Jer 41
41
Kub' b'yo'n Kyedaliy
(2 R 25.25-26)
1Tojtzun twuqi'n xjaw, xi' Ismael, tk'wal Netaniy ex tchman Elisama, toj tja nimaqkawil, toj Mispa chik'b'altib' te Kyedaliy. K'le'nqe'toq lajoj ichan tu'n. Atzuntzu' Mispa, tzmatoq nche wan, 2naqx myanim tjaw kyiq'i'n kyib' Ismael kyuk'i'lju' lajoj ichan lepchqe'toq ti'j ex kub' kyb'yo'n Kyedaliy tu'n k'uẍtx'e'nb'il, ju' ojetoq tz'oktq'o'n nimaqkawil aj B'ab'ilon te kawil toj Juda. 3Ex e'kub'tb'yo'n Ismael kykyaqilju' aj Juda ex kaldey te q'oj ate'toq tuk'i'l Kyedaliy toj Mispa.
4Tetzun juntl q'ij, ewitoq tkub'len b'yo'n Kyedaliy, mix-a'lo'xi'toq b'inteju' b'aj lu, 5eb'aj pon kyajnaq ichan tzajniqe'toq Sikyem, Silo ex Samarya, jso'nile kyxmatzi, ẍilu'n kyxb'alun ex b'ajniqe' k'ixb'i kyu'nx. Ex q'i'ntoq twitz awal k'ok'e'kywitz kyu'n tu'n tkub' kyq'o'n te Qman Dyos toju' ja te k'u'lb'il. 6Etztzun Ismael toj Mispa k'lulkye, intoq oq' toj b'e. Naqtzun nche kub'tk'lu'n, xitma'n kye:
—Kukytzaje' ka'yilte Kyedaliy tk'wal Aykam, chij.
7Naqtzun nche pon toj nky'ajchaqu' nintnam, ekub'yo'n kyu'n Ismael kyuk'i'lju' t-xjal ex eku'x kyq'o'n toj jun tjulil xoch. 8Atzun lajoj kyeju' ichan lu xikyma'n te Ismael:
—Lan qokub' tb'yo'na, atiqe' qtriy, seb'ad ex ta'lkab' e'wa'n toj kojb'il, chechij.
Mixtzunti' e'kub'tb'yo'n Ismael kse'nqe' kyuk'i'l. 9Axju' jul tchaq' nimaqkawil Asa tu'n tb'inchet tej intoq tklo'ntib' te nimaqkawil B'aasa aj Israel, axtzun julju' jae'ku'xa' tq'o'n Ismael kykyaqilju' ichan eb'aj Kub' tb'yo'n. Nimju' tjulil xoch lu, nojtzun kyu'n xjal eb'aj Kub' tb'yo'n Ismael. 10Expe' e'ttzuy Ismael tmyal nimaqkawil exqe' xjal ate'xtoq Mispa, ju' ojetoq che kyej tq'o'n Neb'usaradan chaq'ul kye xq'uqil, tjaq' tkawb'il Kyedaliy. E'tzyet tu'n Ismael ex kub' b'e tu'n tu'ntoq tik'x toj tx'otx' Amon.
11Tetzunj kyb'inte Joanan tk'wal Karea kyuk'i'lju' kynejel xjal te q'oj ate'toq tuk'i'l, ju' il matxitoq tb'incha Ismael, 12eb'ajtzun tb'u'yi'n kykyaqilju' t-xjal ex exi' q'ojil ti'j Ismael. Okyal kyu'n tk'etzju' nin pil ati Kab'aon. 13Tetzunj txi' ka'yi'n Joanan ex kykyaqilju' kynejel xjal te q'oj kyu'n q'i'nqe'toq tzyu'nqe'tl tu'n Ismael, ojexi'x che tzalaj, 14b'aj anjtzkyi'j ex eb'jo'k lpe ti'j Joanan. 15Atzunte Ismael e'tzaqpaj kyuk'i'l wajxaq t-xjal toj tq'ob' Joanan ex exi' toju' tx'otx' Amon.
16Atzunte Joanan kyuk'i'lju' kynejel xjal te q'oj, e'ok ka'yilkyeju' xjal te q'oj, e'qya, e'k'wal exqe' nimaq kyoklen toj kawb'il eb'ajx ttzyu'n Ismael tkub'lenxi' tb'yo'n Kyedaliy, aye' eb'aj anjtztiq'i'n Joanan tzmajx Kab'aon. 17Kub'tzun b'etz kyu'n tzmax kypon Kyerup-kyimam, tk'etz B'elen, e'we' atzu'. Atoq kyximju' tu'n t-xikyljo'n kyb'e tzmajx Ejipt 18tu'ntoq kyoq kye kaldey, qu'n intoq che xob' kye tu'n tpaj kub' tb'yo'n Ismael Kyedaliy, ju' ojetoq tz'ok q'o'n te kawil toju' nintnam tu'n nimaqkawil aj B'ab'ilon.
Currently Selected:
Jer 41: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999