1 R 21
21
Kub' ttzyu'n Akab' tawb'il Nab'ot
1Atitoq jun ichan aj Jesreel, Nab'ot tb'i, atitoq jun tawb'il toju' tnam lu nqayin tk'etz tja Akab' te kawb'il, ju' nimaqkawil toj Samarya. 2Junmaj xitma'n Akab' te Nab'ot:
Q'ontzju'ya tawb'ila weye' tu'n tok te jun wawb'ile', atiku'pe' nqaku' tk'etzju' njaye' te kawb'il. Kxe'l nq'o'nwe' juntl awb'il tb'anilxi'xtl te t-xel, qatzun a b'a'nju' toj twitza, knchja'we' twi', chij.
3Atzunte Nab'ot xittzaq'we'n te Akab':
—Mixwit taja' Qman Dyos tu'n txi' nq'o'nju'ye' wetzb'ile' kyu'n nmane' teya, chij.
4Xi'tzun Akab' tja nb'isun ex jaw ik'un tu'n tpaju' ttzaq'web'l Nab'ot, qu'n tma qa laytoq txitq'o'n te, qu'n jun tetzb'il kyu'n tman. Tej tpon tja kub' kẍe miltz'u'nkx tib' twitz ja, ex min taj tu'n twan. 5Xi'tzun lq'e Jesab'el ju' t-xu'jil tk'etz ex xitqani'n te:
—¿Tiqu'ntzun inxi'x b'isuna ex min tajb'ila tu'n twana? chij.
6Xi'tzun ttzaq'we'n Akab' te:
Machin yoline' tuk'i'l Nab'ot, aj Jesreel, ex matxinqani'ne' tu'n ttzaj tk'a'yi'nju' tawb'il weye'; extoq qa b'a'n toj twitz tu'n qch'exb'enteye' tuk'i'l juntl awb'il. Atzunte minti' tajb'il tu'n ttzaj tq'o'n weye', chij. 7Atzunte Jesab'el ju' t-xu'jil xitma'n te:
—¡A na'ta nchaq'un toj Israel! Lwix wana ex lalun b'isuna. ¡Kna' kanb'etelte' tawb'il Nab'b'ot wu'ne'! chij.
8Aq'witzun Jesab'eltz tz'ib'alkye u'j toj tb'i Akab', ex kub' tq'o'n t-sey nimaqkawil kyib'aj, exi' t-sma'ntzuntz kyeju' tijwnaq ex kyeju' nejenel najliqe' tojxju' tnam janajla' Nab'ot. 9A xi' ttz'ib'a'nju' kyoju' u'j: Kymanxe' tqanil mewayi'n ex kyq'uqb'anku'ye' Nab'ot kywitz tnam xjal. 10Ex kyjyontze' kab'e' tziyal chalyolqe' twitz ex kymanxe' kye tu'n kymante qa matxi' yolin Nab'ot taq'wix ti'j Dyos ex ti'ju' nimaqkawil. Kyiq'imitztzuntze' ex kyb'yonku'ye' tu'n ab'j, chij.
11Xi'tzun kyb'incha'nju' ichan toj ttanam Nab'ot, junx kyuk'i'lju' tijwnaq exqe' nejenel, kse'nxju' tchaq' Jesab'el toju' u'j xit-sma'n kye: 12Xikyma'n tqanilu' mewayi'n ex kub' kyq'uqb'a'n Nab'ot kywitzju' tnam. 13Epontzun kab'e' tziyaltz chalyolqe' ex kyma kywitz tkyaqilju' tnam xjal qa ojetoq tma Nab'ot taq'wix yol ti'j Dyos ex ti'ju' nimaqkawil, inxi'xtoq xikyma'n qa axxi'xu' til Nab'ot. Etzkyiq'intzuntz ti'jxi'ju' nintnam ex kub' kyb'yo'n toj ab'j. 14Xi'tzun kyma'n tq'umlitz te Jesab'el qa matxitoq b'aj xon Nab'ot toj ab'j ex matxitoq kyim.
15Tetzunj tb'inte Jesab'el, xitma'n te Akab':
—Kuwxa ex tzyunku'ya tawb'il Nab'ot aj Jesreel, ju' min taj tu'n ttzaj tk'a'yi'n teya. Mixti'tlte Nab'ot ja'lo; matxi' kyim, chij. 16Tetzunj tb'inte Akab' qa matxitoq kyim Nab'ot, xi'tzuntz ex kub' ttzyu'nju' tawb'il. 17Tzajtzun yolin Qman Dyos te Eliy aj Tisb'e, ex tman:
18Kutxi'ya ka'yilte Akab' nimaqkawil toj Israel, najli toj Samarya. Atzu' ta' ja'loxi'x toju' tawb'il Nab'ot, qu'n matxi' pon tu'n tkub' ttzyu'n. 19Q'manxa te kjalu: Chi Qman Dyos qa tu'nju' matxi' kub' tb'yo'nju'ya Nab'ot ex matz'eltiq'i'na ati te, axtzuntzu' ja xb'aja' kyleq'u'n tx'yanju' tchk'el, kb'ajela' leq'u'ntlta tchk'el kyu'n tx'yan, chiku'ya, chi Dyos te Eliy.
20Atzunte Akab' xittzaq'we'n te Eliy:
—Aya wajq'oje, ¿ma machin elyale' tu'na? chij.
Xi'tzun ttzaq'we'n Eliy te: —Iku', matz'el yala wu'ne'. Qu'n o'kx nche tb'incha'nju'ya taq'wix twitz Qman Dyos. 21Qu'mtzun matma Qman Dyos teya ikjalu:
Ktzajel wiq'i'ne' taq'wixil tib'aja, che b'ajel mankunju' tyajajila wu'ne'; che kb'el nb'yo'ne' kykyaqilju' tyajajila ichan ate'qe' toj Jerusalen. 22Expe' ikx knb'incha'ju'ye' kyi'ju' toj tjaya kse'nxju' nb'inchaye' kyi'ju' toj tja Jerob'oam, tk'wal Nab'at, ex kyi'ju' toj tja B'aasa, tk'wal Ayiy, qu'n okkyq'o'n ntx'u'jile' tej kyxi' aj Israel toj il kyu'n, chi Dyos.
23Atzunte' Jesab'el, matma Qman Dyos: Tx'yan qekye' che b'ajel wante Jesab'el toj tx'otx' Jesreel, chij. 24Aye'tzu'n toj tjaya che kyimel toju' nintnam, tx'yan che b'ajel wankye; aye'tzu'n che kyimel toj kojb'il, k'utz che b'ajel wankye, chi Eliy.
25(Mix-alo' juntl ten kse'nte Akab', chq'o'n tu'n Jesab'el ju' t-xu'jil, o'kx b'aj tb'incha'nju' taq'wix twitz Qman Dyos. 26Tb'incha jun il taq'wixi'x tej tk'ulun kywitz witzileb', kse'nx intoq kyb'incha'n kykyaqil amorey, aye' eb'je'x t-xlaja'n Qman Dyos kywitzku' aj Israel.)
27Tej tb'aj tb'i'n Akab' tkyaqilju' lu, xitlaqu'n t-xb'alun, ex e'oktq'o'n ti'j jochin, mewayintzuntz. Intoq wtan kyoju' t-xb'alun jochin lu, ex inxi'xtoq b'isun. 28Tzajtzun tma'n Qman Dyos te Eliy kjalu:
29¿Ma matxi' tila se'n xkub'a' tme'ssa'ntib' Akab' nwitze'? Tu'ntzunju' matxi' kub' tme'ssa'ntib' nwitze', lay tzaj wiq'i'nju'ye' taq'wix kyib'aju' toj tja toju' tq'ijlalil itz', atzu' ktzajela' toj tq'ijlalilju' tk'wal, chi Dyos.
Currently Selected:
1 R 21: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999