Lamentaciones 1
1
Da hua'auchiguiñi noinaxac huaña ye Sión
1¡Choxoraxaso' som huaqta'a't nỹecpi maye nlaqchigui co'ollaxa na shiỹaxauapi!
¡'Eeta'am da lataxac aca pa'ai, som huaqta'a't nỹecpi
maye na'attaua'a co'ollaxa nam laỹepi shiỹaxauapi!
¡Qoỹaneguet nagui da ỹo'ottac nam qapa'atta no'onatacpi,
asom nate'e maye ilotague' co'ollaxa da no'onataxanaxac!
2Ye pe qalaq daquicota da nỹeetac, naua lache' qalaq naguinguilo naua lamelque.
Qataq 'enauac nam nauochaxauapi, qaica ca 'oonolec da anac da ỹa'añaqchet.
Qataq 'enauac nam nauochaxauapi ỹatenachet,
nache ỹe'eguelaxa da npa'aguenaxaua namayepi.
3So Judá le'ecpi noxonec nache qaỹauega ye lỹa 'alhua,
ỹataqta daquico qataq nque'etaxangui da qapa'atta lo'onataxanaxac.
Som ilotague' co'ollaxa da no'onataxanaxac,
qaq nagui qalaq qaica ca nmataqa' qanqa'en.
Na mpa'aguenaxauapi co'ollaxa loxonec somayepi,
nache ỹataqta qaica ca ldaqa' naqa'en.
4¡Na nqa'aicpi maye naỹa'a ye Sión qalaq huetangui da naquicoxo!
¡Nache qaica ca naỹa na naponaxacpi maye huaña naxa yemaye!
Naua laso'omi yem huaqta'a't nỹecpi qalaq tooleguete,
na ntaxaỹaxanaxanecpi qalaq nỹeetac souaxat da nqui'ic,
na qa'ampiolec qalaq daquicota, nache imauec ye Jerusalén da nlaqchigui da naquicoxo.
5Nam npa'aguenaxauapi co'ollaxa qalaq nachena nam na'aco'pi nagui,
qataq na l-loquiaxauapi co'ollaxa nquictasheguem da lsallaxa nagui.
Qaq cha'aye Ñim Nataxala', maiche ỹo'otec de'era laquicoxo,
souaxat nam qalota lasouaxashetpi namayepi.
Ỹoqo'oye som llalaqpi, qaỹauega ye ỹaqa'a 'alhua,
ỹauec nam npa'aguenaxauapi namayepi.
6Qaq ỹataqta deqat 'enauac so lyacỹaxac ye Sión,
som lataxala'pi qalaq 'eeta'am aca chegaxango da saỹanata ca 'auaqpi,
qataq ỹauogoleete' naua lapia'ate da dataueeguesop nam icaatacpi.
7Ye Jerusalén, iuennate se'esoua na'axa'te,
co'ollaq nda'a't qataq ỹataqta daquicota,
qataq iuennate 'enauac som nsallaxa maye hueto'ot soua hua'au' na'axa'te,
qataq iuennate co'ollaq noxonec nache qaica ca anac da itauan,
qataq so npa'aguenaxauapi, co'ollaq ila'a da qailaxachigui, nache ỹe'eetac.
8Ye Jerusalén ỹataqta qalota na lasouaxashetpi,
qaq nachera da huo'omshe ivira'a da qane'eetapigui.
Nam ỹo'oxoreetac co'ollaxa yemaye qaq nagui qalaq ne'eetapigui,
souaxat da ỹauaachigui yemaye da qailaxachigui.
Qaq ỹoqo'oye nagui nỹeetac, qataq souaxat da la'agaxa
nache saỹachaxan na lashec.
9Naua alogo qalaq nlaqchiguilo na qauem,
qaq saishet da iuennatega co'ollaxa dam taỹa'aguet.
Qaq ỹataqta nque'elaxatta co'ollaxa da huañi, nache qaica ca ỹa'añaqchet.
¡'Am Nataxala', ñaq 'aulogui nagui da ỹaquicoxo,
qataq 'aumeten da na'amqaanaxac nam aỹem ipa'agueetacpi.
10Nam depa'aguenataxaatacpi qalaq ỹauo'o lalamaxat da lsallaxa ye Jerusalén.
Qaq yemaye ỹauaachigui co'ollaxa nam chegaqauec shiỹaxauapi
da inoxonoigui aso atamnaxaqui,
nam shiỹaxauapi maye saishet da 'auashenem co'ollaxa
da inoxonoigui asom 'aralamaqte naponaxaqui.
11Qaq 'enauac nam hueta'a yemaye nỹeetagui, nmittaique ca aloq,
qataq ỹanec so lsallaxa da nmeneguet naqa'en ca nallec
da yaqto' nache 'eetai' da nca'altauec.
¡'Am Nataxala', ñaq 'aumeten da ñe'enaguec,
qataq dam qauem maye aỹem talec!
12¡Qami' maye qoquiitague' na nqa'aic,
ña qavia'axañeeguet da qarqueuoxoqui nache qauenntaxañeelec,
da huo'otaq huo'o ca qui'ic da 'eeta'am dam ñequi'ic,
maye ỹauo'o da ỹataqta lta'araic ñeque'eenaxac!
¡Ñim Nataxala' co'ollaq 'eroigui da nnogoxonaxac
nache aỹem namaxa de'era ñeque'eenaxac!
13Ñim Nataxala', ỹachegoxottot na pa'asheguem da nasaxañi so norec,
nache somaye ỹataqta ivira'alo naua ipi'ineqa da ỹavigaxa't,
qataq ỹanangui so ỹec aso nqoina, nache aỹem ỹe'eguelaxat,
nache ỹo'ot da aỹem qaỹalata'a't, qataq da ñequi'ic nache ỹa'atta'a't ye na'a'q.
14Ñim Nataxala', ỹauaachigui na ỹasouaxashetpi,
nache Ñimaye aỹem icoñera'aguet namayepi,
'eeta'am naqa'en ca huaca lauegaxanaxaqui 'epaq,
¡qaq mashe qaica ca ỹa'añaxac naqa'en!
Ñim Nataxala' aỹem ỹaneguet da lhuaqỹaxac nam shiỹaxauapi
maye saseshet da sataỹa'aguet.
15Ñim Nataxala', ỹataqta iỹotaxateueegue da ỹasaxauec
som 'añaxaicpi maye aỹem iuetteguelec co'ollaxa.
Nache namaq so alleppi da yaqto' aỹem iloquiaxan,
qataq da nmatchiguiñi som ñalleppi maye 'añaxaicpi.
¡Ñim Nataxala' petapigui anam napogoshepi llalpi na Judá,
'eeta'am naqa'en da 'eetec da qaỹapetapigui ana uva da qaỹo'ot na lataxa!
16Qaq ỹoqo'oye aỹem ñeỹeetac, naua ỹa'ai'te qalaq nlaxaguilo na ỹache',
cha'aye qaica ca aỹem ỹa'añaqchet, qataq qaica ca aỹem ỹanem ca dalaxaic ỹa'añaxac.
Som ỹalaqpi qalaq 'enauac qanlaxatchiguiñi,
cha'aye qomi' napacaleguete da la'añaxac som qampa'aguenaxauapi.
17Ye Sión ỹachaxaatrashegue'm naua lhuaxaye da nachoxoreetac,
qalaxaye qaica ca ỹa'añaqchet.
Ñim Nataxala' ỹamaq na lauoreuapi so Jacob da npa'aguene' somaye,
nache namayepi ỹataqta deqaiga ye Jerusalén.
18Qaq Ñim Nataxala', ỹaỹamaqchiguiñi dam ỹo'ot,
cha'aye aỹem sataỹa'agueta naua lamaxasoxonaxaco.
¡Ñaq qana'axaỹaxañi nagui 'enauac qami' nhuo' le'ecpi,
qataq qaumichiñi da ñequi'ic! ¡Som ỹalamaxat nsoxoppi,
qataq som qa'ampi qaỹauega yem ỹaqa'a 'alhua!
19Aỹem, seỹaxaatega nam ñauochaxauapi da yaqto' aỹem itauan,
qalaxaye namayepi aỹem ỹatenachet.
Som itaxaỹaxanaxanecpi qataq som ỹa'axaiquipi maye ỹataxala'pi,
somayepi ileu huaña ye huaqta'a't nỹecpi,
co'ollaq nmittaique ca aloq da yaqto' nache queta da nca'altauec.
20¡'Am Nataxala', ña 'aumeten da ỹachetataic!
¡Ñanomteguet da ỹataqta lta'araic lqui'ic ana itogue!
Da ñequi'ic qalaq ipataqta'a't añi iquiyaqte,
naxa da tachigui iuel da aỹem sa salaq.
De'era pa'auec, huaña da qaỹalauat so ỹalaqpi qairolec so ỹeelonec,
qaq ne'ena npa'auo nataqa'en hueta'a da nleuaxa.
21Na shiỹaxauapi hua'aqtega da ỹa'alaxac souaxat da ñequi'ic,
qalaxaye qaica ca anac da aỹem ỹa'añaqchet.
'Enauac na ñepa'aguenaxauapi, ỹaỹaten dam qauem maye souaigui,
qaq namayepi ỹataqta machiguiñi souaxat da aỹem 'auo'otec de'era.
¡Qalaxaye, 'auanacot qome cam na'a'q maye 'aua'axatta'aguet co'ollaxa,
da yaqto' namayepi talec ca nque'eenaxac, maye 'eeta'am dam ñeque'eenaxac nagui!
22Qaq no'on da iviro'ot 'Am, 'enauac nam qauem maye ỹo'ot namayepi,
qaq souaxat nam lasouaxashetpi namayepi,
nache 'aue'enaxatteguet qome dam aỹem 'auo'otec nagui,
souaxat nam ỹasouaxashetpi. Cha'aye mashe ỹaguec da ñenoinaxac,
nache ỹataqta seuet añi iquiyaqte.
Currently Selected:
Lamentaciones 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.