Proverbios 15
15
1Ca nasataxac huesotta qalaq nmooñi naqa'en ca nalemataic,
qaq ca nasataxac quia'aqaic qalaq 'eroigui naqa'en ca nalemataic.
2Naua la'aqtaqa ca ỹaanaxanaxaic qalaq chegaqaiguilo da naỹaanec,
qaq naua la'aqtaqa ca qaica ca ỹaỹaanapec
qalaq chegaqaiguilo da 'oopashec.
3Ñim Nataxala' hueta'a 'enauac na qanayeetaña,
ilotalec 'enauac na soxoraicpi qataq na qauemaicpi.
4Naua na'aqtaqa soxoraiqa qalaq 'eeta'ama
aca qo'oipaq chegaqaigui da nca'alaxa,
qaq naua na'aqtaqa quia'aqaiqa qalaq na'aqchet da nhuennataxac.
5Ca qaica ca ỹaỹaanapec ỹo'ota'n naua lqataxaco ca lta'a,
qaq ca ilotegueta naua nqataxaco camaye sanqalat.
6Ỹataqta qaica ca iueetac ca lma' ca ỹale maye no'on da lataxac,
qaq na laueguecpi na qauemaic qalaq qalota naqa'en da cotaxac.
7Na ỹaanaxanaxaicpi naua la'aqtaqa,
qalaq ilagaxatrec da naỹaanec,
qaq na lhuennataxaco na qaica ca ỹaỹaanapec,
qalaq saishet da nache 'eetec de'era.
8Ñim Nataxala' saisheteguet aca lachetaqtaxanaqte na qauemaicpi,
qalaxaye ỹamaateguet da natamnaxac na no'on da lataxac.
9Ñim Nataxala' saisheteguet da qauem lataxac na qauemaicpi,
qalaxaye ỹauotec ca quegue da nalochiguiñi lataxac.
10Ca ỹaxanec da no'on nqa'aicỹaxac
camaye sa qaỹala'ac da qanlaxanec,
qaq ca sa ỹaỹamaxaren da qaitaxaỹaua'a qalaq taỹa'a da ileu.
11Da lmeenaxanaxac Ñim Nataxala'
ỹaatec naqa'en da nleuaxa qataq ana huachiqui,
qaq nache 'eetec nataqa'en da ỹaatec naqa'en
naua lhuennataxaco na shiỹaxauapi.
12Ca nogoqtaxanaxaic saishet da ỹauotec ca nlaxanec camaye,
qataq saishet da nmittaique da ỹalectaigui na ỹaanaxanaxaicpi.
13Aca nquiyaqte da machiguiñi,
qalaq machiguiñi naqa'en da nasheguiỹaxac,
qaq aca nquiyaqte sa no'oilec, qalaq daquico naqa'en da nasheguiỹaxac.
14Ca ỹaanataxanaxaic qalaq nmitta'a da naỹaanec,
qaq na qaica ca ỹaỹaanapec qalaq ỹa'añaqchettac da no'oopashaxac.
15Ca huetapoigui da nque'eenaxac
qalaq 'enauaque naua na'axa'te da qauema naqa'e'n,
qaq ca matapiguiñi, qalaq 'enauaque naua na'axa'te da machiguiñi.
16Na'aictoxo' da choxoraq ca shiỹaxaua,
qalaxaye huo'o naq 'enec naqa'en Ñim Nataxala',
qaq saq 'ena'am da sallaxanec ca shiỹaxaua, qalaxaye nda'a't da nque'eenaxac.
17Qataq na'aictoxo' da qanallectac
ca nallec huoue, qalaxaye huo'o da nsoxoyec,
qaq saq 'ena'am da qanallectac ca chaxaraic lapat,
qalaxaye huetaigui da nquiỹaxanaqtaic.
18Ca sa lhuanguit da lalemataic,
camaye ỹo'otteua'a da loquiaxac,
qaq ca hualaxauaic, qalaq ỹo'ot da nlagaxayec.
19Da nqa'aicỹaxac ca hualaic qalaq nlaqtegue ana le,
qaq da llecỹaxac ca no'on da lataxac qalaq no'oitegue.
20Ca ñalec ỹaanaxanaxaic machiguiñi naqa'en ca lta'a,
qaq ca ñalec qaica ca ỹaỹaanapec
qalaq qaica naqa'en ca naigui aca late'e.
21Ca qaica ca ỹaỹaanapec qalaq machiguiñi naqa'en da no'oopashaxac,
qaq ca ỹaanataxanaxaic qalaq ỹaỹamaxatchiguiñi da lqauaxac.
22Da sa qannachigui ca qaỹo'ot,
nache saipaigui ca qalapaxañi da qaỹo'ot,
qaq da qalota na detaxaỹaua'a camaye nache ishet da qaỹañoxot.
23Ỹataqta 'onaxaic da ỹaỹamaqchiguiñi ca nasataxac,
lamaaxa da huaqchigui da ỹoqta qaiuen.
24Da llecỹaxac da nachaalataxac ca ỹaanaxanaxaic
qalaq taỹasheguema na pa'asheguem,
da yaqto' nca'aleeguesop aca huachiqui maye npa'aỹañi.
25Ñim Nataxala' ilaxachigui ca lma' na ño'oxonnaxaicpi,
qalaxaye no'oitai' naqa'en na lalamaxatpi aca pa'ai.
26Ñim Nataxala' saisheteguet na lhuennataxacpi na qauemaicpi,
qalaxaye ỹamaategueta naua na'aqtaqa 'onaxaiqa.
27Ca qopitaxanaqtaqaic qalaq maiche nlaxattapiguiñi da lma'ỹaxac,
qaq ca saỹaconeguet da choche qaisheeten
qalaq nache 'eetai' da nca'altauec.
28Ca ỹale no'on da lataxac qalaq hua'auñi
da deuennataxaalec ca huotaique da nasaxauec la'aqtac,
qaq naua la'aqtaqa ca qauemaic qalaq nlaqchiguilo na qauem.
29Ñim Nataxala' qaỹoqtaique naqa'en na qauemaicpi,
qalaxaye hua'axaỹa da natamnaxac ca no'on da lataxac.
30Da no'on lmeenaxanaxac naua na'ai'te,
qalaq machiguiñi naqa'en da nquiyaqteỹaxac,
qaq ca no'on na'axaỹaxac qalaq dalaxaic naqa'en da na'añaxac.
31Ca na'axaỹaxana ca nvitaqtaxanaxac maye deca'alaqtaxa'n,
qaq camaye ỹalectaigui na ỹaanaxanaxaicpi.
32Ca sa ỹaconeguet da qanlaxanec,
qache sa ỹauotec da nachaalataxac,
qaq ca ỹaconeguet da qanlaxanec
qalaq ỹaconeguet da naỹaanataxanaxac.
33Da huo'o naq 'enec qanqa'en Ñim Nataxala',
damaye dapaxaguenataxanec da naỹaanec,
qaq da qanshetaique da qaỹaconeguet da ño'oxoyec,
qalaq hua'auñi qanqa'en da qaica ca na'amaqchec.
Currently Selected:
Proverbios 15: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.