Proverbios 17
17
1Na'aictoxo' da qanallectac ca nallec qaramta
qalaxaye huo'o da nlagaxayec,
qaq saq 'ena'am da qalota na qaỹo'ot nquia'axac
qalaxaye nda'a't da loquiaxac.
2Ca nlatac sanqalat ivitta'a da ỹamaqtac ca ñalec maye saỹalaq,
qataq camaye ivitta'a da nhuanaua'a
na lalamaxatpi na lqaỹañecpi so saỹalaq.
3Na oro qataq na plata qalaq qaỹauota'a
na norec na qaỹe'eguen da ỹoqta 'eesa,
qaq na nhuennataxacpi
qalaq nacheñi Ñim Nataxala' ñi ỹe'eguen.
4Ca qauemaic qalaq ỹalaxaguet ca shepecaic,
qaq ca shepecaic qalaq na'axaỹaxana
ca qauema na la'aqtaqa.
5Ca ỹe'enai' ca choxoraq
camaye inogoqchet Ñim Lo'onatac 'Enauacna,
qaq ca ntootapeguec ca que'eenaxac ỹaqa'a,
camaye huo'o qanqa'en da nhuaxanaguec.
6Na llo'oxoret ca ỹa'axaiquiolec
qalaq nachena na laualpi,
qaq da ỹo'ot da llo'oxoyec na ñalaqpi,
qalaq nachesoua soua lta'al.
7Ca qaica ca ỹaỹaanapec qalaq saishet da mategueta
naqa'en naua na'aqtaqa 'onaxaiqa,
qataq ca ỹale huo'o naq 'enec
saishet da ỹamaategueta naua natenataxanaxaco.
8Ca choche isheeten ca lỹa camaye ipi'itaxaatega da saqalaq da huo'o ca ỹo'ot,
cha'aye 'enauac na ỹacoolec da ỹo'ot camaye
qalaq 'enauac da ỹañoxot.
9Ca saishet da iqocha'a da qainogoqchettac
camaye ỹo'ot da qaỹauotec,
qaq ca ipactega de'era nogoqtaxanaxac
camaye ỹo'ot da qaỹoqta ca nauochaxaua.
10Ca ỹaanataxanaxaic,
ỹaỹaanataxanaxan da qanlaxa
qaq ca qaica ca ỹaỹaanapec
qalaq na'aictaxa da cien qaiuaxan
qalaq saishet da daỹaanataxan.
11Ca qauemaic nacherata da nmitta'ai da loquiaxac,
qalaxaye qanamaxa camaye qome ca namaxashec qauemaic.
12Ỹataqta huo'o naq naigui da qanatena'aguet aca potai
maye denotegueleguete caua llalqa,
qaq saq 'ena'am ca qaica ca ỹaỹaanapec
maye ỹo'ottac da no'oopashaxac.
13Ca ỹan ca qauem da nmeneguet naqa'en ca no'on,
camaye saishet da ca'ai ca lma' da qauem.
14'Eeta'am ca tala ipaxaalec ca cotaxac maye qanayecot da qaỹo'ot,
qalaxaye ỹaỹamaqchiguiñi da qanayeca'ai
da ñaq saxanaxa da lliỹa't camaye.
15Da choche qaichoxoren ca huo'o ca lasouaxashet
qataq da qaỹo'ot ca nhuaxanaguec
ca qaica ca ỹasouaxat,
qaq ne'enaua dos ỹataqta
saishetegueta Ñim Nataxala'.
16Negue'to' ca naigui ca qaica ca ỹaỹaanapec da huo'o aca alom,
ye saishet da desheenaxana da naỹaanec
cha'aye qaica ca lauattonaxanaxac.
17Ca auochaxaua camaye nache 'eetai' da auochaxaua,
cha'aye da ivita da qanayeuaigui ca que'eenaxac
qalaq camaye 'eeta'am ca nqaỹa.
18Ca qaica ca ỹaỹaanapec
qalaq npa'axaalec da isheeten ca lỹa,
nache pa'aỹa'aguet da isheeten aca lavigaxaiste camaye.
19Ca nqopita da cotaxac qache nqopita da nloquiaxac,
qaq ca na'amqaanaxaic qalaq maiche quetaua'a da nlaguiñi.
20Ca qauema naua lhuennataxaco sa ỹañoxot da ỹanata ca no'on,
ca tenataxanaxaiqa naua la'aqtaqa
camaye taỹa'a ca qauem.
21Ca ñalec qaica ca ỹaỹaanapec
ỹo'ot da nqui'ic ca lta'a,
qataq ca ñalec 'oopaic ỹo'ot da qaica ca lamaic ca lta'a.
22Da machiguiñi da nquiyaqteỹaxac
qalaq ỹo'ot da no'oita da no'ocỹaxac,
qaq da naquicoxo qalaq iqaxaỹaqche't naua npi'ineqa.
23Ca qauemaic ỹaconeguet aca qoỹoxotchiguiñi nsheetenaqte,
da yaqto' qaỹashaxanec da llec ca nalochiguiñi lataxac.
24Da naỹaanec nachera da nmitta'a ca sanqalat,
qaq na qaica ca ỹaỹaanapec
qalaq qaica ca llec ca 'eetapeguec.
25Ca ñalec qaica ca ỹaỹaanapec
ỹo'otec da lalemataic ca lta'a,
qataq ỹo'ot da nqui'ic aca late'e.
26Saỹaỹamaxañi da qaỹo'ot ca nhuaxanaguec ca qaica ca ỹasouaxat,
qataq da qaiuaxan ca ỹale saishet 'amaqtaqaic.
27Ỹataqta huo'o na ỹaỹaten ca saqallegueme da detaqa,
qataq sanqalat ca ỹaỹaten da ñe'emaxatta.
28Qataq ivira'a ca qaica ca ỹaỹaanapec
ishet da 'eco' ỹaanaxanaxaic da sa detaqa,
qataq 'eco' sanqalat qanqa'en da ỹaỹaten da ñe'emaxatta.
Currently Selected:
Proverbios 17: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.