1 R 19
19
Xi' oq Eliy Oreb'
1B'ajx tma'n Akab' te Jesab'el tkyaqilju' tb'i'ncha Eliy ex kse'n e'kub'a' tb'yo'n t-sanjelal B'aal. 2Xi'tzun tchq'o'n Jesab'el jun t-sanjel q'malte te Eliy kjalu: ¡Qa aya Eliy, ex ayinwe' Jesab'el! kub'xwit tz'e'ysa'n nwitze' kuwxi'x kyu'nju' dyos qa na'mxtoq nb'inchanteye' teya najchi'j kloqx ja'lu kse'nxu' xtb'inchaya kyeju' t-sanjelal B'aal, chij.
3Eltnik' Eliy qa xob'ajilxtoq ta', xi'tzuntz kloltib' B'eerseb'a, toj tx'otx' Juda, atzuntzu' kyaja' tq'o'nju' tmajin. 4Xi'tzuntz toju' tx'otx' mixti' kynajb'il xjal toj, exb'et jun q'ij, tzmax tkub' qe tjaq' junwi' k'ul Retama tb'i. Atoq tajb'ilu' tu'n tkyim, ex tma: ¡O'kxtzu'n ja'lo Nman Dyos! ¡Iq'imila nchwinqlale', myana' b'a'nqinxi'xwitwe' kywitzju' Nmane'! chij.
5Kub' kẍetzuntz tjaq'u' junwi' k'ul Retama, ex ik'wtan. Juntzun anjl pon tk'etz ex yekulte, xitma'n te: We'ktza ex wana, chij.
6Xi'tzun ka'yi'n Eliy ti'jile, ex til atitoq jun muqin tk'etz tq'axwe tkub' tib'aj ttxalq'aq' tuk'i'l jun xar a', jawe'tzuntz, wan ex k'wan; ex kub'kẍe jumajtl. 7Atzu'n tanjl Qman Dyos ultl tkamaji'n, oktmko'n ex xitma'n te: We'ktza ex wana, qu'n qatzun min, najchaqxi'xju' tb'eya teya, chij.
8Jawtzun we' Eliy ex wan ex k'wan. Atzunju' twa lu q'onte tipumal tu'n tb'et kab'naq (40) q'ij ex kab'naq (40) qonik'an tzmax tpon twi' Oreb', ju' witz te Dyos. 9Tetzunj tpon okx toj jun jyom, atzuntzu' exa' qonik'an tu'n. Atzunte Qman Dyos tzaj tma'n te: ¿Titi' in b'ajteya tza'lu Eliy? chij.
10Xi'tzun ttzaq'we'n Eliy: Inxi'x exch'yon toj nk'u'je' Nman Dyos nimtipumala, qu'n matxi' kyej kytzaqpi'n aj Israel tyola kyejni b'entti'j kyuk'i'l ex matxi' che b'aj kyxitu'nju' q'olb'eb'l teya, ex matxi' che b'ajkub' kyb'yo'nju' t-sanjelala tu'n k'uẍtx'e'nb'il. Njunalxtle' ẍinkyaj tene', ex inchin kyjyo'ne' tu'n nkub' kyb'yo'ne', chij.
11Atzunte Qman Dyos tzaj tma'n te: kutetza ex we'ku'ya nwitze', twi' witz, chij.
Ik'tzu'n Qman Dyos toju' kmoj lu, ex iky'jun kyq'iq' kuwxi'x eb'aj tjachu'n tze ex eb'aj tpa'nju' pik twitz Qman Dyos: mixtzun alo'te Qman Dyos toju' kyq'iq'. Tetzunj tik'ju' kyq'iq', tzaj jun nin kyajnajnab'; ex mix-a'lo'te Qman Dyos toju' kyajnajnab'. 12Ex tzaj jun q'aq' tej twe' kyajnajnab'; ex mix-a'lo'te Qman Dyos toju' q'aq'. Tetzunj tb'aju' q'aq' b'injtz jun tq'ojq'ojel kyq'iq' njub'in chab'a. 13Tej tb'inte Eliy, oktjpu'n twitz tu'n tpinpa't ex etz, ex kyej we' ttziju' jyom. O'kx tpon jun tq'ojq'ojel tk'etz intoq tma'n: ¿Titi' nb'ajteya Eliy tza'lu? chij.
14Atzunte Eliy xittzaq'we'n: Majx inexch'yon toj nk'u'je' Nman Dyos nimtipumala, qu'n oje kyej kykolb'e'n aj Israel tyola kyej b'entti'j kyuk'i'l ex oje che b'jaw kyxitu'n q'olb'eb'l teya, ex oje che b'aj kubkyb'yo'nju' t-sanjelala. Njunalxtle' ẍin kyajtene' ex inchin kyjyo'ne' tu'n nkub' kyb'yo'ne', chij.
15Tzajtzun tma'n Qman Dyostz te:
Kutxi'ya, kutanj ti'ja toju' chq'ajlaj te Damask jasaja'ya. Kutxi'ya ex xjansama Asael te nimaqkawil toj Sirya. 16Atzu'n Jewu tchman Nimsi te nimaqkawil toj Israel; ex xjansama Elisey tk'wal Sapat aj tnam Ab'el-meola te nsanjelale' te t-xela. 17Iktzu'n, aju' ktzaqpajel teju' tk'uẍtx'e'nb'il Asael, a Jewu kb'el b'yo'nte, atzu'n ktzaqpajel teju' tk'uẍtx'e'nb'il Jewu, a Elisey kb'el b'yonte. 18Oktzun che kjel nklo'ne' wuqlajk'al lajnaq (7,000) xjal toj Israel, b'ajx che kub'a' meje twitz B'aal ex b'ajx tz'oka' kyma'tzi'n, chi Dyos.
Txkonjtz Elisey
19Ik'tzun b'et Eliy atzu' ex okyal Elisey tu'n, intoq kyjon kyuk'i'l wakx. Nejliqe'toq kab'lajoj (12) muj wakx twitz Elisey, ex iq'i'ntoqju' mankb'il muj tu'n. Xilq'e Eliy tk'etz ex oktq'o'n tpinpa't ti'j Elisey. 20Lwiyxi'xtzun e'kyaj tq'o'n Elisey wakx, xilpe ti'j Eliy ex xitma'n te:
—Q'ontz ch'i'n anb'ila weye' tu'n kykyaj nq'olb'e'ne' nmane', chin xe'l lpetzuntze' ti'ja, chij.
—B'a'na'tzun kutxi'ya, naq o'kx na'nku'ya xnb'inchaye' teya, chi Eliy te.
21Anjtzun ti'j Eliseytz, e'kub' tb'yo'n kab'e' tman wakx ex b'ajkub' tqesu'n toj tx'naji'n, ex b'aj tk'a'sa'nju' chib'j tu'nxju' ttzeylal kytz'utz' wakx ex xitq'o'n kywaju' xjal. Yajxi'tzuntl xilpe ti'j Eliy ex ajb'en te.
Currently Selected:
1 R 19: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999