San Lucas 2
2
Jesús itsanque nainunca
1-2Ya Mumunmin Juan tsotsoca na cajosanan, jun to miya casale nechi jerale tsachilaca milaquisa mantanue. Fe mantá tan miya, Augusto César mumun, ya tsanque mantanue. Cirenio tinun tsachi Siria tobi miya josanan, Augusto César tsanque mantanue. 3Junni jerale tsachila matu sonnanun puebloca manjino jominlanue yape milaquisa. 4Junni Joseri matu to miya Davichi alica joto, Nasaret pueblobi nechi loto, Galilea tobi nechi loto, Davichi puebloca jinue Judea tobi. Ya pueblo Belén tinun jominue.
5María Josebe cayaino joto, yanan Josebe Belenca pejinue yape yala palucaca milaquisa. Aman junni María na pun joto, 6Belenbi moorasiri chusanan, na quino ma fenue. 7Junni pension quidi jonan, cotonlabi chuminlanue. Junbi casale náca quinue. Unila na jominue. Junto ya náca pirato, animalichi ano cuwanun pateyabi tsorenue.
Opisa cuidaiminla Jesús nainueque miinunca
8Jun tobi opisaca cuidaiminla chuminlanue. Quepen lapa minu chuminlanue opisa cuidaito. 9Junni Miya Diosichi anjeli yalabe quirainue. Diosi yalachi awinta tsenhisa carinue. Junca quirato, duque jele tilatinue. 10Junni anjeli mantimini jeleratulajode! tinue. Junsi itsantinue:
—Meralaquede! tinue. Nulachi sen fiquica tanjanayoe tinue. Junni in fiqui duque son josa carimin fiqui joe tinue yape jeralela son jolajosa. 11Amana Davichi pueblobi na manca nainue. Ya na nulaca se larimin jochunae. Diosi wenteca jun CRISTO tinun Miya joe tinue. 12Junni nula itsanque miilaichunae ya mo na jonunca. Ya nari piraca jun, animalichi ano cuwanun pateyabi tsominca felaichunae tinue.
13Junni anjeli tsanque panunsi, pansile nechi ya anjelilabe duque anjelila quirailainue. Diosica tsarasica pato itsanlatinue:
14Jamochi chumin Diosica tsara sen patsa joe tintsan joe tilatinue.
Diosi tsachilaca pansi chusa carichunae yape wepanatuto chularasa.
Diosi tsachilabe sen jochunae.
15Junni anjelila jamochi manjilainunbi, opisa quiraminla tala cuenta quilaquinue:
—Belenca jilaisa! tilatinue. Miya Diosi chiquilabe sen fiquica cuenta quee; junni junca quirabi jilaisa! tilatinue.
16Aman Belenca jito, Maríaca, Joseca, na nacacanan felainue. Ya na mantimini animalichi ano cuwanun pateyabi tsominue. 17Yaca quirato cuenta quilaquinue. Anjeli jun náca cuenta quinunca jera cuenta manpolarilaquinue. 18Junni opisa cuidaiminlachi fiquica meráminla jeralela wepanalainue. 19María mantimini jun fiquica tennato, tenca caniquinaminue. 20Junni opisa cuidaiminla manjilainue. Anjelila yalabe tsanque patichunae tica josa jun tsanquenan jera patica jominue. Junni ticatiya jera quiracaca, jera meracaca tenca cato, Diosica duque sen joe tide manjilainue.
Jesuca Diosichi yaca tanjilainunca
21María na cawitusanan, anjeli yaca mantaca jominue ya náca Jesús mumun posa. Junni ochu ma tanca israelítalachi mite quidoca porenato, yaca JESUS mumun polaquinue.
22-24Junni aman matu to Moiseri Miya Diosichi mantaca pila chuteto, na quiminlaca itsanque mantaca jominue: na quicale nechi junpalu chunca mate Na quicaca casinayoe tito, Diosichi ticatiya cuwalaquisaque mantaca jominue. Junni aman unila na quinari, man fiquicanan mantaca jominue. Casale na unila na jonari, yaca Diosichi joe tintsan joeque chuteca jominue. Jun tenchi casale na unila na jonari, Diosichi ticatiya cuwano jominlanue na tenchi pacara quica cuwenta. Miya Diosi paluca juwejuca o paluca palomaca yachi cuwasa mantaca jominue. Junni Maríabe Josebe jun tsanquilaquinue. Junpalu chunca ma polenunbi Jesuca Jerusalén puebloca tanjilainue Diosichi yaca. Junni junchi tanjito, Diosichi jera tsanque cuwalaquinue.
25Aman junni unica tsachi manca Jerusalenbi chuminue Simeón mumun. Diosica tenca cato seque nenamin jominue. Junni Diosichi Tenca yachi tencabi jera pejominue. Ya tsachi méraminue yape Diosi israelítalaca laquirato se lariminca eresa. 26-27Junni Josebe Maríabe Jesús na nacaca Diosichi yaca tanjilainue Diosichi mantacaca quebi. Junni yala wilainasa, Simeón janue. Diosichi Tenca yaca ereca jominue yalabe tulaisa. Junni Diosi ya tsachica tenhisa carica jominue Crístoca quirano fecári puyano itoeque. 28Junni Simeón yalabe tulaisi, náca cato, amanto quirato, Diosica seque pato itsantinue:
29Miya Diosi, la nube penenato, amana pansi puyaniiyanae tinue.
30Nu tenhisa carica jun tsa patinae.
Lachi cacachinan nu ereca jun se larimin tsachica quiranayoe tinue.
31Nu in náca piyanlelachi tenchi eree.
32Israelítala nuchi tsachila joto in nabe tsara se inola jochunae tinue.
Yari uyanlachi tenchi tseno cuwenta jochunae.
Junni Simeonni ya Jesús na nacaca tsanque cuenta quinue. 33Junni tsanque panunca meráto, yachi ayanbe Josebe wepanato meralaquinue. 34Junni Simeón yalacanan seque pato, ya nachi ayan Maríabe itsantinue:
—Meráde! tinue. In na tenchi duque israelítala epe tsachi ilaichunae. Uyanla ya tenchi fécari sen ilaichunae tinue. Layanla yabe miituchi tito, duque seitonque palaquichunae tinue. 35In nabe duque tsachilachi tencaca miintsan jochunae tinue. Seque tenca camin jonunca, o seitonque tenca camin jonunca miintsan jochunae tinue. Junsi nuchi tencabinan duque laquiichunae tinue espada polarica cuwenta.
36Simeón tsanque pánasa, Diosichi mantate pamin sona manca janue Ana mumun. Yari Fanuélichi nama joto, Aser bolon israelita sona jominue. Junni aman ya Ana duque sinuca jominue. Moso jono mate casalaica jomin joto, aman siete watate yachi unila puyaca jominue. 37Junni ya sonari biuda chuminue ochu chunca junpalu wata tano fecári. Diosichi yabi nechi lotuto, quepen, malon Diosichi tenchi ticatiya quito chuminue. Ano fitunca ito, Diosibe rocaito chumin jominue. 38Junni ya Ana Jesúlachica jato, Diosibe acradeseinue. Aman junni Jerusalenbi weyanlari méraminlanue se larimin tsachi Diosi ereca jun jasa. Junni Ana jerale yalabe Jesuca cuenta quinue.
39Junni Miya Diosi mantacaca jera quetobi, Jesula Galilea toca manjilainue. Yalachi puebloca manjilainue Nasaret tinun puebloca. 40Junni na uwainato, tenca tan sonban uwainue. Diosi yaca laquirato ayudainaminue.
Jesús na joto Diosichi yabi ranunca
41Junni wata cura Jesuchi ayanbe Josebe Jerusalenca lomin jominlanue casá ma fiesta quirabi. 42Junni Jesús chunca palu wata tasa, tsanque lolainue casá ma fiesta quirabi. 43-44Junni fiesta jerainunbi, Jesuchi ayanbe Josebe manjilainue. Junni Jesús nalalan jotonan manjitunue. Jerusalenbi purainue. Junni yachi ayanbe Josebe man wa bolonbi nenato, tenhitulajonue Jesús itonunca. Yalari amicolabe manjanhinae tito, man malon quiratuto jinilainue. Aman quebi inasa Jesuca neyalaquinanue. Familialachibinan, quiranunlachibinan neyalaquinue. 45Junto Jesuca manfetuto, Jerusaléncanan manjilainue. Jesuca neyade neyade jilainue.
46Junto aman peman mate ya náca Diosichi yabi manfelainue. Diosichi fiquica micariminlabe chuto, yala pánaminca meráto, yalabenan manpanhanaminue. 47Junni jerale yaca meráminlari wepanalainue. Niyaito na jotonan duque tenca tato seque manpánanunca wepanalainue. 48Junni Josebe Maríabe yaca manquirato wepanalainue. Junni yachi ayanni itsantinue:
—Nao, ¿ti quichun chiquilaca wepanarinayun? tinue. Chiquebe nuchi apabe nuca wepanato neyanaminlayoe tinue.
49Junni Jesús beconan itsantinue:
—¿Niyaito nula laca wepanato neyanaminlayun? tinue. Lachi Apachi yabi rano jomanyoe. ¿Junca miitominlayun? tinue.
50Junni aman Josebe Maríaberi jun fiquica tuilaitunue Diosica yachi Apa tinanunca. 51Junni Jesús yalabe Nasaret puebloca manpatilainue. Junni Jesuri yalabe merán pun na jominue. Yachi ayan mantimini Jesús pacaca pansitunue; tencabi mantenhimin jominue. 52Junni Jesuri tenca tan uwainue. Junni Diosinan tsachilanan yaca sen joe tilatinue.
Currently Selected:
San Lucas 2: cof
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.