Filemon 1
1
Gruss
1Ekj Paulus, dee om Christus Jesus sient haulwen faustjenomen sie, un Timotäus ons Brooda, schriew die, Filemon, ons leewa Brooda un Metoabeida, #Efs 3,1 2un onse Sesta Afia un Archippus, ons Metkjamfa, un diene Husjemeent: #Kol 4,17
3Mucht Gott ons Voda un Jesus Christus ons Har, junt Jnod un Fräd schenkjen!
Filemon sienen Gloowen un benämen
4Ekj dank mienem Gott jiedatsmol wan ekj fa die bäd, 5wiels ekj hia, waut du fa eenen Gloowen aun dän Harn Jesus hast, un woo du diene Leew aun aule Heilje bewiesen deist, daut du an goot best. 6Ekj bäd uk doarom daut diene Gloowens Jemeenschoft met mie, daut wirkjen mucht, daut du aul daut goode, waut wie en Christus Jesus haben, noch volstendja kjanen lieescht. #Flp 1,9 7Wie haben doaderch väl Freid un Troost jekjräajen daut du aundre soo goot best, wiels derch die, leewa Brooda, sent de heilje äare Hoaten jestoakjt worden. #2Kor 7,4
Paulus steit väa fa Onesimus
8Doawäajen, wan ekj aus dien Brooda en Christus, driest jenuach sennen kunn, die to sajen, waut du doonen sust, 9woa ekj ekj die leewa en Leew bedden, wiels ekj aul eemol dee oola Paulus sie, un nu noch om Christus Jesus sienen Wellen faustjenomen sie. 10Ekj hab die waut to froagen fa mienen Sän Onesimus, dee mien ieejna Sän en Christus wort, wäarent ekj faustjenomen sie. #1Kor 4,15; Gal 4,19; Kol 4,9 11Dee nuzt die verhäa nuscht, #1,11 De Nomen Onesimus bediet Nutzboara. oba es nu fa ons beid eene Help jeworden. 12Dän schekj ekj trigj. Nemm du am opp, wiels daut es soo, aus wan ekj mien ieejnet Hoat schekjen wudd. 13Ekj wudd am jieren hia jehoolen haben, daut hee mie en diene Städ jedeent haud, nu daut ekj wäajen daut Evangelium ensetten mott. #Flp 2,30 14Oba ekj well nuscht onen diene Enweljunk doonen, daut dien goodet doonen nich jedwungen wia, oba ut dienen frieen Wellen kjeem. #2Kor 9,7 15Veleicht es dit, wuawäajen hee die eene Tietlank wajch kjeem, daut du am opp emma sust trigjhaben, 16un nich mea aus eenen Sklow, oba aus eenen, dee mea es aus een Sklow; nu aus eenen leewen Brooda, besondasch fa mie, oba woo väl mea fa die, beides em Fleesch uk em Harn. #1Tim 6,2 17Wan du mie dan fa eenen Poatna hoolen deist, dan nemm am soo opp, aus wan du mie oppnämen wurscht. 18Un wan hee die irjentwoo Schoden jemoakt haft, ooda waut schuldich es, dan räakjen mie daut aun. 19Dit schriew ekj, Paulus, met miene ieejne Haunt: Ekj woa daut betolen. Nich noch to sajen, daut du mie die selfst schuldich best. 20Brooda, doo mie daut om onsen Harn sient haulwen togood, daut du mie om Christus sient haulwen daut Hoat leichta moakst.
21Ekj schreef die, wiels ekj mie doaropp veloten kunn, daut du wurscht jehuarsom sennen, un ekj weet, daut du mea doonen woascht, aus ekj die saj. 22Dan uk noch, moak fa mie eene Gauststow reed. Ekj räakjen doamet, daut jie mie derch june Jebäda wada haben woaren. #Flp 1,25; 2,24
Paulus jreest un jeft eenen Säajenswunsch
23Epafras, mien metjebungna en Christus Jesus, bestalt die to jreessen. #(23 un 24) Kol 1,7; 4,10-14 24Soo uk Markus, Aristarch, Demas, un Lukas, miene Metoabeida. 25Mucht onsen Harn Jesus Christus siene Jnod met dienem Jeist sennen! Amen!
Currently Selected:
Filemon 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.