Malaquías 1
1
Ñim Lo'onatac 'Enauacna ỹauotec na lalamaxatpi
1Qaq 'era da la'aqtaxanaxac Ñim Nataxala' maye ỹanem na Israel le'ecpi, chegoqchigui naqa'en so la'aqtaxanaxanec Malaquías. 2Ñim Nataxala' 'eeta' da la'aqtac: «Aỹem qami' sauoteque.» Qalaxaye qami' qoñiỹapec naxa: «¿Ca 'eeteco' da saỹatenaq da qomi' 'auauoteque?» Nache Ñim Nataxala' ỹasat naxa 'eeta': «Aỹem qami' sauoteque, 'eeta'am da 'eetec soua nqaỹa't Esaú qataq so Jacob, qalaxaye Aỹem ỹactec da sauotec so Jacob 3qaq so Esaú qalaq saishet da sauotec. Ỹoqo'oye yem na'alhua so Esaú maye qasoxonaxasat, ỹe'eguelaxa ñaqa'en da ỹataqta toolec, qaq nam lalamaxat 'alhuapi qalaq saneguet da netalec nam huauec shiguiỹacpi. 4Qaq nam Edom le'ecpi, maye chegoxoguet so Esaú, da 'enapec: ‹Ỹataqta qomi' qailaxachiguilo, qalaxaye qaltaq ño'oxonaxasheguem qome nam qailaxachigui co'ollaxa ne'ena qana'alhua›, qalaxaye Ñim Nataxala' maye Qaica ca Ỹaqalanapec, 'eeta' qome: Namayepi qaltaq no'oxoosheguem qome na lalamaxatpi, qalaxaye Aỹem qaltaq selaxachigui qome. Nache na lma' namayepi le'enaxat qome da ‹'Alhua maye lma' na qauem› qataq ‹Nhuo' le'ecpi maye nache 'eetai' da huetalec da layeloxo Ñim Nataxala'› 5Qaq qami' ỹataqta qauauañiichigui qome, nache qoñiỹapec: ‹¡Dam la'amaqchec Ñim Nataxala', ỹataqta napacaleguete naua loga'te na na'alhua na Israel le'ecpi!›
Ñim Nataxala' nlaxa na ntaxaỹaxanaxanecpi
6Ñim Nataxala' maye Qaica ca Ỹaqalanapec, 'enapega na ntaxaỹaxanaxanecpi, 'eeta': Nam ñalaqpi huo'o naq 'enec naqa'en na lta'alpi, qaq nam namaxashecpi qalaq ỹalaxaguet na na'aco'pi. Qaq aỹem da aỹem Qarta'ai, qalaq ¿ta'ainco' da qaica qanqa'aiñi ca shenec? Qataq da aỹem qana'aco'oi qalaq ¿ta'ainco' da saishet da Aỹem qaualaqaiguet? Qami' Aỹem qauo'otañi, qataq ivira'a da qoñiỹapec: ‹¿Negue'to' cam huo'omshe 'am so'otanaq?› 7Qami' qandoiua'a naxa añi ỹalamaqte nca'atoxonaxalate, ana nauole 'ayiiña maye qauem, qaq ñaqaiyeta qaunataxañiitac qoñeeta': ‹¿Negue'to' cam so'otaq maye 'am inogoqchet?› Qami' Aỹem qanogoqcheche, cha'aye qaupicheetega da añi ỹalamaqte nca'atoxonaxalate ishet da sa qaiyacnapec 8qataq da saishet da qauem qanqa'eñi, da Aỹem qaỹa'añiỹot ca shiguiỹac maye tagoxoic, huo'otaq huaỹoraxaic, huo'otaq ca sano'on. ¡Qauesomiỹa qome, qaroiua'a nam qarta'ailpi! ¡Nache qauloichigui qome da huo'otaq namayepi ỹamaateguet nam qarachetaqtaxanaxache!»
9Qaq nagui, qauỹaxañiỹot qome Ñim Lo'onatac 'Enauacna da yaqto' qomi' ichoxore'n. Qalaxaye da qaỹa'añiỹot Ñimaye aca qarachetaqtaxanaqche, maye 'eeta'am namayepi, nache saishet qome da qaupicheetega da Ñim Lo'onatac 'Enauacna qami' ỹamaategueta. Qaq Ñim Nataxala' maye Qaica ca Ỹaqalanapec 'eeta': 10«¡Ỹataqta da iyaxa da huo'o ca 'oonolec da qoñeeta da ỹapogui na lasompi añi atamnaxaqui maye ỹalamaqte, yaqto' saishet da choche ne'en da qoỹegueua'a na norec añi ỹalamaqte nca'atoxonaxalate! Cha'aye Aỹem saishet da qami' ñetootegueque, qataq saishet da shecto'ot da sacootapeeguet ana qarachetaqtaxanaqche. 11Cha'aye ỹataqta 'enauac na ỹotta'at shiỹaxauapi ana 'alhua, ỹataqta huo'o naq 'enec naqa'en Aỹem; qataq 'enauac na pa'aiguelo da qaỹavigaxat na nchenaxanaxat da qaỹo'oxoren da ỹe'enaxat, qataq Aỹem qandoua'a ana no'on nachetaqtaxanaqte. 12Qalaxaye qami', Aỹem qanogoqcheche, cha'aye qaupicheetega da añim ỹalamaqte nca'atoxonaxalate maye iquia'axalate, ishet da sa qaiyacnapec, qataq saqaiyacnapec nam nallec maye huetalec añimaye. 13Qataq qami' qoñiỹapec: qomi' mashe ñasamaxaisop 'enauac de'era, nache Aỹem qauo'otañi 'enapec Ñim Nataxala' maye Qaica ca Ỹaqalanapec. Qalaq ñaq 'eetalec da qaupicheetega da samachiguiñi da aỹem qaỹa'añiỹot ca shiguiỹac maye chochaq ncachaxat, qataq ca lapat ca huaỹoraxaic, huo'otaq sano'on. 14¡Ỹataqta qauem qome ca talec, cam datenataxan da Aỹem ỹachaxanapeguem ca lalo shiguiỹac no'oita, qaq ime nache Aỹem ỹanot cam shiguiỹac maye huo'o ca lque'emaxa! Aỹem maye Aỹem 'amaqtaqaic Nta'a, qataq Aỹem lcolanaxat na ỹotta'a't shiỹaxauapi.»
Qaq 'era da la'aqtac Ñim Nataxala' maye Qaica ca Ỹaqalanapec.
Currently Selected:
Malaquías 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.