Jer 11
11
Min xinima'n yol kyejni b'entti'j
1Tzaj yolin Qman Dyos weye', ayine' Jeremiy ex tma: 2Tu'n tkub' kyb'i'n aj Israel yol teju' yol kyejni b'entti'j. Yolina kyuk'i'lju' xjal aj Juda exqe' aj Jerusalen, 3q'manxa kye, qa ayine' Dyos Manb'aj, nchin q'mante qa majx k'elel wik'u'ne' xjal min ẍe'xtnima'nju' yol teju' nyole' kyejni b'entti'j. 4Aju' yol kyej b'entti'j wu'ne' kyuk'i'lju' kyyajilb'ene' tej kyetz wi'ne' toj Ejipt, ikytoq tnamju' lu kye kse'n jun chuj janokx q'eta' k'uxb'il tu'n ttzaj b'unb'ix. Xinma'ne' kye: Chin kyb'ime', kyb'incha'nxe' tkyaqilju' manchaq'e' kyeye', che okyeltzuntze' te ntaname' ex ayine' Dyos kyib'aje'. 5Qama chinx kyb'i'ne', kjapumelwe' nyol xintziya'ne' kye ojtxi' kyyajilb'ene', qa kxe'ltoq nq'o'ne' jun tx'otx' kye, aju' kytx'otx'e' ati ja'lo, janqojla' lech ex ta'lkab' naku'j a'. Nchije' kye. Chi Qman Dyos.
Ayintzunwe' xintzaq'we'ne' te: Ikxwitju' Nman Dyos, nchije'.
6Tzajtzun tma'n Qman Dyos: Pakb'anxju'ya yol lu kyoj nimaqtnam toj Juda ex kyoju' b'e toj Jerusalen. Q'manxa kye xjal tu'n ttzaj kyb'i'nju' yol teju' yol kyejni b'entti'j, che japunxtzun kyu'n. 7Tej kyetzwiq'i'ne' kyyajilb'ene' toj Ejipt, o'kx xiwab'tzi'nju'ye' kye tu'n kyb'in weye', atxi'xtzunj ex toju' tq'ijlalil ja'lo inx xiwab'tzi'ne' kye. 8Aye'tzunkye mixti'x nokye' toj kywi', min nxikyb'i'ne', e'anq'in toju' myab'a'n tokx toj kyanmi. Min kyaj tu'n kyjapunju' nyole' kyu'nju' nchaq'e' kye, tzajtzun nq'o'ne' tz'e'ysb'il kywitz q'ma'nqe' toju' yol kyejni b'entti'j wu'ne'. Chi Dyos.
9Tzaj tma'ntl Qman Dyos weye': Injaw kyb'u'yi'n kyib'ju' xjal aj Juda exqe' aj Jerusalen wi'je'. 10Ax ilju' nkyb'incha'n axju' kyb'incha ojtxi' kyyajilb'en, kub' kypi'sa'n kyib' nwitze', exilpetzuntz k'ulul kywitz txqantl dyos. Junx e'ela' aj Israel kyuk'i'l aj Juda, min xikynima'n nyole' kyej b'entti'j kyuk'ilju' ojtxi' kyyajilb'en. 11Qu'mtzun ktzajel nq'o'ne' jun taq'wixil kyib'aj, lay che tzaqpaj toj. B'a'ntzunqa mache ẍch'in qanil o'nb'il weye', lay che'x nb'i'ne'. Ayine' Dyos Manb'aj nchin yolin. 12Che kxe'ltzun xjaltz aj Juda ex aj Jerusalen qanil o'nb'il kyeju' dyos jankub' kyq'o'na' sturak, ex layx che klet kyu'n ajttzaju' taq'wixil kyib'aj. 13Txqan kydyos aj Juda kse'nx kyajlal nimaqkytanam, ex matxi' jaw kyb'incha'n aj Jerusalen txqan q'olb'eb'l tu'n tkub' kyq'o'n sturak twitz B'aal, kse'nx kyajlal b'e kyoj nimaqtnam. 14Qu'mtzun, lalun k'uluna nwitze' Jeremiy kyi'ju' tnam lu, lan chin tzajtna'na ex lalun kub'sana kyi'j, qu'n lay che'x nb'i'ne' ajkyqanin o'nb'il toju' yajb'il.
15¿Titi' nkyjyo'n aj Israel k'u'jla'nqe' wu'ne' toju' njaye' te k'u'lb'il,
extzun matxi' kyb'incha txqan ti'xti' taq'wix?
¿Ma oktzun che kletel toju' yajb'il
tu'n seb' ex chib'j ajtkub' kyq'o'n te chojb'il nwitze'?
16Atoq tb'iju' Tqan olib'o pujin txijli toj twitz tb'anil wu'ne',
ayine' Dyos Manb'aj,
atzu'n ja'lo kb'el ntz'e'ysa'ne' t-xaqa
ex che b'el njachu'nju'ye' tq'ob'a tu'n q'ankyaq ntinun.
17Ayine' Dyos Manb'aj te tkyaqil ipumalj, inku'x awante, matxi' nchaq'ju'ye' taq'wixil tib'aj tu'n tpaj kyil aj Israel ex aj Juda, qu'n matxi' tz'ok kyq'o'n ntx'u'jile' tu'n kub' kyq'o'n sturak twitz B'aal, chi Dyos.
Kyajb'ilju' tajq'oj Jeremiy tu'n tkub' Kyb'yo'n
18Tzaj tma'n Qman Dyos weye' qa intoq che ximan wajq'oje taq'wix wi'je'. E'tjaqju' nwitze' tu'n tel nnik'e' ti'j. 19Kyepenitoq weye', xi'toq nxi'q'i'ne' toj b'i'yb'il naku'j qpoj tman rit, mixtoqti' b'i'n wu'ne' qa intoq che ximan taq'wix wi'je'. Intoq kyma'n: Qtx'e'munktzju' tze xa'wanku' ja'lo, qxb'oqi'nktz twitzju' tx'otx' kyxolju' itz'qe', tu'ntzun mitzaja' na'tl. Chechij.
20Atzunta Nman Dyos nimtipumala,
jun ajkawilta tz'aqlixi'x.
kanlixi'xju' t-xim xjal toj twitza.
Q'oma anb'il tu'n nka'yinteye' ajtkub' ttz'e'ysa'na kywitzju' xjal lu,
qu'n toj tq'ob'a ta'.
21Atzu'n kyeju' ichan aj Anatot, aye' kyajb'iltoq tu'n nkub' kyb'yo'ne' ex intoq kyma'n tu'n lalun chin yoline' toj tb'i Qman Dyos, qu'n kyajb'ilatoq tu'n nkub' kyb'yo'ne', 22chi Qman Dyos nimtipumal kye: Kb'el ntz'e'ysa'n kywitze': che kyimelju' ku'xun toj q'oj, aye'tzu'n kyk'wale' ex kymyale' che kyimel tu'n we'yaj. 23Mixti'te' jun kjelten qu'n tzul q'ij kb'el ntz'e'ysa'n kywitze' ichan aj Anatot, ex ktzajel nq'o'ne' taq'wixil kyib'aje'. Chi Qman Dyos.
Currently Selected:
Jer 11: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999