Job 1
1
Da nque'eenaxac so Job
1Qaq ye 'alhua maye le'enaxat Uz, nache naña so ỹale le'enaxat Job, somaye no'on da lataxac, qataq qaica ca ỹasouaxat, qataq ỹataqta ỹalaxaguet Ñim Lo'onatac 'Enauacna, qataq ỹataqta saishet da huo'otaq huo'o ca ỹo'otec ca sa ỹaỹamaxañi. 2Qaq so Job, siete soua llalqa ỹale't, qataq tres soua llale 'alo, 3qataq siete mil aso lalo qaguetapi, tres mil aso cameellopi, mil so lauegaxanaxala'pi huaca, qataq quinientos so 'ashenapi, qataq ỹataqta qalota so l-latacpi. Qaq somaye nacheso so ỹataqta sallaxanec 'enauac som netaña da nala' lliguisheguem. 4Qaq se'eso llalaqpi so Job, nache 'eetai' naxa da ỹo'ottac da lquia'axac, huaña naqa'en na lma' ñi 'oonolec somayepi, qalaxaye chegoqchiguiña qanqa'en na lma' ñi 'oonolec, qataq icoyegue'n naxa soua tres lqaỹa't 'alo da yaqto' nhuanaxau'. 5Qaq naxa da ime' soua na'axa'te da nquia'axac, nache so Job iỹaxaneuga so llalaqpi, qataq no'ottasheguem ye nte'etom, nache ỹo'ot ana lachetaqtaxanaqte qaỹavigaxatta ñi 'oonolec somayepi, da yaqto' qaỹapalaxat na lasouaxashetpi. Qaq de'era nache 'eetai' naxa da 'eeta'ac so Job, souaxat da lhuennataxac da saiuena'a da huo'o ca 'oonolec somayepi da lquiyaqteỹaxac isheueetac Ñim Lo'onatac 'Enauacna.
So Pa'aguenataxanaxaic
6Qaq huo'o so na'a'q da nachaateua'a Ñim Nataxala' som lamaxashecpi piguem le'ecpi, nache nataqa'en nachatteuo so Pa'aguenataxanaxaic, da ỹalectoigui somayepi. 7Nache Ñim Nataxala' inato' somaye, 'eeta':
«¿Hua'ague ca 'auachegoqta'ague?»
Nache som Pa'aguenataxanaxaic, 'eeta':
«Qomye secoleetapeguelec naxa 'enauac ana 'alhua.»
8Nache Ñim Nataxala' inato' somaye, 'eeta':
«¿Peta'a 'auauatton ca ỹamaxashec Job? Camaye ỹataqta qaica ca 'ena'am nam huetalec ana 'alhua, da ỹataqta Aỹem ỹalaxaguet, qataq no'on da lataxac qataq qaica ca ỹasouaxat, qataq saishet da huo'otaq huo'o ca ỹo'otec ca sa ỹaỹamaxañi.»
9Qalaxaye som Pa'aguenataxanaxaic, 'enapeco':
«Qaica ca choche vichiguiñi da ỹataqta 'Am ỹalaxaguet. 10Cha'aye 'Am ỹataqta sa 'auashen da huo'o ca ipoteua'a ñimaye, qataq na llalaqpi, qataq 'enauac nam hueto'otpi na'atetpi. Qataq ỹataqta 'auchoxonnec 'enauac na ỹo'otpi, qaq ỹoqo'oye ñimaye ỹataqta napacalec da lsallaxa 'enauac na netalec yi'iye 'alhua. 11Qalaxaye da huo'o ca qona'ac qataq da 'auacona 'enauac na hueto'otpi, nache 'aue'elaqtem qome da 'Am iviraxato'ot da 'Am isheuen.»
12Nache Ñim Nataxala' 'enapego' so Pa'aguenataxanaxaic, 'eeta':
«Hua', ỹaỹamaqchiguiñi, maiche 'oiqueetac qome ca qoneta'ac 'enauac na hueto'otpi ca Job, qalaxaye saishet qome da huo'o ca 'auo'otec sa ỹaỹamaxañi da nachaalataxac camaye.»
Huaña nache so Pa'aguenataxanaxaic, ca'ai Ñim Nataxala'.
13Qaq huo'o so na'a'q, nache soua llalqa qataq soua llalel so Job, ỹo'ottrac so lquia'axac, huetra'a so lma' so lqaỹa't ỹe. 14Nache huo'o so shiỹaxaua nvireua'a so lma' so Job, nache ndoua'a da la'axaỹaxac, 'eeta':
«Qomi' ña'araqtapiguisheguem ye 'alhua, sauoqta'aisalo soua qarauegaxanaxala'ate huaca, qaq asom 'ashenapi nache lshecta' ye souaqta'a da deque'etac. 15Nache nque'elaxatta da nvi' so sabeopi, nache decachiỹa so 'ana'atetpi, qataq ỹalauat so ỹaỹepi. Qaq nachaỹemta da aỹem qoỹet, nache ñanac da 'am sa'aqtaxanem.»
16Qaq co'ollaq ñaq saxanaxa da imat da la'aqtaxanaxac se'eso ỹale, nache nvireuo so lỹa, nache da'aqtaxan, 'eeta':
«Nhuaxanaxaañi aso qasoxonaxa, nache nmichiguiñi da ileu naqa'en aso qaguetapi qataq so lo'opi. Qaq nachaỹemta da ñeca'alec, nache ñanac da 'am sa'aqtaxanem.»
17Qaq ña detaqtac se'eso ỹale, nache nvireuo so lỹa, nache da'aqtaxan, 'eeta':
«Tres naua lpa'axaco so anac caldeopi da qomi' iloquiaxa'n, nache ỹauota'a so lainec da nmatchiguiñi so ỹaỹepi qataq decachiỹa aso cameellopi. Qaq nachaỹemta da aỹem qoỹet, nache ñanac da 'am sa'aqtaxanem.»
18Qaq ña detaqtac somaye, nache qaltaq nvireuo so lỹa ỹale, nache da'aqtaxan, 'eeta':
«Soua 'aỹa'alqa qataq soua 'aỹa'alel, soomaye ỹo'ottrac so lquia'axac huetra'a ye lma' so 'aỹa'alec ỹe. 19Nache nque'elaxatta da anac so la'at lta'araic, chegoqteuga so toolec 'alhua, nache ỹalolaxaañi so nỹec, nache ipa'axaañi so 'aỹa'alaqpi, nache 'enauac somayepi da nmichiguiñi da ileu. Qaq nachaỹemta da ñeca'alec, nache ñanac da 'am sa'aqtaxanem.»
20Nache so Job nachaañi, ỹataqta lta'araic da nqui'ic, nache ncolaxata'aisalo soua alogo, qataq namarecta na lqaic, nache ỹa'alyiñi naua l-llecte da natamen. 21Nache, 'eeta':
«Sootauec co'ollaq ñanaỹa ana 'alhua, qaq nataqa'en sootauec qom sheca'ai. Ñim Nataxala' aỹem ỹanem 'enauac na aỹem hueto'otpi, qaq Ñimaye ipactegue da ỹacona 'enauac na aỹem hueto'ot. ¡Qalaxaye nache 'eetai' qome da sho'oxoreetac da le'enaxat Ñimaye!»
22Qaq 'era da 'eetec 'enauac da huaigui so Job, qalaxaye ñaqaiyeta qaica ca mpe'enaxac, qataq saishet da huo'o ca la'aqtac da isheuen Ñim Lo'onatac 'Enauacna.
Currently Selected:
Job 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.