2 Crónicas 1
1
So Salomón iỹaxanaique laỹaanec
1So Salomón, som llalec so David, co'ollaq mashe naỹamaxalec da lo'onataxanaxac, nache Ñim Nataxala' maye Natamnaxala' nache hueta'aguet somaye qataq ỹo'ot da ỹataqta lta'araic da la'amaqchec qataq da la'añaxac. 2Qaq huaña nache so Salomón iỹaxanegue 'enauac so Israel le'ecpi, qataq som lataxala'pi so mil alleppi, qataq so cien alleppi, qataq som 'amaqtaqaicpi lataxala'pi so Israel le'ecpi, qataq 'enauac so lataxala'pi so maiche nhuo' le'ecpi maye huo'o naq 'enec yi'iye Israel. 3Nache so Salomón lỹatec 'enauac se'eso lapoota'a't shiỹaxauapi da taỹa ye atamnaqa' maye naña ye Gabaón, cha'aye nache naña yemaye so npe'l maye huaña naxa da qanauane' Ñim Lo'onatac 'Enauacna, maye so Moisés, som lamaxashec Ñim lo'onatac 'Enauacna, ỹo'ot co'ollaxa hualec ye toolec 'alhua. 4Qaq so David, ye mashe ỹache co'ollaxa aso laỹe' soua lqataxaco Ñim Lo'onatac 'Enauacna ỹachegoxotchiguiña ye Quiriat Yearin nache iviraxatta'a som dalaxaic lma' maye iqataxaatai' co'ollaxa, cha'aye nauaxaỹaxaasheguem co'ollaxa so npe'l maye naña ye Jerusalén. 5Qaq nataqa'en aso nca'atoxonaxalate maye chegaqaigui na lcat bronce maye lo'onata co'ollaxa so Besalel, som llalec so Uri, qataq laual so Hur, nache netaña som datatauga so npe'l maye lanataqa' naxa Ñim Nataxala', maye naña ye Gabaón. Qaq ỹoqo'oye so Salomón qataq 'enauac so shiỹaxauapi nqo'ona yemaye da yaqto' inat Ñim Nataxala'.
6Nache so Salomón tasheguema aso nca'atoxonaxalate maye chegaqaigui na lcat bronce maye datatauga so npe'l maye lanataqa' Ñim Nataxala', nache ỹachalec asa'aso nca'atoxonaxalate so mil nachetaqtaxanaxatpi qaỹavigaxatta.
7Qaq nacheso se'eso pe da Ñim Lo'onatac 'Enauacna, nachaxana so Salomón nache 'enapega, 'eeta': «Aỹem 'auỹaxanot cam 'aueetaique, nache aỹem 'am sanem qome».
8Nache so Salomón ỹasateguet Ñim Lo'onatac 'Enauacna, 'eeta': «'Am, ỹataqta 'arauotaxat co'ollaxa so ita'a David, qataq aỹem talec 'anqa'en da lo'onataxanaxac somaye. 9Qaq nagui, 'Am Nataxala' maye 'Aro'onatac 'Enauacna, ña 'aupacchigui qome na 'ara'aqtacpi maye 'aỹa'anem co'ollaxa so ita'a David, cha'aye 'am, aỹem 'aỹa'anem da nta'a, da selo'ogue na ỹataqta qalota nhuo' le'ecpi maye 'eeta'am na lsoche ana 'alhua. 10Qaq ỹoqo'oye nagui, aỹem 'aỹa'anem ca naỹaanec, qataq ca nauattonaxanaxac da yaqto' saỹaten da saueca'aguet ne'ena nhuo' le'ecpi, cha'aye ¿negue'tom ca ishet da ỹaueca'aguet ne'ena ỹataqta qalota nhuo' le'ecpi?»
11Nache Ñim Lo'onatac 'Enauacna ỹasateguet so Salomón, 'eeta': «Qaq cha'aye maiche 'arquiyaqteỹaxac de'era, qaq saishet da 'auỹaxanaique cam 'arsallaxa, qataq ca qalota 'ogoxoshetpi, qataq ca 'ara'amaqchec, qataq ca l-leuaxa na 'ampa'aguenaxauapi, qataq da qaỹoqtec da 'anachaalataxac, nacherata da 'auỹaxanaique ca 'araỹaanec qataq ca 'arauattonaxanaxac da yaqto' ishet da 'alo'ogue ne'ena ỹalamaxat nhuo' le'ecpi, maye 'am sanem da 'am lta'a, 12qaq aỹem 'am sanem qome dam 'auỹaxanaique 'araỹaanec, qataq da 'arauattonaxanaxac, qalaxaye nataqa'en 'am sanem qome ca 'arsallaxa, qataq ca qalota 'ogoxoshetpi, qataq ca 'ara'amaqchec maye saishet da hueto'ot co'ollaxa so hua'au nta'alpi, qataq cam ñaq natauopi nta'alpi maye 'anmenguet qome.»
13Qaq co'ollaq ime de'era, nache so Salomón co'ollaq mashe ime da hueta'a ye naña so npe'l maye lanataqa' Ñim Nataxala', maye naña ye Gabaón, nache ỹe'eguelaq taỹa ye Jerusalén, yem huaña da ilo'ogue so Israel le'ecpi.
Da lsallaxa so Salomón
14Qaq so Salomón, nquictauec co'ollaxa aso lalamaqtepi laigonapi qataq so caipi, qaq somayepi ivi' mil cuatrocientos aso laigonapi, qataq doce mil so caipi, nache somayepi ỹanaña so maiche lma' naqa'en aso laigonapi alaataxaquipi, qataq so lma' lta'araic somaye maye naña ye Jerusalén. 15Nache se'eso nta'a ỹo'ot da ye Jerusalén ỹataqta qalota na lcat plata qataq oro, qataq na coma', qataq da ỹataqta sa qoue ana 'epaq cedro, qataq ana no'onaxa lashe hiigopi, maye huaña ye nalochiguiñi 'alhua. 16Qaq so lalo caipi so Salomón, nache qaỹachegoxottega ye Musri, qataq ye Cilicia, cha'aye so lamaxashecpi se'eso nta'a, nache ỹachegoxotchiguiña yemaye naxa da desheenaxana. 17Qaq añi 'oonole naigona naxa da qaỹauec qaỹachegoxotchiguiña ye Egipto, nache ivi' seiscientos ana lcatpiole plata añi lasheue, qaq ñi 'oonolec caaỹo qalaq ivi' ciento cincuenta añi lasheue. Qaq nache 'enauac so nta'alpi hitiitapi, qataq so siiriopi, nache ỹachegogottacot so lamaxashecpi so Salomón da desheenaxatega.
Currently Selected:
2 Crónicas 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.