1 R 16
16
1Tzajtzun tma'n Qman Dyostz te Jewu, tk'wal Anani, ti'j B'aasa ikjalu:
2Majaw wiq'i'na toj quq ex matz'oknq'o'na te nejenel te ntaname' Israel, atzunta junx sela'ya tuk'i'l Jerob'oam, matxi' che b'ajxju' ntaname' Israel toj il tu'na. Matxi' tz'ok tq'o'na ntx'u'jile' tu'n il xtb'inchaya nwitze'. 3Qu'mtzun B'aasa, kb'el nnajsa'na kyuk'i'lxi' toj tjaya; ikx knb'incha'ju'ye' kye kse'nxu' nb'inchaye' kye toj tja Jerob'oam tk'wal Nab'at. 4Alkyexku' twitze'la mache kyim toju' nintnam, tx'yan kb'ajel wankye; aye'tzu'n che kyimel toj kojb'il, k'utz kb'ajel wankye, chi Dyos.
5Atzu'n txqantl tqanil ti'j B'aasa, exu' tb'incha ex tb'inchb'aj, atzu' tz'ib'a'na' toju' tu'jil tqanil kyb'inchb'aju' nimaqkawil toj Israel. 6Tej tkyim B'aasa, atzu' ku'xa' mqu'n Tirsa. Atl Ela ju' tk'wal kawin te t-xel.
7Tzaj tma'n Qman Dyos tz'e'ysb'il twitz B'aasa kyuk'i'lju' toj tja tu'nel Jewu ju' t-sanjelal, tk'wal Anani, qu'n mya b'a'nqe'ju' tb'inchb'en twitz. Tzaj ttx'u'jil Qman Dyos kyu'nju' tb'inchb'aj B'aasa, ikqe'xju' kse'n tb'inchb'aj Jerob'oam kyuk'i'lju' tk'walju' eb'ajkub' t-xitu'n.
Kykawb'il Ela Ex Sinb'ri toj Israel
8Toj junaq qaq (26) ab'q'i ntoq kawin Asa toj Juda, tzyet tkawin Ela tk'wal B'aasa tib'aj Israel toj Tirsa, ex kab'e' ab'q'i kawin; 9atzunte Sinb'ri, jun nejenel kye t-xjal te q'oj, toktoq toklen kyib'aj nik'janju' karwaj te q'oj, jaw tiq'intib' kyuk'i'l jte' xjal toj ewaj ti'j. Jun q'ij atitoq Ela toj Tirsa, tja Arsa ju' nk'ulte toj tja, k'wan q'e'n ex ttx'ujti b'a'nxi'x. 10O'kxtzun tpon Sinb'ri ex kub' tb'yo'n, tu'ntzun tkyejten kawil te t-xel Ela. Toj tjunaqwuqi'n (27) ab'q'i intoq kawin Asa toj Juda b'aja' ja'lu.
11Naq nok Sinb'ri toj tq'uqb'il, tzyet tkawin, e'kub' tb'yo'n kykyaqilju' toj tja B'aasa, mixti' jun ichan kyej anq'in tu'n, twitze'l mujqa tamiwa, ju' jaku' tz'ok kyq'o'n tu'me'l t-xel yajxi'tl. 12Iktzu'n eb'ajkub' tb'ajsa'n Sinb'ri kykyaqilu' toj tja B'aasa, kse'nxju' tz'e'ysb'il twitz tma Qman Dyos toj ttzi Jewu ju' t-sanjelal. 13Tu'n tpaj til B'aasa ex til Ela ju' tk'wal, e'xa'ya' aj Israel toj il, okkyq'o'n ttx'u'jil Qman Dyos tu'n tpaju' kywitzleb'i'n.
14Atzu'n jni'tl tqanil ti'j Ela ex tb'inchb'en, tz'ib'a'n toju' tu'jil tqanil kyb'inchb'aju' nimaqkawil toj Israel. 15Toj tjunaqwuqi'n (27) ab'q'i nkawin Asa toj Juda, matxitoq b'aj kytxoli'n kyib'u' aj Israel te q'oj tu'n kyok tzaqpaj ti'ju' ninkytanam pilistey Wib'eton, tzyet tkawin Sinb'ri toj Tirsa. Naq wuq q'ij kawin, 16qu'n texju' q'ij ate'toqju' xjal te q'oj toju' xmuj, kyb'i qa matxitoq jawtiq'i'ntib' Sinb'ri ti'ju' nimaqkawil ex matxitoq kub' tb'yo'n, kykyaqilx okkyq'o'n Omb'ri, jun nimaq nejenel kye, te nimaqkawil toj Israel tojxju' kyxmuj. 17Kyajtzun kytenb'a'n Omb'ri kyuk'i'l aj Israel te q'oj tu'n kyq'ojin ti'j Wib'eton ex e'oktzaqpaj ti'j Tirsa.
18Atzunj tka'yinte Simb'ri matxitoq tzyetju' nintnam, okx oq ewal toju' tja nimaqkawb'il, oktzun tq'o'n tq'aq'altz ex kyim toju' q'aq'. 19B'aj ja'lu tu'n kpaju' il taq'wix b'aj tb'incha'n twitz Qman Dyos, qu'n aye'x ilju' tb'incha kse'nx b'aj tb'incha'n Jerob'oam, ju' xiq'inkye aj Israel toj il.
20Atzu'n jni'tl tqanil ti'j Simb'ri, exu' tej tjaw tiq'i'ntib' ti'ju' nimaqkawil Ela, tz'ib'a'n toju' tu'jil tqanil kyb'inb'aju' nimaqkawil toj Israel.
Tkawb'il Omb'ri toj Israel
21Kub'tzun tpa'ntib'ju' tnam Israel toj kab'e' tnej. Junjun mujliqe'toq tuk'i'l Tib'ni tk'wal Winat tu'n tok te nimaqkawil, atzun junjuntl mujliqe'toq tuk'i'l Omb'ri. 22Kub'tzun kyi'ju' ate'toq tuk'i'l Tib'ni tk'wal Winat kyu'nju' ate'toq tuk'i'l Omb'ri. Kyimu' Tib'ni, iktzu'n oka' Omb'ri te nimaqkawil.
23Tzyet tkawin Omb'ri toj Israel toju' tjunaq junlajoji'n (31) ab'q'i ntoq kawin Asa toj Juda, ex kab'lajoj (12) ab'q'i kawin, ti'jtzun ja'lu kawin waqaq ab'q'i toj Tirsa. 24Tloq'u' witz toj Samarya te Semer tu'n jun kyintal tk'i' masch'i'n kab'naq jwe' lib'r (1.45) saqpwaq, ex jawtb'incha'n jun nintnam atzu' tok tapi ti'jile ex Samarya tb'i oktq'o'n, qu'n Semer toq tb'iju' tajaw nejtl.
25Taq'wixju' b'aj tb'incha'n Omb'ri twitz Qman Dyos, taq'wix qexi'xpe' kyetwitz kyb'inchaju' nimaqkawil e'ten nejtl, 26qu'n aye'x ilju' tb'incha kse'nxte Jerob'oam tk'wal Nab'at, ju' xiq'onkye aj Israel toj il, okkyq'o'n ttx'u'jil Qman Dyos tu'nju' kywitzleb'i'n.
27Atzu'n jni'tl tqanil ti'j Omb'ri ex tkyaqilju' tb'incha ex tb'inchb'aj, tz'ib'a'n toju' tu'jil tqanil kyb'inchb'aj nimaqkawil toj Israel. 28Tetzunj tkyim, ku'x mqu'n toj Samarya. Atl Akab' ju' tk'wal kawin te t-xel.
Tkawb'il Akab' toj Israel
29Toj tjunaq wajxaqlajoji'n (38) ab'q'i nkawin Asa toj Juda, tej ttzyet tkawin Akab' tk'wal Omb'ri toj Israel. Junaq kab'e' (22) ab'q'i kawin tib'aj Israel toju' nintnam Samarya. 30Mixtzunti' elb'a'nju' tb'inchb'aj twitz Qman Dyos, taq'wixi'x kyekywitzju' txqantl nimaqkawil e'ten nejtl, 31qu'n mixti'x tz'oka' te tej tb'inchante kse'nxju' il tb'incha Jerob'oam tk'wal Nab'at. Mjexi'xtlpe' tuk'i'l Jesab'el tmyal Et-b'aal, nimaqkawil toj Sidon, expe' k'uluntl te B'aal, 32ex jawtb'incha'n jun q'olb'eb'l ex jun ja te B'aal toj Samarya. 33Ex oktq'o'n ttx'u'jil Qman Dyos kuwxi'xtl kye kyitzju' nimaqkawil e'ten nejtl twitz tu'n tpaj jun tilb'ilal Asera kub' tb'incha'n.
34Tojtzu'n tq'ijlalil Akab', jaw tb'incha'ntl Yel, aj B'etel, ju' nintnam Jeriko. Kub' tq'o'n tq'uqlil tu'nel Ab'iram ju' tnejel tk'wal, ex eb'jo'ktq'o'n tjpel tu'nel Sekub' ju' tk'wal b'o's, kse'nx ojetoq tma Qman Dyos toj ttzi Joswe tk'wal Num.
Currently Selected:
1 R 16: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999