San Lucas 19
19
Zaqueo Jesube cayainunca
1Junni Jesula Jericó tinun pueblose polenasa, 2duque cala tan tsachi manca janue. Yari Zaqueo mumun jominue. Yari inpuesto caminla tala mantá tan jominue. 3Junni ya tsachiri Jesuca miichun quirachi titonan, podeitunue. Duque tsachila minute quirato wiruraminlanue. Junni Zaquéori na uni joto, weyan tsachilachi jamose Jesuca quirano podeitunue. 4Junto aman Jesuchi cachi sujito poleto, sicomo tinun chide pelebi lonue. Aman Jesuri junse poleno jominue. Junni Jesuca quirachique ya chide pelebi lonue. 5Aman Jesús jun chide pele quelo fenaminnan, jamochi quirato, Zaquéoca itsantinue:
—Zaqueo, wewe manpatade! tinue. Amana la nuchi yaca moora chubi jino joyoe tinue.
6Junni Zaquéori jun fiquica meráto, wewe manpatato, Jesuca son tito facarinue. 7Junni tsanhinanunca quiraminlari paito, yala tala itsanlatinue:
—Jesuri jutsa quiminchicatiya jinae latinue.
8Junni Zaqueo mantimini wiruito, Miya Jesube itsantinue:
—Miya, meráde! tinue. La tanunca man quitsa poperelachi cuwachinayoe tinue. Junsi encanato tarinca junlachi junpalu tsansi mancuwachinayoe tinue.
9-10Aman Jesús Zaqueo paca fiquica meráto, painaminlabe itsantinue:
—Nulari pailaituna! tinue. In tsachiri matu to Abrahanchi alica joda chiquila cuwenta. Junni meralaquede! Lari tsachi ica jun joto seitonlaca se laribi jacayoe tinue. Jutsa quito topiyaca jun nenaminlaca neyato, se laribi jacayoe tinue. Junni amana in tsachicanan se lariyoe tinue.
Miya ino jun tsachi
11Aman Jesús Jerusalén quelote jinaminue. Junni weyanla junca quirato, Jesuca moora miya ino jonhoe latinue. Diosi ya mantananun tsachi bolon jera serawonan, Jesús yalachi miya ito mantano jonhoe latinue. Junni Jesús junca tenhito, tsachilaca micarinato manca cuenta polarinue. Yaca moora in tote miya ino joeque tenca catusa itsanque 12cuenta polarinue:
—La mantá tan tsachi cuwenta joanae tinue. Junni ya tsachiri ya chunun tobi miya ino jochunae tinue. Junto miya ibi bare toca jichunae yape yaca miya suwasa. Junni la inte nechi jito manjano jonun cuwenta, ya tsachinan miya itobi manjachunae tinue. 13Junni jun tsachi jichinato, chunca peyunlaca jacarito, yalachi cala cuwachunae tinue. Mancachi mancachi duque cala cuwanato, itsantichunae tinue: La manjano fecári in calachi necosio quilaquinana! tichunae tinue.
14Junni aman bare toca jinasa, yachi tobi chuminla weyanlari yaca pa jolajochunae. Junni pa joto jun bare toca fiqui erelaquichunae tinue ya tsachica miya suwatudeque. Ya tsachibe mantaino muquetue tilatichunae tinue. 15Junni tsanlatinasatiya, ya tsachica miya suwaniquichunae. Junni miya ito manjatobi, cala cuwaca jun peyunlaca jera manjasa carichunae nisi canaica jonunca miichun.
16Junni caque peyunni yachi cale jato itsantichunae: Miya, ¿nuri lachi duque cala cuwaco? Lari junca chunca tsansi suwacayoe tichunae tinue. 17Junni miyari junca meráto, nuri seque quinue tichunae tinue. Sen peyun joe. Nuri nasiri calaca seque cuidaimin jominca cobernadori suwachinayoe. Nuri chunca puebloca mantamin jochunae tichunae tinue.
18Junsi aman benete peyunni miyachi cale jato, Miya tichunae. ¿Nuri duque cala cuwaco? Aman lari junca mante tsansi suwacayoe tichunae tinue. 19Junni miyari junca meráto itsantichunae: Nucanan cobernadori suwachinayoe. Nuri manteca puebloca mantachunae tichunae tinue.
20Junsi manca peyunman jato, Miya tichunae. Lari nuchi calaca panuchi coloto seto tamanyoe. Nen, nuchi cala tichunae tinue. 21Lari nuca jele tiyoe. Nuri duque sonba necosio quimin tsachi joe. Nuri uyanlachi calaca pecamin joe. Nuri uyanla waca junca pemancamin joe. Junni lari nuca jele tito, natiya necosio quitiyoe tichunae tinue. 22Miya mantimini jun peyunbe itsantichunae tinue: Nuchi fiquichinan nuca culpa quechinayoe tichunae. ¿Nu laca duque sonba necosio quimin joe titiyun? ¿Laca uyanlachi calaca pecamin joe titiyun? ¿Laca uyanla waca junca pecamin joe titiyun? tichunae tinue. 23Aman nuri laca tsanque tenca catori, lachi calaca bancobi pontsan jominue. Junni la manjatobi, calabe interebenan mancano jomin joinhie tichunae tinue.
24Junni aman miyari junte raminlabe itsantichunae tinue: Yachi calaca josoleto, fécari duque tanchi cuwade! tichunae. 25Junni yalari beco pato, Miya, yari numa duque tae latichunae tinue. 26Junni miyari manpato, itsantichunae tinue: Meralaquede! Jerale taminlachi fe cuwanan, nantanancari duque talarachunae. Itonlachi mantimini nasi tanuncatiya josolenan, natiya iton ilaichunae tichunae tinue.
27Junni ya miyari tsantisi, man fiquiman pato itsantichunae tinue: Ya calaca josoletobi, man cosanan quino cajoe. Laca pa joto miya itusa tinaminlaca intele tanjato, lachi cale misuca butunto totelaquede! tichunae tinue.
Jesús tsanque cuenta polarinue yari jun miya cuwenta joichunae tito.
Jesús burobi chudito Jerusalenbi manwinunca
28Junni Jesuri jun cuentaca polaritobi, Jerusalenca cajiniinue. 29Aman jinaminnan, Olibo du quelote felainue. Aman Olibo du nanle paluca pueblo jominue Betfagé manca, Betania manca. Jun pueblo quelo féto, Jesuri yachi tsachila palucaca junchi erenue. Yalaca erechinato, itsantinue:
30—Ja pueblobi wilaide! tinue. Junni junbi wisi, buro na tela junca quiralaquichunae tinue. Ya burori monantiya cachuditunun jochunae tinue. Yaca wolecato, inchi tanjalaina! tinue. 31Junni uyan tsachilari nulabe panhato, ¿Ti quichun buroca wole calaquinayun? latinari, Miya buroca munarae tilatina! tinue.
32Junni Jesús ereca junlari jun pueblobi wito, Jesús paca jun fiqui tsanquenan patinue. 33Junni buro náca wole calaquinasa, tsacuminlari ¿Yaca ti quichun wole calaquinayun? latinue. 34Junni yalari Miya munarae latinue. 35Junto buro náca Jesúchica tanjato, yalachi tsanpaca burobi nancarito, aman Jesuca junbi chutelaquinue. 36Junni Jesús burobi chudito jinasa, yalachi tsanpaca minubi lowalaquinue yape Miya jananun minu uraran josa. 37Junni Jesube duque yabe penenaminlabe Jerusalén quelo jinato, Olibo tinun du polelainue. Jun du patalainato, jeralela son tito sonba pato, Diosica se tilatinue seque wepanato quirantsancari quinanunca quiralaquiyoe tito. 38Junni itsanlatinue:
—Miya janae latinue. Miya Diosichi mantate janae. Yacari seque pantsan joe latinue. Junsi Diosichibinan son tito, yaca duque mantá tan joe tintsan joe latinue.
39Aman junni weyan fariséolari junte pejoto, ya tsachila tsantinaminlaca meráto, Jesube itsanlatinue:
—Nuri yalaca micarimin joto, mantaquede! yape nuca tsanque epe palaquitusa.
40Junni Jesuri yalabe beconan pato, itsantinue:
—Lari nulabe tsarasica pachinayoe tinue: Inlaca nosasaisa carimanpari, sutiya sonba pato laca se tino jomin jonhoe tinue.
41Junni Jesús Jerusalén pueblo quelo féto, jun puebloca laquiito wareto 42itsantinue:
—Nulari wepanatuto pansi chuchun niyan quino jonunca natiya miitolajoe tinue. Amanatiya nulaca junca mirasa tenjae tinue. Tsan josanan, nulari, te, tuino podeilaitue tinue. Nulari numa caca itonla cuwenta jolajoe. 43Aman man mate nula duque padeseilaichunae. ¿Nulachi pueblo awinta wa serica joco? yape pa junlari wilaitusa. Junni pa junlari nulachi serica fecári fato, wa teranca tsan quilaquichunae tinue quera quebi wichun. Nulachi puebloca awintaito quera quilaquichunae tinue. 44Nulachi pueblobi jerale yaca aralenan, su mancatiya jamo diquiratuchunae tinue. Junni nulacanan totelaquichunae. Junni Diosi nulachica amana jaca jonunca tenhitunun tenchi tsanque jera padeseilaichunae tinue.
Diosichi yabi osinaminlaca jera sularierenunca
45Junni Jesús Diosichi yabi manwito, junbi osinaminlaca jera sularierenue. 46Tsanquinato, itsantinue:
—Diosichi Pilabi chuteca joe tinue Diosichi ya Diosibe rocainun ya jochunaeque. Diosichi Pilabi tsantica josanan, nulari in yaca tarinnun ya cuwenta suwacala joe tinue.
47Junsi Jesús ma cura Diosichi yabi micarinaminue. Junni mantaminlari yaca totechi latinue. Aman mantá tan patelelabe israelítala tala mantaca micariminlabe weyan mantá tanlabe tenpalaquinue Jesuca niya quiraque totentsan jonhonque. 48Tsanque tenpalaquinatonan, jerale epe tsachila Jesuchi fiquica meráminla jonan, yaca natiya toteno capodeilaitunue.
Currently Selected:
San Lucas 19: cof
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.