanqa'en Ñim Nataxala',
nachera da chegaqaigui da nsallaxa,
ño'oxoyec qataq da nca'alaxa.
5Na qauemaicpi qalaq huetangui ca llec ana ỹaxat qataq ana nqoinapi,
qaq ca ntela'a da nachaalataxac qalaq ishet da dashelec anamayepi.
6'Auapaxaguenec qome ca nogotolec da no'on ñecỹaxac,
yaqto' qom ivita da ỹa'axaiqui nache saishet da ỹaxanec.
7Ca sallaxanec ỹo'ot da lalamaxat na choxoraqpi,
qaq ca 'aalaxanaxaic
qalaq nache na'aco' cam ỹa'aalaxanaxan camaye.
8Ca ỹaañi ca qauem qalaq maiche nqat ca chegaqaigui camaye,
nache Ñim Nataxala' irolec ca maiche lhuaxanaxanaxat da nlaxaañi camaye.
9Ca choxonnataxanaxaic, camaye huo'o da nchoxonnataguec,
cha'aye da huo'o na aloq qalaq nhuaata'ai' na choxoraqpi.
10'auamaqauec qome ca sancherapec
yaqto' imeuo da loquiaxac,
qataq imeuo na cotaxacpi qataq da nsheunaxanaxac.
11Ca nta'a ỹauotec ca huesota da lquiyaqteỹaxac,
qataq ishet da nauochaxaua ca no'o'n naua la'aqtaqa.
12Ñim Nataxala' ỹataqta nauaatalec da naỹaanec,
qalaxaye saipaigui naqa'en na la'aqtacpi ca shepecaic.
13Ca hualaic da nshetaique da sa do'onataxan,
nache 'eeta':
«Huo'o ñi llon netangui na nqa'aic ishet qome da aỹem ỹalauat.»
14Naua la'aqtaqa aca 'alo maye lauañi' ca sa lhua,
'eeta'ama aca ỹataqta qaỹoqchiguingui nshere,
aca nshere maye Ñim Nataxala' tangui naqa'en ca ỹauo'o da nhuaxanaguec.
15Da nhualoxonaxac nachera da huaqta'agueta
naua lhuennataxaco na nsoxoppi,
qalaxaye da qanqateua'a damaye
nache qairolec ca nhuaxanaxanaxat.
16Ca nhuo' na choxoraqpi da yaqto' nquictec da lsallaxa,
huo'otaq ca ỹachet ca sallaxanec,
nache camaye taỹa'a da choxoraq.
Naua treinta la'aqtaqa so ỹaanaxanaxaicpi
17Ỹataqta 'ana'axaỹaxanalo qome naua la'aqtaqa na ỹaanaxanaxaicpi,
qataq 'aulotelec de'era 'am sapaxaguenec.
18Cha'aye damaye ỹataqta 'onaxaic da 'auachaigui da 'antoonaxac,
yaqto' ishet da 'avi'eguelaqtalec da 'anasaqtauec.
19Qaq nagui 'am sapaxaguenec damaye,
yaqto' ishet da 'aupi'iỹa'a Ñim Nataxala'.
20Qaq aỹem, 'am sanema naua treinta ỹiyigui'she na'aqtaqa,
maye huetaiguilo na nqataxacpi qataq nauattonaxanaxacpi
21da yaqto' 'am sapaxaguenec da 'auauatto'n naua 'eesora na'aqtaqa,
yaqto' ishet da ỹataqtegue ca 'arasataxac da huo'o ca 'am inat.
22Saishet da 'aue'enai' da 'anhuo' ca choxoraq souaxat da lachoxoyec,
qataq saishet da choche 'aupataxalec ca lasouaxashet
ca qaica ca iueelec da huetaua'a ca nmit na nasouaxashet,
23cha'aye Ñim Nataxala' ishet da iueelec camaye,
nache Ñimaye deuotaxanec nam hueto'ot ca nhuo' camaye.
24Saishet qome da 'anauochaxaua ca sancherapec,
qataq saishet da 'annaigaxaua ca nogaqaic,
25cha'aye sa iuena'a da 'aulolec da qauem lataxac,
nache 'eco' maiche 'anqoviila't.
26Qataq saishet qome da 'ampa'axaalec da 'ausheeten,
aca lavigaxaiste ca ỹaqa'a shiỹaxaua,
27cha'aye da qaca aca 'arsheetenaxanaqte,
nache ishet da ivira'a da qaiuotaxanec ca 'armala', maye 'aro'ochaxala'.
28Saishet qome da 'anqochenaxat
aca togoshaapec la'anaqtepi na 'alhua,
maye ỹa'ayiñi co'ollaxa so hua'au 'arta'alpi,
29Ca shiỹaxaua ỹaỹamaxatchiguiñi ca lo'onataxanaxac,
nache camaye ivitta'a da do'onataxanot na nta'alpi,
qataq saishet da na'aco' ca qaica la'amaqchec.
Currently Selected:
Proverbios 22: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.