Proverbios 10
10
Naua ỹaanaxanaxaiqa la'aqtaqa so Salomón
1Naua la'aqtaqa so Salomón, 'eeta':
Ca ñalec ỹaanaxanaxaic, machiguiñi naqa'en ca lta'a,
qaq ca ñalec qaica ca ỹaỹaana'a qalaq ỹo'ot da nque'eenaxac aca late'e.
2Da nsallaxa maye chegaqaigui da ncachaxac qaica ca naigui,
da no'on nataxac qalaq ishet da huo'o ca isoueeguesop da nleuaxa.
3Ñim Nataxala' saishet da iqouat naqa'en ca no'on da lataxac,
qalaxaye ỹo'otec da iqouat ca qauemaic.
4Ca sa qallegueme da do'onataxan qalaq taỹa'a da choxoraq,
qaq ca ỹaguec da lo'onataxanaxac qalaq taỹa'a da sallaxanec.
5Ca deqataxan da nvi' ye cotap qalaq ỹaanaxanaxaic,
qaq ca do'ocheta da huo'o da no'onataxanaxac qalaq taỹa'a da huo'o da la'aloxo.
6Ca ỹale no'on da lataxac camaye talec da na'achecỹaxac,
cam qauemaic qalaq ipa'axaañi da nloquiaxanataguec.
7Ca ỹale no'on da lataxac da qaiuennate qalaq huo'o da nchoxonnataguec,
ca qauemaic qalaq saqaỹaloq da qaicoua'ai.
8Ca ỹaanaxanaxaic ỹaconeguet ca namaxasoxonaxac,
qaq ca qauema naua la'aqtaqa qalaq taỹa'a da nlachiguiñi.
9Ca ilotague' da llecỹaxac camaye qaica ca ñe'etaique,
qaq ca qauem da llecỹaxac qalaq qauem ca loga't.
10Qaq ca naquiaxaatalec ana la'aite qalaq taỹa'a ca qauem,
qaq ca qaica ca ỹaỹaana'a qataq taxaỹaxaic qalaq taỹa'a da nlachiguiñi.
11Naua la'aqtaqa ca no'on da lataxac qalaq chegaqaiguilo da nca'alaxa,
qaq ca qauemaic qalaq ipataxañi na qauemsat.
12Da nquiỹaxanaqtaic ỹo'oteua'a da loquiaxac,
da nsoxoyec qalaq ỹapalaxat 'enauac na nasouaxashetpi.
13Naua la'aqtaqa ca ỹaanaxanaxaic chegaqaiguilo da naỹaanec,
qaq ca qaica ca ỹaỹaana'a qalaq taỹa'a
da qaiuaxaalec na l-laq ca nhuaxanaxanaxat.
14Ca ỹaanaxanaxaic camaye ỹaỹamaxatteque naua lauattonaxanaxaco,
qaq naua la'aqtaqa ca qaica ca ỹaỹaana'a qalaq huo'o da lchec.
15Da lsallaxa ca sallaxanec nachera da npaxattalec,
qaq ca choxoraq qalaq nlaxaañi da lachoxoyec.
16Qaq da nca'alaxa nachera da nsheetenaxat ca no'on da lataxac,
qaq da ñe'etaxaloxo nachera da nsheetenaxat ca qauemaic.
17Ca ilotelec ca napaxaguenataxanaxac,
camaye quetegue da no'on llec da achaalataxac,
qaq ca saỹaconeguet damaye qalaq taỹa'a da deqat.
18Ca saq 'e'n naua la'aqtaqa camaye ỹoxottañi da lquiỹaxa,
qataq qaica ca ỹaỹaana'a ca ỹa'axatec ca saq 'en.
19Ca qalota na la'aqtacpi qalaq qalota da lsomaxac,
qaq ca ỹaỹaten da ñe'emaxat camaye ỹaanaxanaxaic.
20Naua la'aqtaqa ca no'on da lataxac qalaq 'eeta'ama ca no'on plata,
qaq naua lhuennataxaco ca qauemaic qalaq qaica ca naigui.
21Naua la'aqtaqa ca ỹaanaxanaxaic qalota ca ỹapaxaguen,
qaq ca qaica ca ỹaỹaana'a qalaq ilem da qaica ca ỹaỹaanapec.
22Da lchoxonnataxanaxa Ñim Nataxala' ỹo'ot da nsallaxa,
damaye saishet da ỹo'ot ca naquicoxo.
23Ca qaica ca ỹaỹaana'a qalaq machiguiñi da ỹo'ottac na qauemsat,
qaq ca ỹaanaxanaxaic qalaq machiguiñi naqa'en da naỹaanec.
24Cam ñe'etapeeguet ca qauemaic qaq nacheca ca naỹa'a camaye,
qaq ca no'on da lataxac qalaq ipacchiguilo naua no'o'n lhuennataxaco.
25Da ỹoxogue ca la'at lta'araic nache imeuo ca qauemaic,
qaq ca no'on da lataxac qalaq nache 'eetai' da nachattañi.
26Ca ỹamaq ca na'aqtaxanaxanec hualaic
qalaq 'eeta'am da maiche ñe'euai' naqa'en naua lhue
qataq da taiguilo naua la'ai'te ca lmala'q.
27Da huo'o naq 'enec qanqa'en Ñim Nataxala'
ỹo'ot da logoraic da achaalataxac,
qaq naua nachattaiguilo vi'iye ca qauemaic qalaq sa qaỹarec.
28Ca no'on da lataxac qalaq taỹa'a da machiguiñi,
qaq ca qauem da lataxac qalaq taỹa'a da nlaguiñi.
29Ñim Nataxala' npaxattalec ca ỹo'ottac ca ỹaỹamaqchiguiñi,
qaq ca ỹo'ottac ca qauem qalaq ilaxachigui.
30Ca no'on da lataxac qalaq saishet da huañi,
qaq na qauemaicpi qalaq saishet da nache 'eetai' da huetalec ana 'alhua
31Naua la'aqtaqa ca no'on da lataxac
qalaq chegaqaiguilo da naỹaanec,
qaq ca qauema naua la'aqtaqa qalaq taỹa'a da qaicheguec na lachaxat.
32Ca no'on da lataxac qalaq no'oñi naua la'aqtaqa,
qaq ca qauemaic qalaq qauema naua la'aqtaqa.
Currently Selected:
Proverbios 10: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.