Éxodo 1
1
Da nque'eenaxac so Israel llalaqpi co'ollaq netaña ye Egipto
1Qaq 'ena na le'enaxatpi so llalaqpi so Israel, maye da lỹa le'enaxat Jacob, som lỹateuo co'ollaq ivireua'a ye Egipto, qataq ñi 'oonolec somayepi nache ỹataqtac som maiche lalamaxat llalaqpi: 2Rubén, Simeón, Leví, Judá, 3Isacar, Zabulón, Benjamín, 4Dan, Neftalí, Gad qataq so Aser. 5Qaq da ima'a't se'eso shiỹaxauapi maye chegoxoguetpi so Jacob, nache ivi' setenta. Qaq so José qalaxaye nache 'eetai' da netaña ye Egipto.
6Qaq co'ollaq mashe ileu so José qataq so lqaỹañecpi, qataq 'enauac som lauo' le'ecpi maye naloxouapi, 7qalaxaye so Israel le'ecpi huo'o da lco'oxoc qataq mashe qalota na llalaqpi, nache nquictauec ye lcata ivitta'a da ỹataqta 'añaxaicpi. Nache yi'iye 'alhua ỹataqta nlaqtelec somayepi co'ollaxa.
8Qaq co'ollaq mashe qaỹoqteguelo soua vi'iye, nache huo'o so dalaxaic nta'a da yaqto' ilo'ogue ye Egipto. Qaq somaye saishet da ỹauatton so José, qataq nache 'enapego' so lauo' le'ecpi, 'eeta': 9«Ña qaumichiñi ne'ena nhuo' le'ecpi maye llalaqpi so Israel, namayepi mashe qalota qataq ỹataqta 'añaxaicpi, qataq mashe qomi' napacaleguete. 10Qaq ỹoqo'oye selaqaique qome ca lataxac da yaqto' saishet da nache 'eetai' da nquictauec namayepi, cha'aye saiuena'a da huo'otaq huo'o ca alaataxac, nache namayepi ỹalegoigui ca qampa'aguenaxauapi, nache qomi' deloguito qataq nache ca'ai ne'ena 'alhua.»
11Huaña, nache so Egipto le'ecpi ỹauo'o so nalleppi da ilo'ogue naqa'en so Israel llalaqpi, da yaqto' sa ỹala'ac da ỹo'onataxanaxan. Ime, nache qaỹo'onataxanaxanec da no'oxoosheguem qanqa'en so huaqta'a't nỹecpi ye Pitón qataq ye Ramesés, maye laỹamaqtaxanaqa' so faraón da ỹaỹamaxat na nallec. 12Qalaxaye co'ollaq ỹapac da sa qaỹauo'o ca nyacnataguec somayepi, nache nataqa'en lamaaxa nquictauec na llalec da ỹataqta qalota. Nache so Egipto le'ecpi ỹataqta huo'o da lcolanaxa, ñi'iỹa somayepi.
13Ỹoqo'oye somayepi ỹataqta lta'araic naqa'en da nque'eenaxac so Israel llalaqpi da ỹo'onataxanaxan. 14Qataq qaica ca lamaic naqa'en da nachaalataxac, cha'aye ỹamaxalec da ỹo'ottac na nshaxa qataq na losoc qataq 'enauac na laỹe no'onatacpi maye huauga na nanaxanaqa'pi. Qaq 'era da 'eetec da nlataguec so Israel le'ecpi da ỹataqta sa qaichoxonnai'. 15Qaq yi'iye 'alhua Egipto nataqa'en huo'oi soua dos 'alo hebreo lashe maye itauaatrac naxa ana Israel lashepi da ivita da deco'o nache nvigoqtrapiguiñi, qaq da le'enaxat aso 'oonole Sifra qaq aso lỹa Púa. Qaq so nta'a iỹaxanalo co'ollaxa nache 'enapegalo', 'eeta':
16«Da ivita da qanvigoqoiñi ana hebreo lashepi da deco'o, nache qaumichiñiita cam ñiguiñi llalec da ỹale, nache qaualauache, qaq da 'alo, nache qauauaqaita'a da nca'altauec.»
17Qalaxaye aso Sifra, qataq aso Púa, ỹataqta huo'o da lcolanaqa' Ñim Lo'onatac 'Enauacna, ỹoqo'oye saishet da ỹo'o't da lamaxasoxonaxac so nta'a maye ilotague' ye Egipto. Nachaqrata da nca'altauec naqa'en da ñiguiñi na ỹale. 18Qaq ỹoqo'oye so nta'a maye ilotague' ye Egipto iỹaxaneugalo co'ollaxa, nache 'enapegalo, 'eeta':
«¿Ta'ainco' da nache nca'altauec qanqa'eñi na ỹale da ñiguiñi?»
19Nache soomaye 'ena'apo':
«Qomye anam hebreo lashepi saishet da 'ena'am ana Egipto lashepi, cha'aye ỹataqta huo'o da lquesaxanaxa, ỹoqo'oye da ñaq saxanaxa da souaqapegue', nache sogote da mashe deco'o.»
20Qaq ỹoqo'oye 'era da 'eetec da na Israel le'ecpi 'añaxaicpi qataq nquictauec da ỹataqta qalota. Qaq Ñim Lo'onatac 'Enauacna ỹataqta ỹaỹamaxareete' soua Sifra qataq aso Púa, 21qataq nache ỹanema da ỹataqta qalota na llale'c, cha'aye soomaye huo'o da lcolanaqa'. 22Qaq so faraón, nache 'enapego' 'enauac so lauo' le'ecpi, 'eeta':
«'Enauac na ñiguiñi nogotolec maye llalec na hebreo le'ecpi qauasaqaiñigui qome ye tala, qaq ana nogotole, nache qauauaqaita'a qome da nache nca'altauec.»
Currently Selected:
Éxodo 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.