Juan 19
19
1Nache so Pilato damaxasoxoolec da qaỹaconeua'a So Jesús, nache qaiuaxan. 2Nache som alleppi ỹanaxanaxaangui na lqaic So Jesús aso lo'onata ỹaxat,#19.2 Aro'o ỹaxat: Aso aro'o ỹaxat qataq so npo' maye naueralec da ltogaxa, naigui da nachera da lo'oxoỹaxac na npo' maye iueetac na nta'alpi se'eso na'a'q. Qaq So Jesús ye lasouaxashet qanqa'en da qoỹeetega nañecteguela't da 'eetega da lta'a na judiopi, nache na huataxanaqpi maye Roma le'ecpi ỹanaxanaxaangui aso aro'o ỹaxat qataq so npo' da qaỹe'enec somaye. qataq ỹanaxanaxaanguilo soua anogo maye naueraleguete da ltogaxa. 3Qaq co'ollaq ime, nache qanquigueua'a Somaye, nache qoỹeetega, qoỹeeta':
–¡La', 'am maye 'am Lta'a na judiopi!
Nache qaiuaxaatapigui na lashec.
4Nache so Pilato qaltaq pa'auec, nache 'enapego' somayepi, 'eeta':
–Ña qauloỹa, nagui damaye ñeqatec yaqto' ishet da qauaỹaañita da aỹem qaica ca sanata lasouaxashet damaye.
5Nache qanpa'axanec So Jesús, netagui qanqoỹen na lqaic aso ỹaxat maye no'onata, qataq ỹaatrañi soua anogo maye naueraleguete na ltogaxa. Nache so Pilato 'enapego' somayepi, 'eeta':
–¡'Era dam ỹale!
6Qaq co'ollaq ila'a Somaye na lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq nam nauaatalec naxa añi no'onaxanaxaqui late'erai, nache ỹa'alqagui, 'eeta':
–¡Qaiuaxaneuo qome damaye! ¡Qaiuaxaneuo qome damaye!
Nache so Pilato 'enapego' somayepi, 'eeta':
–Qauaviquiiuec qone' damaye, nache maiche qauaxañiiuo, cha'aye aỹem saishet da huo'o ca sanata lasouaxashet damaye.
7Qalaxaye na judiopi 'enapeco':
–Qomi' huo'o dam nqataxac maye qomi' qoỹanema co'ollaxa, qaq damaye 'enapec ye ishet da qaỹalauat ca 'ena'am de'era, cha'aye damaye 'eetega da Llalec Ñim Lo'onatac 'Enauacna.
8Qaq co'ollaq hua'axaỹa de'era so Pilato, nache ỹataqta nquictec da lcolanaxa. 9Nache qaltaq taigui aso lo'onataxanaxaqui, nache qaltaq inattac So Jesús, 'eeta':
–¿Chaq hua'ague ca ỹoqta 'auachegoqta'ague?
Qalaxaye So Jesús saishet da ỹasat.
10Nache so Pilato 'enapego' Somaye, 'eeta':
–¿Qalaq saishet da aỹem 'auasateguet? ¿Sa 'auaỹateno' peta'a da aỹem huo'o da shenec da samaxasoxoolec da 'am qaiuaxaneuo, qataq da seshet da 'am sesouec?
11Nache So Jesús 'enapeco':
–'Am qaica ca qonec da huo'otaq saishet da 'am ỹanem Ñim Lo'onatac 'Enauacna ca 'ara'añaxac, da yaqto' ishet da huo'o ca 'auo'otec Aỹem. Qaq ỹoqo'oye cam Aỹem ỹaneua'a 'am, camaye ỹataqta ỹactec da lta'araic da lasouaxashet, qaq saq 'ena'am da qoneta.
12Huaña, nache so Pilato nmittaique ca lataxac, da yaqto' ishet da isouec So Jesús, qalaxaye na judiopi ỹataqta ỹa'alaqtagui, 'eeta':
–¡Da 'am 'ausouec damaye, nache saishet qone' da 'anauochaxaua ñim lta'a na nta'alpi maye neta'ague da Roma! ¡Cha'aye camachaqca ca huotaique da maiche ỹoiqueetac ca ỹo'ot da 'eetega da nta'a, nache camaye npa'aguenaxaua ñim lta'a na nta'alpi!
13Nache so Pilato co'ollaq hua'axaỹa de'era, nache damaxasoxoolec da qanqatec So Jesús. Nache somaye nso'ootaña som huaña da qanmit ca nasouaxashet, maye qaỹamata'ac da le'enaxat Gabata nam hebreo la'aqtaqa. Damaye naigui da ndotec na coma' ca napiaqa'. 14Qaq se'eso na'a'q nacheso so pa'aiguet som na'a'q maye le'enaxat Lapascua. Qaq mashe na'a'q laiñi co'ollaq so Pilato 'eetega na judiopi, 'eeta':
–¡'Era dam qarta'ai!
15Qalaxaye somayepi ỹa'alaqtagui, 'eeta':
–¡Qaỹalauat qome damaye! ¡Qaỹalauat qome damaye! Qataq ¡qaiuaxaneuo qome!
Nache so Pilato 'enapeco':
–¿Peta'a isheto' da aỹem seuaxaneuo dam qarta'ai?
Qalaxaye som lataxala'pi na ntaxaỹaxanaxanecpi 'enapeco':
–Qomi' qaica ca lỹa qarta'a, nachaqñita ñim lta'a na nta'alpi maye neta'ague da Roma.
16Huaña, nache so Pilato ỹanoigui So Jesús somayepi da yaqto' iuaxaneuo. Nache somayepi ỹauec Somaye.
Da 'eetec co'ollaq qaiuaxaneuo So Jesús
(Mateo 27.32-44; Marcos 15.21-32; Lucas 23.26-43)
17Qaq co'ollaq ime, nache qanayecot So Jesús, maiche ỹachetac qanqa'en so npe'enaxaqui, da nqo'oneuga so 'alhua maye qaỹamata'ac da nqaic lpi'inec lma'. Qaq nam hebreo la'aqtaqa ỹamata'ac Gólgota. 18Qaq huaña yemaye, nache qaiuaxaneuo So Jesús, nataqa'en soua dos ỹale't. So 'oonolec soomaye pa'ata'ague qanqa'en da aloic, qaq so lỹa pa'ata'ague da ne'emaq. 19Nache so Pilato damaxasoxoolec da qoỹanagui na pa'asheguem so qo'oipaq so nerec maye 'eeta': «Jesús Nazaret le'ec, maye Lta'a na judiopi.» 20Qaq ỹataqta qalota na judiopi na itaxaỹaxaatac se'eso nerec, cha'aye se'eso 'alhua maye huaña co'ollaq qaiuaxaneuo So Jesús, somaye saqaỹapeque so nỹecpi. Qaq se'eso nerec qoỹettrañi naua la'aqtaqa na hebreo qataq griego qataq na latín. 21Qaq ỹoqo'oye na lataxala'pi na ltaxaỹaxanaxanecpi na judiopi 'eetego' so Pilato, 'eeta':
–Saishet qome da 'iyiñi da ñimaye «Lta'a na judiopi.» Nachaqrata da 'iyiñi da «Ñimaye maiche 'eetega da lta'a na judiopi.»
22Qalaxaye so Pilato 'enapego' somayepi, 'eeta':
–Dam shiyiñi, damaye nache 'eetai' qome da nanettañi.
23Qaq so huataxanaqpi co'ollaq imat da iuaxaneuo So Jesús, nache ỹaconalo soua alogo, nache icolaxatapiguilo cuatro naqa'en naua laỹel ime, nache naloguilo soomaye. Qataq ỹacona aso lapoto, qalaxaye asomaye ye ima'a't qaica ca ltetaxat, 24nache soua huataxanaq lashe' 'ena'apo':
–Saishet qome da secolaxataqa'ague anamaye. Nachaqrata da ñalletaxagui, yaqto' saỹaanaq chaq negue't ca talec.
Huaña, nache ỹataqta ipacchiguilo da 'ena'ape naua nanettrañi la'aqtaqa Ñim Lo'onatac 'Enauacna maye 'eeta': «Qanaloguilo qome naua aỹogo, qanallichiguilo da yaqto' huo'o ca talec.»
25Qaq se'eso npe'enaxaqui So Jesús, nache saqaỹapeque ca huetaua'a aso late'e, qataq aso lỹa María maye lhua so Cleofas asom lasoro So Jesús, qataq aso María maye lma' ye Magdala. 26Nache So Jesús co'ollaq ila'a aso late'e da nachattañi, huaqta'ai' som lapaxaguenatac maye ỹataqta lauotaxat, nache 'enapego' aso late'e, 'eeta':
–'Am 'alo, 'era qome da 'aỹa'alec.
27Ime, qataq 'enapego' so lapaxaguenatac, 'eeta':
–'Ara qome ara 'arate'e.
Nache chegoqchiguiña se'eso na'a'q da se'eso lapaxaguenatac ỹauegueua'a so lma' aso María.
Da l-leuaxa So Jesús
(Mateo 27.45-56; Marcos 15.33-41; Lucas 23.44-49)
28Qaq So Jesús co'ollaq ỹaỹaten da mashe ipacchigui 'enauac nam ỹamaxalec Ñim Lo'onatac 'Enauacna. Qaq ỹoqo'oye da yaqto' ipacchiguilo naua nanettralec ana nere maye huetalec na la'aqtacpi Ñimaye, nache Somaye 'enapeco':
–Huo'o na ỹaquip.
29Qaq huo'o aso ỹomaxaqui nlaqchigui na lataxa 'euaxaic. Nache qaipet aso 'eeta'am ana auol, nache qoỹanagui aso coqta maye le'enaxat hisopo. Nache qoỹaasheguemec da yaqto' napigoxoi'. 30Nache So Jesús nỹomgui se'eso lataxa 'euaxaic. Ime, nache 'enapeco':
–Nagui mashe 'enauac ipacchigui.
Huaña, nache naqchiguiñi na lqaic, nache ileu.
So ale ỹa'areua'a na laỹe So Jesús aso lataquiaxai
31Qaq se'eso na'a'q, nache pa'aiguet so na'a'q maye huetoigui da qaiuennate so na'a'q le'enaxat Lapascua. Nache na lataxala'pi na judiopi sa ỹaỹamaxaren da nache netragui da lo'ocỹaxa'c soomaye soua npe'enaxaqui' se'eso na'a'q mataxaqui. Cha'aye se'eso na'a'q ỹataqta ỹactec da qairen. Qaq ỹoqo'oye qaiỹaxanot so Pilato da yaqto' damaxasoxoolec da qaỹacagaxa't naua lchel soua tres ỹale't maye qaiuaxaatrauo, da yaqto' saqaỹaloq da ileu', nache qaiỹalapegueto da qanqaayiñi da lo'ocỹaxa'c soomaye. 32Nache soua ale't je'c, nache ỹacagaxa't naua lchel soua npe'enaxau' So Jesús. 33Qalaxaye co'ollaq nqo'onalo So Jesús, nache ilora'a da mashe ileu, nache saishet da inoxo'n naua lchel.
34Qalaxaye so 'oonolec soua ale't, somaye ỹa'areua'a na laỹe So Jesús aso lataquiaxai, nache anac so ltago'q qataq so 'etaxat. 35Qaq som ỹa'axat de'era, somaye co'ollaxa ỹauaachigui qataq ỹataqta 'eesa de'era 'enapec. Cha'aye somaye ỹaỹateeta da ỹataqta 'eesa de'era la'aqtac, yaqto' qami' nataqa'en ishet da qaua'amqaanataxañi. 36Cha'aye de'era qanayeuaigui, damaye yo'oq, yaqto' ishet da ipacchigui da 'enapec naua nanettralec ana nere maye huetalec na la'aqtacpi Ñim Lo'onatac 'Enauacna maye 'eeta': «Saishet qome da huo'o ca qainoxon naua lpi'ineqa.» 37Qataq ye lỹa nanettañi, 'eeta': «Ỹauaachigui qome nam ỹa'arapec Somaye.»
So Jesús qailareñi
(Mateo 27.57-61; Marcos 15.42-47; Lucas 23.50-56)
38Qaq co'ollaq ime de'era, nache so José maye lma' ye Arimatea, somaye iỹaxanot so Pilato da yaqto' irouec so lo'ocỹaxac So Jesús. Qaq se'eso José, somaye quetague' So Jesús, qalaxaye saishet da ỹoqta nachaxaata, souaxat da ñe'etega na lataxala'pi na judiopi. Nache so Pilato ỹanem somaye dam iỹaxaneua'a, nache jec so José da irouec so lo'ocỹaxac So Jesús. 39Qaq nataqa'en so Nicodemo, maye huo'o so pe co'ollaq naua'a da detaxaỹapegue' So Jesús, somaye nachetac so treinta kilos na qaỹalecna't qo'oipaq lcha'q, le'enaxat mirra qataq áloe. 40Nache so José qataq so Nicodemo, soomaye iroue'c so lo'ocỹaxac So Jesús, nache ỹaxateguelo so laxataxat hualoq laỹe maye ỹataqta late'erai añi lasheue, ime nache qaỹa'amñigui se'esoua qaỹalecna't qo'oipaq lcha'q maye ama na laita, cha'aye damaye maiche lataxac na judiopi da ivita da ilayiñi na lqatacpi. 41Qaq se'eso 'alhua maye huaña co'ollaq qaiuaxaneuo So Jesús, somaye huo'o so nañiguishe lma', qaq somaye nache naigui aso huachiqui dalaxai maye saxanaxa da huo'o ca qaỹachangui. 42Qaq asomaye nache qaỹachangui So Jesús, cha'aye asa'aso huachiqui, asomaye saqaỹapeque, qataq souaxat da mashe yaqta'a da ivita da nnoxoneuo so nmataxaqui na judiopi.
Currently Selected:
Juan 19: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.