Abd 1
1
Tz'e'ysb'il twitz Edom
1Tzaj tyek'u'n Qman Dyos tpakb'alil te Ab'diy kjalu.
Maqb'i jun tpakb'alil tu'n Qman Dyos;
matxichq'o'n jun sanjelal q'malte kye nimaqtnam kjalu:
¡Lwiyqe'xe'! ¡Qo'qe' q'ojil ti'j Edom! chij.
Intma'n Qman Dyos kye aj Edom kjalu:
2Che b'el nb'oẍsa'ne' kyxol nimaqtnam
ex che elel ik'u'ne' b'a'nxi'x kyu'n.
3Tu'nx kyninb'ilkyib'e' ẍesb'eta'ye'.
Najlqe'ye' kyoj kyk'atxab' pik
ex ate'qe'kxe' tzmax jawl,
qu'mtzun nkub' kyxima'ne'
qa mix-a'lo'x jun kb'elsalte kyi'je'.
4B'a'ntzun qama che jaw lq'eye' kse'n q'anjel
ex makub' kyq'o'n kyjaye' kyxol che'w,
tzmaxtzuntzu' che tzajela' nxone' na'tz, chi Dyos.
Chi Qman Dyos kjalu:
5Naqwit qonik'an che ok eleq' kyi'je',
lay b'ent tu'n txikyiq'i'n tkyaqil ati kyeye';
naqwit che ul xilul ub'a kyi'je',
okx kjel kyq'o'n jte' tq'ob' ub'a tuk'i'l twitz.
Aye'tzunkye' kyajq'oje'
majx che b'elb'ajsa'ne' kyu'n.
6¡Majx che b'je'lel iq'i'n kyeye', tyajajil Esawu!
¡Kb'ajxel elq'a'n tkyaq'ilju' kyq'inumale'!
7Che b'el sb'u'ne' kyu'n kykyaqilju' mojli kyole' kyuk'i'l,
tojku' kytx'otx'e' che eletza' xla'ja'ne' kyu'n.
Naq pe'naqe' kamiwe'
che okyel miltz'uj kyi'je',
exqe' kamiwe' q'uqli kyk'u'je' kyi'j kb'el kyq'o'n xpatxab' kyeye'.
¡Mixti'x nche ximane' aj Edom! chi Dyos.
8Intma'n Qman Dyos kjalu:
Ajtkub' ntz'e'ysa'ne' kywitz aj Edom,
che kb'el nb'yo'ne' kykyaqilju' kyxjal ati kynab'l
ex k'elel wiq'i'ne' kyk'atzal xjal
najlqe' kywi' witz kye tyajajil Esawu.
9K'okyeltchi kyi'ju' xjal aj Teman q'ojilqe',
ex mix-a'lo'tlte kjel anq'in
toj kytx'otx' tyajajil Esawu kywi' witz.
Aye' til Edom
10Tu'n tpaj e'kub' kyalq'a'ne' ex e'kub' kyb'yo'ne' tyajajil Jakob' ju' kytzikye'
k'elel kych'ixawe' ex che kjel xitu'ne' tejumajx.
11Tej tokx kypa'n najchaq xjal te q'oj
tjpel Jerusalen
tej tb'ajx kyelq'a'n ajq'oj q'inumal toju' nintnam,
¡naq exika'yine' ti'j!
Tej t-xikyse'n tu'n telkynik' alqechaq kxe'la' b'je'x kyalq'q'a'n
ex b'ajx kyiq'i'n kyq'inumal aj Jerusalen,
¡ikx kyb'inchaju'ye' kse'n kyb'incha!
12Miwtlojun e'tzalaje' kyi'ju' kytzike'
toju' tq'ijlalil kykub'o'lj,
exwitlo min e'tzalaje' ti'j Juda
toju' q'ij tej tkyaj xitu'n,
exwitlo min e'xmayine' kyi'j
tej intoq che oq'.
13Mixwitloti' e'okxe' toju' nintam weye'
tej kyok toj yajb'il,
exwitlo min e'tzalaje' tej kykub'o'lj
toju' tq'ijlalil tej kyk'ulb'an,
exwitlo min b'je'x kyalq'a'ne' kyq'inumal
tej inxi'xtoq che yajlanjtz.
14Mixwitloti' e'kub'we'ye' kyoj xky'ichb'e
tu'n kykub' kyb'yo'ne' ntoq che'x oq,
exwitlo min e'pon kyq'o'ntle' intoq che matxitoq che oq
toju' q'ij intoq che oq'.
15Ikx kb'inchetelju' teya kse'n tb'inchaya kye txqantl:
¡kb'el tz'e'yset twitza tojx tila!
Ninb'ilkye aj Israel
Matxi' tzul lq'e tq'ijlalil Qman Dyos
kye kykyaqil nimaqtnam.
16K'axi'xna' xkyk'waye' aj Israel
ju' ẍek'wane' ti'j twi' witz xjan,
ikxtzunkye' txqantl nimaqtnam
kxel kyk'wa'n tkyaqil;
ex majx che b'elnajsa'n.
17Atzunte' witz Syon k'okyel te najb'il xjan
ja che kletela' junjun toj.
Ktzyetel jumajtl kytx'otx'ju' tyajajil Jakob';
18che okyel kyyajajil Jakob' ex Jse
te q'aq' ex taq' q'aq',
aye'tzu'n tyajajil Esawu, maj che okyila'
majx che b'ajel tu'n q'aq' lu.
¡Mix-a'lo'x jun tyajajil Esawu ktzaq'pajel!
Ayine' Dyos Manb'aj nchin q'mante, chi Dyos.
19-20Kytzyu' aj Israel ate' Nekeb' kytx'otx' toj kyk'ul tyajajil Esawu, aye'tzu'n ate' toju' plan tx'otx' kb'el kytzyu'n kytx'otx' pilistey. Ex kytzyu' kytx'otx' toju' kye tyajajil Eprayin ex toj kyatx'otx' aj Samarya, aye'tzu'n tyajajil B'enjamin kb'el kytzyu'n Kalaad. Kytzyu' tnam xjal aj Israel b'je'xni xla'ja'nqe' lu kytx'otx' aj Kanaan, kpomelx toj tnam Sarepta, aye'tzu'n aj Jerusalen yaju'nqe' toj Separad che tzyulkye nimaqtnam Nekeb'. 21Che jawix twi' witz Siyon matxitoq che kanb'n, tu'n kymante tz'e'ysb'il kywitzju' witz toj kytx'otx' tyajajil Esawu, ex aku'te Qman Dyos kkawil.
Currently Selected:
Abd 1: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999