Juan 21
21
So Jesús nachaxanalo soua siete lapaxaguenataqa
1Qaq co'ollaq ime de'era, nache So Jesús qaltaq nachaxanalo soua lapaxaguenataqa huaña ye loigue aso lapel ye Tiberias. 'Era da 'eetec co'ollaq nachaxanalo, 'eeta': 2Som lapoota'a'tpi Simón Pedro, Tomás som qaỹamata'ac da huaya', qataq so Natanael maye lma' ye Caná yem huaigui ye 'alhua Galilea, Santiago qataq so Juan maye llalqa so Zebedeo, qataq soua lỹa't dos lapaxaguenataqa So Jesús. 3Nache so Pedro 'enapegalo' soomaye, 'eeta':
–Aỹem ashec da sha'aco.
Nache soomaye 'ena'apo':
–Qomi' nataqa'en 'am seca'ataxague.
Nache je'c soomaye, nache huenooyingui aso l-llocta', qalaxaye se'eso pe saishet da huo'o ca lalliiguishe'c. 4Qaq co'ollaq mashe yaqta'a da yo'oxoñi, nache So Jesús nachattañi neto'ot so loigue aso lapel, qalaxaye se'esoua lapaxaguenataqa saishet da ỹaỹate'n da nacheso Somaye. 5Nache So Jesús inatta'apo' soomaye, 'eeta':
–Ỹale't ¿huo'o peta'a ca qaralliiguishiqui?
Nache soomaye 'ena'apo':
–Qaica.
6Nache So Jesús 'enapegalo' soomaye, 'eeta':
–Qauasaqaiñi qome na qaralliiguiqui, qalaxaye qauasaqaigue da aloic ana qarlloctai, yaqto' huo'o ca qaralliiguishiqui.
Nache soua napaxaguenataqa ỹalaxalec de'era na'aqtac. Qaq co'ollaq ime, nache saishet da naloreguet da nqatyesheguem so lalegue'c, souaxat da ỹaguec na huetaigui nỹaq. 7Nache so lapaxaguenatac maye ỹataqta nauochaxaua So Jesús, somaye 'enapego' so Pedro, 'eeta':
–¡Nachera da Qarataxala'!
Nache co'ollaq choche hua'aqchigui de'era so Simón Pedro da nacheso So Qarataxala', nache ỹaayiñi soua alogo maye nqa't co'ollaxa da ya'aco, nache parenaxangui so 'etaxat. 8Qaq soua lỹa't napaxaguenataqa qalaq ivittra'ata so loigue da netrangui aso l-llocta', ỹauogoleeta'atalo so lalegue'c ỹataqta nlaqchigui na nỹaq, cha'aye se'eso le'ego ivi' ca cien metro ye lshequetta. 9Qaq co'ollaq ivittra so lqaxaỹaxa, nache ilaleguete so norec, qaq nache huetangui so nỹaq qataq huo'o aso nauole. 10Nache So Jesús 'enapegalo' soomaye, 'eeta':
–Ñaq huo'o ca qandoita nam nỹaqpi maye cheta'ague da qanqacheesheguem.
11Nache so Simón Pedro huenooñigui aso nllocta, nache nauogonna'ata so loigue so naleguec maye ỹataqta nlaqchigui na nỹaqpi, ndotec na lta'araic. Qaq se'eso nỹaqpi ivi' ciento cincuenta y tres. Qaq na'aictaxa da ỹataqta qalota, qalaxaye saishet da icolaxata'ague so naleguec. 12Nache So Jesús 'enapegalo' soomaye, 'eeta':
–Qauanaỹeecna'a, qauqui'i.
Nache se'esoua napaxaguenataqa saishet da huo'otaq huo'o ca ỹañoxot da inat da chaq negue't Somaye, cha'aye ỹaỹate'n da Somaye nacheso So Qarataxala'. 13Nache So Jesús nquigueuo, nache ỹacona aso nauole 'ayiiña, nache ỹanoiguilo soomaye, qataq nache 'eeta'am naqa'en so nỹaq.
14Qaq 'era da 'eetec co'ollaq mashe ivi' tres da ỹe'eguelaxalec So Jesús da nachaxanalo soua lapaxaguenataqa co'ollaq ime da mashe qaltaq nca'alec.
So Jesús detaxaỹapegue' so Simón Pedro
15Qaq co'ollaq ime da lquia'axa'c, nache So Jesús inat so Simón Pedro, 'eeta':
–'Am Simón maye 'am llalec so Jonás, ¿peta'a ỹoqta Aỹem 'arauotaxat, qaq saishet da qoneta'am ne'ena 'araỹepi?
Nache so Pedro 'enapeco':
–Aja', 'am Ỹataxala', 'am 'auaỹaten mque' da 'am sauotec.
Nache So Jesús 'enapego' somaye, 'eeta':
–'Antela'a qone' na ilopi qagueta llalaqpi.
16Nache qaltaq ỹe'eguelaxalec da inat somaye, 'eeta':
–'Am Simón maye 'am llalec so Jonás, ¿ỹoqta Aỹem 'arauotaxat peta'a?
Nache so Pedro 'enapeco':
–Aja', 'am Ỹataxala', 'am 'auaỹaten mque' da 'am sauotec.
Nache So Jesús 'enapego' somaye, 'eeta':
–'Aulo'ogue qone' ana ilopi qaguetapi.
17Nache qaltaq ỹe'eguelaxalec da inat, 'eeta':
–'Am Simón maye 'am llalec so Jonás, ¿peta'a 'eesa da Aỹem 'auauotec?
Nache so Pedro ỹataqta naquicochiguiñi, souaxat da mashe ivi' tres da ỹe'eguelaxalec da qainat da 'eesa da huo'o da lauotaxanaqtaic. Nache somaye 'enapeco':
–'Am Ỹataxala', 'am 'auaỹaten mque' 'enauac da ỹataxac, qataq 'auaỹateeta da ỹataqta 'am sauotec.
Nache So Jesús 'enapego' somaye, 'eeta':
–'Aulo'ogue qone' ana ilopi qagueta. 18Qaq ỹataqta 'eesa de'era 'am sa'axatem nagui, da co'ollaq ñaq 'am nsoqolec, qalaq 'am maiche 'aỹa'aayiñi naua 'ogo da 'ano'ot qataq 'am maiche 'oiqueetac cam 'aigue. Qalaxaye da ivita da 'am ỹa'axaiquiolec, nache 'am 'aỹa'aatrauec naua 'arhua'q qataq ỹaqa'a ca 'am no'otaxanaxan, qataq 'am qaỹaueegue cam saishet da ỹoqta 'atapeegue.
19Qaq de'era 'enapec So Jesús, damaye naigui da huotaique da ỹaỹaanaxanaxanec da 'eetec qome da l-leuaxa so Pedro qataq da 'eetec da ỹo'oxoren Ñim Lo'onatac 'Enauacna. Qaq co'ollaq ime, nache 'enapego' somaye, 'eeta':
–¡Aỹem 'auca'ategue!
So Jesús qataq so lapaxaguenatac maye nauochaxaua
20Qaq co'ollaq namatapec so Pedro, nache ila'aguet so napaxaguenaxaua maye ỹataqta nauochaxaua So Jesús, som huetaua'a co'ollaxa na laỹe co'ollaq huo'o so lquia'axa'c so na'a'q le'enaxat Lapascua, som inattac somaye co'ollaq 'eeta': «'Am Ỹataxala', ¿chaq negue't cam taỹa'a da 'am ỹaneuo?» 21Qaq so Pedro co'ollaq ila'aguet somaye, nache inattac So Jesús, 'eeta':
–'Am Ỹataxala', qaq ne'ena cha'aguet ¿chaq 'eetec qome ca taỹa'a?
22Nache So Jesús 'enapeco':
–Da Aỹem ñeshetaique da namaye nache 'eetai' da nca'altauec, choche ivitta'a qom Aỹem ñe'eguelaq, qaq ¡'aua'aqta'a qome namaye, saishet da 'atapegueua'a! 'Am, qalaxaye Aỹem qoquegue.
23Nache jec de'era na'aqtaxanaxac da huetaigui som ca'attague'pi So Jesús da se'eso paxaguenaxaua, somaye qoỹeetega da saishet da ileu. Qalaxaye So Jesús saishet da 'eetega somaye da saishet da ileu. Cha'aye de'era 'enapec, 'eeta': «Da Aỹem ñeshetaique namaye da nache 'eetai' da nca'altauec, choche ivitta'a qom Aỹem ñe'eguelaq, qaq ¡'am saishet qome da 'atapegueua'a namaye!»
24Qaq nacheso se'eso napaxaguenatac, som ỹa'axattac 'enauac de'era, qataq maiche ỹiyiñi. Qaq qomi' saỹaanaq da ỹoqta 'eesa de'era 'enapec.
25Nataqa'en ỹataqta qalota co'ollaxa na laỹepi ỹo'otpi So Jesús, qaq namayepi ctaxa da 'enauac da qoỹiyiñi, nache aỹem sepeta'a da saishet da nalolec ana 'alhua aca nerepi maye ishet da qoỹeraxaalec. Aja', nache 'eetec de'era.
Currently Selected:
Juan 21: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.