Am 1
1
Tz'e'ysb'il kywitzju' nimaqtnam nqaku' ta'qe' tk'etz Israel
1Atzun tqanil ja'lu tzaj tq'o'n Qman Dyos te Amos, jun k'ik'lel rit toju' tnam Tekoa, tzaj tq'o'n tqanil te ti'ju' tnam Israel, atixtoq kab'e' ab'q'itl tu'n ttzaju' kyejnajnab' toju' tq'ijlalil nimaqkawil Usiy toj Juda, ex toj tq'ijlalil Jerob'oam, tk'wal Joas, nimaqkawil toj Israel.
2Naqa xtb'inchate Qman Dyos tu'n tb'injtzu' toj twi' njulin naku'j q'ankyaq
tzmax twi' witz Syon, toj Jerusalen,
nche kub' tzqju' k'ul kywa alu'mj kyoj kojb'il
ex nkub' tzqij twi' witz Karmelo.
3Chi Qman Dyos kjalu:
Nim txqan myab'a'n matxi' kb'inchaju' xjal te Damask,
qu'mtzun lay naq chin ka'yine' kye;
qu'n mache okten yajlalkyeju' xjal aj Kalaad, kse'n nxq'iq'et triy tu'n pitxb'il.
4Qu'mtzun k'okyel nq'o'ne' tq'aq'al tja nimaqkawil Asael,
ex tu'nxju' q'aq' lu che kb'ajelju' ja te kawb'il te B'en-adad.
5K'okex npa'njuye' tjpel nintnam Damask;
ex kb'el nb'ajsa'nju'ye' nkawin toj B'ikat-ab'en
exju' nkawin toj B'et-eden,
aye'tzu'n aj Sirya che kxe'l q'i'n toj Kyir.
Chi Qman Dyos.
6Chi Qman Dyos kjalu:
Nim txqan myab'a'n matxi' kb'inchaju' xjal te Kasa
ex lay naq chin ka'yine' kyi'j;
qu'n majx xikyiq'i'n jun tnam,
ex matxikyk'a'yi'n toj Edom naku'j lq'on majen.
7Qu'mtzun k'okyel nq'o'n kq'aq'alju'ye' nimaq tapi te Kasa,
ex che kb'ajelju' ja te kawb'il tu'n.
8Kb'el nxitu'nju'ye' nkawin toj Asdod
exju' nkawin toj Askalon.
¡Tuk'i'l tkyaqil wipumale' chin okyel tzaqpaje' ti'j Ekron,
ex majx che mankulju' pilistey wu'ne'!
Chi Qman Dyos.
9Chi Qman Dyos kjalu:
Nim txqan myab'a'n matxi' kb'inchaju' xjal aj Tiro
ex lay naq chin ka'yine' kyi'j;
qu'n xikyq'o'n jun tnam toj tkawb'il Edom,
aju' tnam kyejni b'ent jun kyol kyuk'ilju' kyitz'inkyib'.
10Qu'mtzun k'okyel nq'o'ne' kq'aq'alju' tapi te Tiro,
ex che kb'ajel patju' tja kawb'il tu'nju' q'aq' lu.
11Chi Qman Dyos kjalu:
Nim txqan myab'a'n matxi' kb'inchaju' xjal te Edom
ex lay naq chin ka'yine' kyi'j;
qu'n e'oklpe kyi'ju' aj Israel tuk'i'l k'uẍtx'e'nb'il, mixti'x tzaj laqj kyk'u'j kyi'ju' kyitz'in.
Tzaj ktx'u'jil b'a'nxi'x,
ex majx matxi' kq'o'n kq'oj toj kyk'u'j.
12Qu'mtzun k'okyel nq'o'ne' tq'aq'alju' tnam Teman,
ex che kb'ajel patju' tja kawb'il te B'osra tu'nju' q'aq' lu.
13Chi Qman Dyos kjalu:
Nim txqan myab'a'n matxi' kb'inchaju' xjal te Amon
ex lay naq chin ka'yine' kyi'j;
qu'n b'ajx kplaq'cha'n kyk'u'ju' qya ch'onwi'qe' teju' tnam Kalaad,
naqx tu'n ttzyet txqan tx'otx' kyu'n.
14Qu'mtzun k'okyel nq'o'ne' kq'aq'alju' nimaqtapi te Rab'a,
ex che b'ajel patju' kyja te nimaqkawb'il tu'n q'aq' lu
ex kb'ajel sich' toj q'oj naku'j q'ankyaq inxi'x tinun.
15Kxe'l q'i'nju' nimaqkawil toj juntl tnam,
junx kyuk'i'l kykyaqilju' t-xjal nimaq kyoklen.
Chi Qman Dyos.
Currently Selected:
Am 1: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999