Jer 5
5
Kyil aj Jerusalen
1Intma'n Qman Dyos:
Kupe'kyxi'ye' kyoj tkyaqil b'e toju' tnam Jerusalen,
kyka'yinxe' b'a'nxi'x, kyjyome' jamajx ate' xjal
qa ati jun in anq'in toj tnik'alti'j,
qa tajb'il tu'n tyolin ax.
Qama tz'el yal kyu'ne', kb'el nnajsa'ne' til Jerusalen.
2Ate' junjun najb'en nb'iye' ayine' Dyos Manb'aj kyu'n,
extzun mya axju' kyol, chij.
3Nman Dyos, aye'ta' nche tjyo'n, aye' xjal ax che yolin.
Kub' ttz'e'ysa'na kywitz, ex min kyna'.
Ekub'o'lj tu'na, ex min okkynab'l.
Tx'yanqe', we'jqexi'x kyetwitz ab'j,
min kyajb'il tu'n tanjtzkyi'j toju' b'a'n b'e.
4Kub'tzun nxima'ne':
O'qe'kx prowju' min nche ximan,
qu'n min b'i'n tajb'ila kyu'n,
aju' tchaq'b'ila Nman Dyos.
5Kxe'l nma'ne' kyeju' xjal ati kyoklen.
B'i'nte' tajb'ila kyu'n Nman Dyos,
aju' ntchaq'u'na.
Aye'tzunkye kykyaqil jawkyi'nkyib' ti'ja,
kub' kypi'si'nkyib' twitza.
6Qu'mtzun che kb'el b'yo'n kyu'n toj k'ul b'alun,
che b'ajel ẍilu'n kyu'n toj chq'ajlaj xo'j;
che okyel tzaqpaj twiẍ k'ul kyi'j kyk'etz nimaqkytanam,
che b'ajel kytzaqu'n ajkyetz;
qu'n nim il matxi' b'aj kyb'incha'n,
nim txqan kysb'ub'l.
7Chi Qman Dyos:
¿Se'n taq'wi kb'el nnajsa'ne' tkyaqil ja'lu?
Matxi' chin kyej kykolb'e'ne' tk'wala,
ex nkytziya'n kyol kywitz witzleb' mya dyosqe'.
Nim txqan kywa xinq'o'ne',
aye'tzunkye min ẍe niman weye'
kykyaqil xikyq'o'nkyib' toj ajpaji'n.
8Ikyqe'ju' kse'nqe' tmanchej kyajb'il tu'n kyẍchan
nche ok il kyi'j kyxu'jil kywnaqil.
9¿Ma laytzun kub' ntz'e'ysa'ne' kywitz tu'n ja'lu?
¿Ma laytzun tz'oknq'o'ne' tleq' jun tnam ikju'?
10¡Kub'xwit b'o'lju' kyawal ub'a kyu'n kyajq'oj,
maskye min xkub' kyxitu'n tkyaqil!
¡B'ajxwit kyjachu'n kyq'ob'
qu'n mya wawaltlwe' lu!
11¡Mache jaw miltz'uju' aj Israel ex aj Juda wi'je'!
Ayine' Dyos Manb'aj nchin q'mante. Chi Qman Dyos.
Tqanilju' tz'e'ysb'il witzb'aj
12Makub' kyewa'n aj Israel ex aj Juda Qman Dyos;
kyma: Mixalo'te Dyos.
Mixti'te qo ik'ela',
lay tzaj q'oj ex we'yaj qi'j, Chechij.
13-14Ikyqe' sanjelalju' kse'n kyq'iq',
mixnati' tyol Qman Dyos kyuk'i'l.
Qu'n lu saj tma'n Qman Dyos nimtipumal weye':
A tzulju' kyib'aj tu'nju' xkyma lu:
Kb'el nq'o'ne' nyole'
naku'j q'aq' toj ttziya,
atzu'n tnam lu k'okyel naku'j si,
tu'ntzun tb'aj tu'n q'aq' lu. Chij.
15Chi Qman Dyos:
Israel, ktzajel wiq'i'ne' jun tnam najchaq q'ojil ti'ja,
jun ojtxi' tnam ex kuw.
Min tojtzqi'na kyol
ex min nkaneju' nkyma'n toj twitza.
16Kykyaqil q'ojilqe' min nche xob',
kamik qexi'xju' kyq'ojb'il.
17Kxe'l kywanju' twitz tawala ex twaya,
expe' che kb'el kyb'yo'n tk'wala ex tmyala.
Che b'ajel kych'yo'n trita ex twakyixa,
che b'ajel kylo'n tawala ub'a ex iw.
Che kb'el kyxitu'n nimaqtnam kuwsa'nqe' q'uqlok tk'u'ja kyi'j
kyu'n kyq'ojb'il. Chi Qman Dyos.
18Chi Qman Dyos: Laytzun majx che kub' nnajsa'ne' toju' tq'ijlalil lu. 19Ajttzaj qani'n teya ¿Titiqu'n xtb'incha Qman Dyos tkyaqil ja'lu qe? Qa chechi, tzaq'wenxa kye: Ikxna' kse'n kyej kykolb'i'ne' Qman Dyos ex e'aq'wiye' ajb'el kye junxi'tl dyos tojku' ttx'otx', ikxtzunkyeju'ye' che ajb'ele' kye junxi'tl xjal toj juntl tnam. Chi Qman Dyos.
Ab'tzib'l kye aj Israel
20Kymanxe' toju' tkawb'il Israel,
ex te Juda:
21B'intzju'ya lu, xnak tnam ex mixti' tnab'la,
ate' twitza extzun min nka'yina
ate' t-ẍkyina ex min nb'ina.
22Ayine' Dyos Manb'aj nchin yoline':
¿Ma min nche xob'e' weye?
¿Ma min nche lu'lune' nwitze'?
Kub' nq'o'ne' tz'awun ttzi ninnjab' te nqach,
jun nqach lay tz'exju' ninnjab' tib'aj.
Mixti' kyipumalju' ttolob' aj kyukchi
inche q'ajti ex lay b'ent kyex tib'aj.
23Ch'uẍ kyanmiye' ex pi's;
ma chin kyej kykolb'e'ne', exi'tzuntze'.
24Mixti'x kub' kyxima'n ch'i'ne':
qo'qe' niman te Qman Dyos,
qu'n intzaj tq'o'n jb'al tojxi'x tq'ijlalil
aj kyxulin tze ex ajkyb'aj ch'iy awal,
ex majx ati tq'ijlalil tu'n, tu'n tjaw b'uyit twitz awal. Chechiwte'.
25Atzu'n ja'lo mikxa'tlju' tu'n tpaju' kyile',
ex lay kynik'b'e'tlju'ye' xtalb'il lu.
26Qu'n ate' b'inchal myab'a'n toju' ntaname'
inche xq'uqin kse'nqe' yol pich',
inkub' kyq'o'n xpatxab' tu'n kytzyet xjal.
27Inche b'ajnoj kyja tu'n kyelaq',
kse'nqe' kyja pich' b'incha'nqe' nche noj kyu'n pich'.
Ikytzu'n e'jawa' q'inumax ex ten nim kyipumal,
28etzni kywitz ex k'a'cha'nkyib' b'a'nxi'x.
Nim txqan kyil:
min nkyb'incha'n tnik'alilti'j teju' meb'a
ex min nxikynima'n toklenju' prow.
29¿Ma laytzun kub' ntz'e'ysa'ne' kywitz tu'n tpaj ja'lu?
¿Ma laytzun txinq'o'n kyleq'ju'ye' xjal ikju'?
Ayine' Dyos Manb'aj nchin yolin.
30Taq'wixi'xte' nb'aj
toju' tx'otx' lu.
31chajyolilte' nkypakb'a'n sanjelal;
inche kawinju' pale kse'nx kyajb'il,
¡Atzun b'a'n toj twitzju' ntaname'!
¿Ti'tzu'n kb'ajel kyeye' ajtponju' mankb'il q'ij? chi Dyos.
Currently Selected:
Jer 5: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999