Esdras 1
1
So lapaxañi lataxac so nta'a Ciro
1Qaq so la'auaxanec vi'i da lo'onataxanaxac so Ciro, maye nta'a ye Persia, Ñim Nataxala' ỹanem da lhuennataxac somaye, da yaqto' ỹamaxalec 'enauac so hueta'a so ilotague' 'alhuapi da qaỹa'axatec so ỹan la'aqtac. Huaña nache ipacchigui da la'aqtac Ñim Nataxala', maye ỹanem co'ollaxa so la'aqtaxanaxanec Jeremías, nam nasaxauec la'aqtacpi somaye qataq nam qoỹettañipi, maye 'eeta': 2«Qaq 'era da la'aqtac ñi nta'a Ciro, maye nta'a ye Persia, 'eeta': Ñim Lo'onatac 'Enauacna maye neto'ot na piguem, Ñimaye lalamaxat 'enauac na huetalec ana 'alhua, qaq Ñimaye aỹem ỹanem da aỹem lta'a 'enauac na nta'alpi naua 'aleu'. Ñimaye aỹem ỹamaxalec, da ño'oxoosheguem aca atamnaxaqui ye Jerusalén, maye huaigui ye 'alhua Judá. 3Ỹoqo'oye da qoñeeta da huo'o ca camachaqca da chegoqchiguiña ye 'alhua Judá da jec, da taỹa ye Jerusalén da no'oxoosheguem aca atamnaxaqui maye lalamaqte Ñim Nataxala' maye Natamnaxala' ye Israel le'ecpi maye netaña ye Jerusalén, nache Ñim Lo'onatac 'Enauac hueta'aguet qome. 4Qataq camachaqca nam lca'alaxaicpi, da jec chegoqchiguiña ca lma' maye hueta'a nagui, nache cam lauoreuapi itauan qome ỹanem ca lcat plata, oro, nogoxoshetpi, qataq ca 'atetpi, qataq ca maiche ỹan lachetaqtaxanaxat da ỹamaxa aca atamnaxaqui maye lalamaqte Ñim Nataxala' maye naña ye Jerusalén.»
So Israel le'ecpi ỹe'eguelaxa ye Jerusalén
5Qaq huaña, nache so lataxala'pi so nhuo' le'ecpi maye chegoxoguetpi so Benjamín qataq so Judá, huaxaiguet so ntaxaỹaxanaxanecpi qataq so leviitapi, qataq 'enauac som ỹachegoxotchigui Ñim Lo'onatac 'Enauacna da ỹanem da lhuennataxac da taỹa ye Jerusalén, da yaqto' no'oxoosheguem aso atamnaxaqui maye lalamaqte Ñim Nataxala'. 6Nache 'enauac so lauoreuapi somayepi itaunec so lcat plata, oro, nogoxoshetpi, 'atetpi qataq so no'on nogoxoshetpi, nataqa'en aso qalota ỹotta'a't nachetaqtaxanaqtepi maye maiche chegoqchigui ñi 'oonolec somayepi da ỹaneuo. 7Huaña nache so Ciro, maye nta'a ye Persia, damaxasoxoolec da qaỹe'eguelaxat so nogoxoshetpi maye lalamaxat aso atamnaxaqui maye lalamaqte Ñim Nataxala', maye so nta'a Nabucodonosor nqateeguesop co'ollaxa ye Jerusalén, nache ỹanaigui so lma' so natamnaxala'pi somaye. 8Ime, nache so Ciro ỹanem so Mitríades, maye ilotague' aso alom so nta'a. Qaq somaye co'ollaq imat da naloqteetega't, nache ỹanem so Sesbasar, som lataxala' so lma' ye Judá. 9Nache so naloqñiguishecpi nogoxoshetpi, ivi' treinta aso ỹomaxaquipi late'eraipi oro, qataq mil aso ỹomaxaquipi late'eraipi plata, qataq veintinueve so ỹeelonecpi, 10qataq treinta aso ỹomaxaquipi oro, qataq cuatrocientos diez aso ỹomaxaquipi lcat plata maye saqallegueme da no'on, qataq ivi' mil so laỹepi ỹotta'a't nogoxoshetpi. 11Qaq da ima'a't 'enauac se'eso nogoxoshetpi maye chegaqaigui so oro qataq so plata, nache ivi' cinco mil cuatrocientos. Qaq 'enauac se'eso nogoxoshetpi ỹache so Sesbasar co'ollaq ỹe'eguelaxa ye Jerusalén, lỹatec so judiopi som hueta'a ye Babilonia maye noxonecpi co'ollaxa.
Currently Selected:
Esdras 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.