Hebreos 1
1
Ri Dios ja ri Ruc'ajol ri xucusaj richin xuk'alajrisaj ri rutzij
1Ojer-ojer can, q'uiy c'a mul xch'o ri Dios quiq'uin ri kaxquin-kamama' can. Y tok xch'o quiq'uin, xerucusaj c'a ri achi'a' ri nyek'alajrisan ri rutzij. Y richin xuk'alajrisaj ri rutzij cheque ri achi'a' ri', q'uiy rubanic ri xucusaj. 2Jac'a chupan ri tiempo rojc'o-vi roj, ri ruq'uisbül tiempo richin ri ruch'ulef, ri Dios ja ri Ruc'ajol ri xucusaj richin xuk'alajrisaj ri rutzij chikavüch. Ri Dios pa ruk'a' c'a ri Ruc'ajol xuya-vi ronojel. Y pa ruk'a' chuka' ri Ruc'ajol xuya-vi richin xbün ri ruch'ulef y ronojel ri c'o. 3Riq'uin ri Ruc'ajol nk'alajin ri ruk'ij ri Dios. Ri Ruc'ajol junan riq'uin rija'. Y ja ri C'ajol ri uc'uayon richin ronojel ri c'o, riq'uin ri ruchuk'a' ri rutzij rutz'amon-vi. Y rija' xcom richin xrelesaj ri kamac, y xc'astüj. Y xbetz'uye' chila' chicaj pa rajquik'a' (ru-derecha) ri nimalüj Dios.
Ri Ruc'ajol ri Dios c'o más ruk'ij que chiquivüch ri ángeles
4Ri Ruc'ajol ri Dios c'o más ruk'ij que chiquivüch ri ángeles. Y roma ri samaj ri xbün rija', ri Dios xunimirsaj ruk'ij. Y chuka' ri rubi' rija' más nim vi rakalen que chuvüch ri bi'aj ángel. 5Ketaman-vi que juis ruk'ij, roma ri Dios man jun bey rubin ta chin jun ángel:
Ja rat ri Nuc'ajol.
Romari' ninya' ac'aslen.
Y chuka' man jun bey rubin ta pari' jun ángel:
Ja rija' ri Nuc'ajol
y ja yin ri Rutata'.
Man jun bey rubin ta quiri' pari' jun ángel. 6Y tok ri Dios xutük-pe ri Ruc'ajol chuvüch ri ruch'ulef, xk'alajin-vi que c'o ruk'ij, roma xbij cheque conojel ri ru-ángeles:
Tiya' ruk'ij ri Nuc'ajol.
7Pa quivi' c'a ri ángeles xaxe nbij:
Ri nu-ángeles juis nyebiyin chubanic ri nusamaj,
roma ninbün cheque que ye cachi'el ri cakik' y ye cachi'el ri ruxak-k'ak'.
8Jac'a chin ri Ruc'ajol, roma ri c'o ruk'ij, nbij-vi chin:
Dios, rat richin vi chi jumul nabün mandar,
y choj c'a ri a-gobierno ri'.
9Ajo'on c'a ri chojmil y avetzelan ri itzel.
Y romari' yin ri a-Dios nuyo'on quicot pan avánima.
Más quicot nuyo'on chave rat que chuvüch ri quicot ri nuyo'on cheque ri ch'aka chic.
10Y chuka' ri Dios xbij chin ri Ruc'ajol:
Ajaf, rat xabün ri ruch'ulef pa rutz'uquic pe,
y xabün chuka' ri caj.
11Ri ruch'ulef y ri caj nyeq'uis.
Jac'a rat man jun bey ncaq'uis tüj.
Ri ruch'ulef y ri caj xa nyerijix,
cachi'el nyerijix ri tziük.
12Ri ruch'ulef y ri caj nye'ajül c'a,
cachi'el nban chin ri tziük ri man utz tüj chic.
Ri caj nabüs c'a e.
Jac'a rat man jun bey ncajalatüj.
Man jun bey nq'uis ta ri ac'aslen.
Quiri' xbij ri Dios.
13Y ri Dios man jun bey xbij ta chin jun ángel:
Catz'uye' pa vajquik'a' (pa nu-derecha),
y nyenya' pan ak'a' ri nye'etzelan avichin, xbij ri Dios.
14Ri ángeles choj c'a ye rusamajela' ri Dios. Y ja rije' ri nyetak roma ri Dios richin nyequito' ri ye colotajnük.
Currently Selected:
Hebreos 1: cakE
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.