Jer 37
37
Tkub'sb'il Sedekyiy te Jeremiy
1Atl Sedekyiy tk'wal Josiy oktq'o'n Nab'ukodonosor, nimaqkawil aj B'ab'ilon, te nimaqkawil toj Juda ex mya Jokoniy tk'wal Joakyim 2Atzunte Sedekyiy kyuk'i'lju' nimaq kyoklen tuk'i'l exju' tnam, mixti'x xikyb'i'n tyol Qman Dyos tzaj tma'n kye tu'nel Jeremiy.
3Exi' tchq'o'n nimaqkawil Sedekyiy, Jukal tk'wal Selemiy, exju' pale Soponiy tk'wal Maaseyiy, ka'yilte Jeremiy t-sanjelal Dyos ex q'malte te kjalu: Na'n Dyosa qi'je' te Qman Dyos. 4Na'mtoq tokx kyjpu'n Jeremiy, qu'mtzun inxtoq b'et toju' tnam. 5Ojetoqtzun cheb'je'tzju' t-xjal paraon te q'oj toj Ejipt. Ex tej kyb'inte kaldey ju' ntoq che q'ojin ti'j Jerusalen, eb'jik' b'et atzu'.
6Tzajtzun yolin Qman Dyos te Jeremiy, ex tchaq' tu'n txitma'n 7toj tb'i kyeju' e'pon chq'o'n tk'etz ikjalu: Kymanxe' te nimaqkawil toj Juda saj chq'onkyeye' xjelul weye', matxi' che anjkye' t-xjal paraon te q'oj, ju' eb'aj tzaj onilkyeye', matxi' tz'anjtl kyi'j Ejipt. 8Che ul jumajtlju' kaldey q'ojil ti'ju' nintnam Jerusalen, kb'el kytzyu'n ex k'okyel kyq'o'n tq'aq'al. 9Ayine' Dyos Manb'aj, kxel wab'tzi'ne' kyeye': Lan tz'okxten toj kywi'ye' ex lalun kymaye' qa k'anjelkyi'ju' kaldey, qu'n lay che ik'b'ilkye'. 10Maskyepe' qama kub' kyi'ju' kaldey te q'oj kyu'ne', ju' nche q'ojin kyi'je', exqa naq tal jte'xtl k'ixb'niqe'tl ẍe kyej kyu'ne' toju' kyxmuj, che jawil we'tlkye' xjal lu ex k'okyel kyq'o'n tq'aq'alju' nintnam, chi Dyos, chechiku'ye' te, chij.
Okx jpu'n Jeremiy
11Tej ljo'ntoq tkyaj kytzaqpi'n kaldey te q'oju' Jerusalen, qu'n kyb'i qa xi'toq kytzaju' t-xjal paraon te q'oj, 12etz Jeremiy toju' nintnam tu'n txi' toj kytx'otx' tyajajil B'enjamin tu'n ttzyunte tetzb'il kyxolju' twnaqil. 13Tetzunj tpon Jeremiy ttzi tnam B'enjamin tb'i, kub' mqo'n tu'n jun ichan Iriy tb'i, tk'wal Selamiy ex tchman Ananiy, nejeneltoq kye xq'uqil, ex xitma'n te:
—¡Ma kxe'la kyuk'i'l kaldey! chij.
14Xitzun ttzaq'we'n Jeremiy ikjalu:
—¡Chajyolil te'lu, layna' chinxwe' kyuk'i'l kaldey! chij.
Atzunte Iriy mixti'x kub' tb'i'n, tzyet tu'n ex xitiq'i'n kywitzju' nimaq kyoklen toj kawb'il. 15Tzaj kytx'u'jilju' nimaq kyoklen ti'j Jeremiy ex kychaq' tb'ajuma'n ex tu'n tokx jpu'n toj tja Jonatan tz'ib'al tqanil, ju' ojetoq tz'ok te kars. 16Tzajx pona' Jeremiy toj jun kars toj tx'otx', axtzuntzu' tena' nimtoj.
17Tchaq' nimaqkawil Sedekyiy tu'n tpon q'i'n Jeremiy toju' tja nimaqkawb'il, tetzunj tpon q'i'n Jeremiy twitz, xitqani'n nimaqkawil te toj ewaj ikjalu:
—¿Ma ati jun tqanil tu'n Qman Dyos? chij.
Xitzun ttzaq'we'n Jeremiy te:
—Ati, ex aja'lu: kb'el tz'aqiya nimaqkawil toj tq'ob' nimaqkawil aj B'ab'ilon, chij.
18Ex xitqani'n Jeremiy te nimaqkawil Sedekyiy ikjalu:
—¿Ti'tzu'n wile' xnb'inchaye' twitza nimaqkawil, mo kywitzju' nimaq kyoklen toj tkawb'ila, mujqa twitz tnam, tu'nju' ẍin okx kyjpu'ne'? 19¿Jatzun ta'qe' sanjelal nche q'mante qa lay q'ojinju' nimaqkawil aj B'ab'ilon kyi'je' ex tiju' nintnam? 20B'intzpe'ya ja'lo nimaqkawil, ex q'aq'antl tk'u'ja wi'je' tu'nju' kxe'l nkub'sa'ne' teya: Lan tajtla tu'n nxiq'i'ntle' toj tja Jonatan tz'ib'al tqanil, naq chin kyime' atzu', chij.
21Tchaq'tzun nimaqkawil Sedekyiy tu'n tkyaj jpet Jeremiy tpenju' xq'uqb'il tja nimaqkawb'il ex tu'n tpon q'o'n jun twa junjun q'ij ti'ju' nkyk'a'yi'n b'inchal wab'j. Ex a b'inchanjtzu' tej atitoq wab'j toju' nintnam. Ikytzu'n kyeja' ten Jeremiy tpenju' kyja xq'uqil ti'j tja nimaqkawil.
Currently Selected:
Jer 37: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999