Ezequiel 1
1
Da lauanaqchec so Ezequiel
1So na'a'q cinco so ca'agoxoic cuatro, so vi'i treinta, nache aỹem Ezequiel sooto'ot na loigue ye tala Quebar, salectaigui so ncoñeteguishecpi. Nache nque'elaxatta da nauatoigui na piguem, nache huo'o so ỹauanaqchec chegoqo'ot Ñim Lo'onatac 'Enauacna. 2Qaq mashe inoxoorec soua cinco vi'iye, qataq soua cinco ca'agoxoiqa da so nta'a Joaquín noxonec co'ollaxa, nache qaỹauec. 3Qaq aỹem Ezequiel maye aỹem llalec so Buzí maye aỹem ntaxaỹaxanaxanec, se'eso na'a'q soota'a ye na'alhua na caldeopi, yem loigue ye tala Quebar, nache aỹem nvita so la'aqtac Ñim Nataxala', qataq aỹem ỹashel-lec Ñimaye. 4Qaq huaña nache sela'aguet so la'at lta'araic chegoxogue da sheu', qataq so lta'araic lo'oc na piguem maye chegoqtapoigui so norec, 'eeta'am na nqashelgaxa, qaq naua loiguiye somaye nache huo'o so ne'eraxa. Qaq na laiñi se'eso norec huo'o so 'eeta'am na lcat bronce da lqashelgaxa, 5qaq na laiñi se'eso lo'oc nache huo'oi soua huetraigui cuatro maye huo'o da lca'alaqa', 'eeta'ama da lataxa'c na shiỹaxaua. 6Qaq ñi 'oonolec soomaye, cuatro naua lashego qataq cuatro naua laua't, 7qaq naua lchel qalaq ỹashectrec, qaq naua nna'ache qalaq 'eeta'ama naua nna'ache na huaca llalec, qataq qashelectrapiguiñi, 'eeta'am na nqashelgaqtac bronce. 8Qataq huo'oi naua lashego qataq naua laua't naua cuatro laỹel, qaq naua pa'aguiyiñi naua laua't, nache huo'oi naua lhuaxaye, 'eeta'am na shiỹaxaua lhuaq. 9Qaq soua laua't qalaq ivira'a't, qaq da je'c nache saishet da nqoile'c nacherata da jec ñi 'oonolec, nache ỹalemaqtec. 10Qaq da lasheguiỹaxa'c se'esoua cuatro da lataxa'c, 'eeta': Na dataỹaueegue qalaq 'eeta'am da lasheguiỹaxac na shiỹaxaua, qaq so pa'aigue na aloic qalaq 'eeta'am na llon, qaq so pa'aigue na ne'emaq qalaq 'eeta'am da lasheguiỹaxac na huaca lhuaraic, qaq so pa'aigue na l-laq qalaq 'eeta'am da lasheguiỹaxac na vi'ic. 11Qaq 'era da 'eeteque soua lashego soomaye. Qaq huo'oi soua dos laua't da ỹauattaguilo qataq ivira'a't, qataq dos soua ỹapotaleguete da lo'ocỹaxac. 12Qaq 'enauaque soomaye da ỹashectrec da je'c, nache saishet da ñe'eguelaq. Qataq nache taigue cam ỹauegueregue da la'añaxac Ñim Lo'onatac 'Enauacna. 13Qaq da lataxa'c se'esoua maye huo'o da lca'alaqa', qalaq 'eeta'am ana poqo da 'ettaigui, huo'otaq aca ncoỹaraxanaqte da deratapigui', qaq so norec qalaq ỹataqta chauec na le'eraxa, qataq nache chegoqtapoigui na nqashelgaxa. 14Qaq se'esoua maye huo'o da lca'alaqa' jec naxa, qaltaq ñe'eguela'q, 'eeta'am da layaqchec na nqashelgaxa.
15Qaq aỹem samata'alo se'esoua maye huo'o da lca'alaqa', nache sela'a da na mpa'aguiñi ñi 'oonolec soomaye, huo'o aso saxanna huetaña na 'alhua. 16Qaq se'esoua cuatro saxannal soomaye nache 'eeta'a't da lataxa'c, qashelectrapiguiñi, 'eeta'am da lqashelgaxa na coma' topacio. Qaq se'esoua saxannal, 'eeta'am da huo'o aso lỹa pa'aỹauo. 17Qaq se'esoua saxannal, soomaye ishet da camachaqca ca dataregue, nache saiuen da ncolliiyiñi. 18Qataq sela'a da se'esoua cuatro saxannal da huo'oi soua colliichiguilo maye coleesopa soomaye, qaq soomaye nlaqchiguilo ana la'aitepi. 19Qaq se'esoua maye huo'o da lca'alaqa' da je'c naxa, nache nataqa'en soua saxannal je'c, qaq naxa da soua huo'o da lca'alaxa da naỹoxooyeshegue'm, nache nataqa'en soua saxannal naỹoxooyeshegue'm. 20Qaq se'esoua maye huo'o da lca'alaqa' taregue naxa cam ỹauegueregue da la'añaxac Ñim Lo'onatac 'Enauacna, qaq nataqa'en soua saxannal da taregue cam dataregue soomaye, cha'aye se'esoua saxannal na'atta'agueta soua huo'o da lca'alaqa'. 21Qaq naxa da je'c se'esoua huo'o da lca'alaxa, nache nataqa'en se'esoua saxannal da je'c, qaq soomaye naxa da vi'iigueta, nache nataqa'en soua saxannal da vi'iigueta, qaq naxa da se'esoua huo'o da lca'alaxa da naỹoxooyeshegue'm, nache nataqa'en soua saxannal naỹoxooyeshegue'm, cha'aye se'esoua saxannal na'atta'agueta soua huo'o da lca'alaqa'.
22Qaq na nalotcheguemec naua lqaigo, soomaye, nache huo'o so 'eeta'am da lapoxot, somaye ỹataqta qashelecteguiñi, 'eeta'am na ỹataqta 'onaxaic chauec. 23Qaq na pa'aguiñi se'eso 'eeta'am na lapoxot, nache hueto'oto soua ỹauattaguilo laua't se'esoua huo'o da lca'alaqa', qaq añi 'oonole nache ivira'aguet añi lỹa laua. Qaq soua dos lỹa't laua't soomaye, nache ỹapotaleguete da lo'ocỹaxac. 24Qaq nataqa'en sa'aqchigui da l-lamaxa soua laua't naxa da je'c, qaq 'eeta'am da l-lamaxa na 'etaxat so tala da huo'o na ndep, qataq 'eeta'am da lavilỹaxac Ñim Qaica ca Ỹaqalanapec, qataq 'eeta'am da l-lamaxa ca qalota alleppi. Qaq naxa da vi'iigueta soomaye nache nauaxaỹaxaayiñi soua laua't. 25Nache huo'o so nvilỹaxac chemaqtelec na pa'asheguem se'eso 'eeta'am ca lapoxot maye ỹapotaleguete naua lqaigo soomaye. 26Qaq na pa'asheguem se'eso 'eeta'am ca lapoxot, qalaq sela'a aso 'eeta'am aca so'onaxaqui maye chegaqaigui na coma' zafiro, qaq na pa'asheguem asa'aso 'eeta'am aca so'onaxaqui, qalaq huo'o so hueta'a 'eeta'am na shiỹaxaua. 27Qaq somaye sela'a da chegoqchiguiña na lasot nache tasheguema na pa'asheguem so qashelecteguiñi 'eeta'am ca lcat nqatelliguishec da 'ettaigui, qataq sela'a so chegoqchiguiña na lasot nache taña na pa'aguiñi, so 'eeta'am na norec. Qataq coleesop somaye so yo'oqchiguiñi, 28'eeta'am da lataxac so quemoxonalo da nachaxan huetaigui na lo'oc na piguem da ime na auot. Qaq 'era da 'eetec da aỹem nachaxana da llo'oxoyec Ñim Nataxala'. Qaq co'ollaq sela'a nache sa'alyiñi naua illecte nache seviraxata'aguet na ỹatap na 'alhua.
Currently Selected:
Ezequiel 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.