Hechos 1
1
So Jesús ỹa'axata'aguet da lviraxac So Saqcha'a Na'añaxac Qui'itta
1'Am ỹo'oxoraic ñauochaxaua Teófilo, aso hua'auchiguiñi ỹere#1.1 Hua'auchiguiñi ỹere: Se'eso deraxan maye nacheso so Lucas, somaye 'eetega aso hua'auchiguiñi lere maye ỹa'axat da no'on na'axaỹaxac. maye 'am samaxa co'ollaxa, shiyiñi 'enauac nam ỹo'otpi co'ollaxa So Jesús qataq nam lapaxaguenataxanaxacpi co'ollaq cheta'ague da do'onataxan, 2choche ivitta'a so na'a'q co'ollaq taigue da piguem. Qaq Somaye co'ollaq saxanaxa da taigue da piguem, nache ỹachegoxotchigui So Saqcha'a Na'añaxac Qui'itta da ỹanema da lapaxaguenataxanaxac soua lamaxa'she maye lca'agui'she, dam iuen da ỹo'o't soomaye. 3Qaq co'ollaq ime da l-leuaxa, nache So Jesús qaltaq nachaxanalo soua lamaxa'she, qaq ivi' naua cuarenta na'axa'te da jec da nachaxanaxac. Qaq de'era nachaxanaxac ỹa'axat da Somaye ỹoqta 'eesa da nca'altauec. Nache Somaye da'aqtaxaatapeguema soomaye da lo'onataxanaxac Ñim Lo'onatac 'enauacna.
4Qaq co'ollaq ñaq hueta'agueta soua lamaxa'she, nache So Jesús huaqattegalo soomaye da saishet da quera'ai ye Jerusalén, 'eeta':
–Qauachiỹa'aguet qome cam ỹachaxanapec Ñim Ita'a maye qami' ỹanema, dam mashe qami' sa'aqtaxaateguema. 5Cha'aye 'eesa da so Juan dachelaxanataxangui na 'etaxat, qalaxaye naua lỹa't na'axa'te Ñim Lo'onatac 'Enauacna, qami' nachelaxanguilo ca Saqcha'a Na'añaxac Qui'itta.
So Jesús taigue da piguem
6Qaq soua lamaxa'she co'ollaq ñaq huetra'aguet So Jesús, nache inattrac Somaye, 'eetra':
–'Am Qarataxala', ¿peta'a nachena nagui na laloxoqui da qaltaq nauaqsheguem 'anqa'en na Israel le'ecpi da huo'o ca maiche lta'a?#1.6 Maiche lta'a: Da lỹa maye ishet da neraxanaxac 'eeta': ¿Peta'a nachena na na'a'q da 'am lta'a na Israel le'ecpi?
7Qalaxaye So Jesús 'enapeco':
–Qami' saishet da qami' qaỹaỹaanaxanaxaneque ca na'a'q huo'otaq cam laloxoqui de'era, cha'aye chaqñeta Ñim Lo'onatac 'Enauacna maye huo'o naq 'enec da huo'o ca ỹo'ot. 8Qalaxaye qom qami' nvitalo ca Saqcha'a Na'añaxac Qui'itta, nache qami' taỹoto qome ca na'añaxac, nache qoqui da Aỹem qaua'axache, da qaua'aqtaxañim nam netaña na Jerusalén, qataq nam netaña ye 'alhua Judea qataq ye Samaria, qataq choche qaviyeeta'a ca ỹataqta pa'atec ana 'alhua.
9Qaq co'ollaq ime da ỹa'axattac de'era So Jesús, nache ỹauaachiguilo soomaye co'ollaq naỹoxotcheguem da qaỹaueegue da piguem. Choche ivitta'a da huo'o so lo'oc na piguem, nache taigui. Huaña, nache saishet da qaila'a. 10Qaq soomaye co'ollaq ña ilotrague' So Jesús maye taigue da piguem, nache nachattreuo soua dos ỹale't lapagaxaiqa naua alogo da nachaxanalo soomaye. 11Qaq se'esoua ỹale't 'ena'apo':
«Qami' Galilea lashe', ¿ta'ainco' ye qauloito'ot na piguem? Se'eso Jesús maye qami' nallegoqtoiguilo, taigue da piguem, Somaye qome qaltaq ñe'eguelaq. Qaq que'eca lle'eguelaxasoxoc, nache 'eeta'am qome de'era llecỹaxac maye qauauañiichigui.»
So Matías talec da lo'onataxanaxac so Judas
12Nache soua Jesús lamaxa'she quera'ai aso qaỹoqotcheguemec 'alhua maye nanqa' ana Olivo, nache ỹe'eguelaxareua'a ye Jerusalén. Qaq sa qaỹalec ca lqueuoqo't, cha'aye nacheye yem tachiguiña ye nqueuoqo' ye na'a'q mataxaqui. 13Qaq co'ollaq ivildeua'a ye Jerusalén, nache taresheguemec ca pa'asheguem ca nỹec maye lanataqa't. Qaq na le'enaqa'ate soomaye: Pedro, Santiago, Juan, Andrés, Felipe, Tomás, Bartolomé, Mateo qataq so Santiago maye Alfeo llalec, qataq so Simón maye chegaqaigui nam dataỹa'aguet naxa na nta'alpi, qataq so Judas maye lqaỹa so Santiago. 14Qaq 'enauaque soomaye nache 'eetai' da lapoota'a't da nqouagaxaueeta'ape, ỹalectra'agueta aso late'e So Jesús, qataq soua lqaỹa't, qataq so laỹepi 'alpi.
15Qaq se'esoua na'axa'te, nache so Pedro nachangui na laiñi so lqaỹañecpi maye ivi' ye ciento veinte shiỹaxauapi. Nache 'enapega, 'eeta':
16«Qami' ỹaqaỹa't, ỹataqta ipacchigui co'ollaxa da la'aqtac So Saqcha'a Na'añaxac Qui'itta maye nanettañi co'ollaq ỹa'aqtaxanaxan so David, da ỹa'axata'a da so Judas nacheso som ỹaueca'aguet co'ollaxa som ỹaconeua'a So Jesús da icoñi'. 17Cha'aye so Judas maiche qarỹa qataq qartaua de'era qaro'onataxanaxac. 18Qalaxaye somaye co'ollaxa jec, nache desheenaxana so 'alhua, desheetenaxana asom lasheue co'ollaxa da lle'etaxaloxo. Qaq co'ollaq ime, nache naañi, ỹa'atchiguiñi na lqaic, nache dachipiỹa'ague, nache nmauec na lailshecpi. 19Qaq nam shiỹaxauapi maye netaña na Jerusalén co'ollaq ỹaỹaten de'era, nache ỹanagui yi'iye 'alhua da le'enaxat ‹No'onaxa maye lasheue soua ntago'q.› 20Qaq ipacchiguilo naua na'aqtaqa maye nanettaleguete ana nere le'enaxat Salmos da, 'eeta':
Ca lma' camaye ỹataqta toolec,
qataq qaica ca netalec.
Qataq so lỹa na'aqtac 'eeta':
Da lo'onataxanaxac huo'o qome ca talec qanqa'en.
21Qaq ỹoqo'oye iuen da lleca'aqaique ca 'oonolec ỹale nam nache 'eetai' da qomi' nnaictagueto co'ollaq ñaq qomi' hueta'agueta So Qarataxala' Jesús, 22chegoqchiguiña co'ollaq cheta'ague da nachelaxan so Juan qataq ivitta'a co'ollaq Somaye da taigue da piguem. Qaq ỹoqo'oye no'on da huo'o ca qalca'aua'a da qomi' qaỹalecnoiguilo, da yaqto' nataqa'en ỹa'axat da So Jesús mashe qaltaq qanca'alaxatec.»
23Nache qaỹaconeua'alo soua dos somayepi: so José, maye da le'enaxat lỹa Barsabás, da ỹataqta qaỹauatton Justo, qataq so Matías. 24Nache qanqouagaxaueeleguete soomaye, qoỹeeta':
«'Am Qarataxala', 'am maye 'auauatton 'enauac da lquiyaqteỹaxac 'enauac na shiỹaxauapi, ña 'auachaxan ca 'oonolec ne'enaua dos cam 'arca'aguishec, 25da yaqto' talec da lo'onataxanaxac so Judas maye iqataqchet souaxat dam lasouaxashet, nache ivireguet dam ỹataqta 'itchiguiñi naigui dam ỹo'ot.»
26Qaq co'ollaq ime de'era, nache qaỹauo'o so alletaxac, qaq se'eso alletaxac taalec so Matías. Huaña, nache somaye qaỹalecnoiguilo se'esoua once namaxa'she.
Currently Selected:
Hechos 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.