1 R 1
1
Tijin Dab'i
1Matxitoqtzun tijinxi'x nimaqkawil Dab'i ex matxi'toq tzaj lq'e tab'q'i. Maskye ntoq jawx q'o'n txqan ttxo'w b'a'nxi'x, mixtoqti'x nmoq'ti. 2Qu'mtzun xikyma'nju' tajb'el te: Ati tu'n tjyet jun txin b'ajx mjeya' teya, qman nimaqkawil, tu'n tajb'en teya ex tu'n t-xika'yi'na tu'n, ex tu'n tktan junx tuk'i'la tu'ntzun tmoq'tiya, chechij.
3Kyjoytzun jun txin tb'anilxi'x ka'yin toj tkyaqilju' tx'otx' Israel, ex knet jun kyu'n, Ab'isaj tb'i, aj Sunem, xikyiq'i'ntzuntz teju' nimaqkawil. 4Majxtoq tb'anilxi'x ka'yin Ab'isaj, intoq xitka'yi'nju' nimaqkawil ex najb'en te, atzunte nimaqkawil mixti' ok il ti'ju' txin.
Oktq'o'ntib' Adoniy te nimaqkawil
5Jawtiq'i'ntib' Adoniy tk'wal Dab'i tuk'i'l Awit, ex tma qa a k'okyel te nimaqkawil. Eb'ajtzaj tiq'i'n karwaj te q'oj, ex xjal te q'oj b'a'n che chejin, ex kab'naqlajoj (50) xjal te q'oj xq'uqilku'xi'xte. 6B'ajxtoq tz'oka' ili'n jumaj Adoniy tu'n tman tjawlenx ch'iy, ex b'ajxtoq txa' qani'n jumaj te titi'chaq ntb'incha'n. Tb'aniltoq ka'yin Adoniy, titz'inxi'tl Ab'salon.#1.6 Nota: Atoq Ab'salon tnejel tk'wal Dab'i ex ojetoq kyim, qu'mtzun a Adoniy titz'in Ab'salon kub' t-xima'n qa atoq ati toklen tu'n tok te nimaqkawil te t-xelju' tman. 7Ojetoq b'entti'j jun tyol tuk'i'l Joab', tal Seruya, ex tuk'i'lu' pale Ab'yatar, aye'ju' nche onin ti'j. 8Aye'tzu'n pale Sadok, ex B'enayiy tk'wal Joyada, ex t-sanjelal Dyos Natan, ex Simey ju' q'uqlitk'u'j nimaqkawil ti'j, exqe' t-xjal Dab'i kuwqe' te q'oj, mixti'x kymujb'a kyyol tuk'i'l Adoniy.
9Kub'tzu'n tq'o'n Adoniy jun nimaqwan toju' tq'ijlalil lu tk'etzju' pik Soelet, ati nqayin tk'etzju' t-xiklil a' Rowel. E'kub' tb'yo'n rit, tman wakx ex qpoj tman wakx qu'sqexi'x, ex eb'aj ttxko'n kykyaqilju' ttzik ex titz'in, tk'walju' nimaqkawil, ex kykyaqilju' ichan aj Juda nche ajb'en teju' nimaqkawil. 10Aye'tzu'n Natan t-sanjelal Dyos, ex B'enayiy, exqe' t-xjal Dab'i te q'oj, ex Salomon ju' ttzik, mixti' e'ttxok. 11Yolintzun Natantz tuk'i'l B'et-sab'e, ttxu Salomon, xitma'n te:
—¿Ma na'mx tb'inteya qa matxi' tz'oktq'o'ntib' Adoniy tal Awit te nimaqkawil, extzun min b'i'n tu'n taye Dab'i? 12B'intzpe'ya, kxe'l nma'n jun tnab'la tu'ntzun miche kub'a' b'yo'ne' tuk'i'lju' tala Salomon. 13Kutxi'ya twitzju' nimaqkawil Dab'i ex q'manxa te: Qman nimaqkawil, ojena' ttziyaya weye' qa aju' wale' Salomon kyjel t-xela te nimaqkawil, ex kjapumel toju' tq'uqb'ila. ¿Tiqu'ntzun a Adoniy nkawin ja'lo? chiku'ya te. 14Akxtzun nyolina tuk'i'lju' nimaqkawil ajwokpune' ex kxel nma'nxi'tlju'ye' ntma'na, chi Natan.
15Xi'tzun B'et-sab'e tk'etzju' nimaqkawil toju' tja. Matxi'toq tijinxi'xju' nimaqkawil, toktoqju' Ab'isaj aj Sunem ka'yilte. 16Majx kub'joqe B'et-sab'e twitzju' nimaqkawil, xitzun tqani'n nimaqkawil te:
—¿Ti'tzu'n niq'ina? chij.
17Xitzun ttzaq'we'n B'et-sab'e:
—Tzajna' ttziya'na weye' nimaqkawil twitz Qman Dyos, qa aju' wale' Salomon oktoq kawil te t-xela, ex kjapumeltoq toju' tq'uqb'ila. 18Atzu'n ja'lo matxi' tz'oktq'o'ntib' Adoniy te nimaqkawil, ex min b'i'n tu'na nimaqkawil. 19Mache kub' tb'yo'n tman wakx, e'qpoj tman wakx ex txqan rit, mache'x ttxko'nju' tk'wala nimaqkawil; ex matxi ttxko'nju' pale Ab'yatar ex Joab' nejenel kye xjal te q'oj, atzu'n Salomon ju' ajb'el teya nimaqkawil mixti' xttxok. 20Atzu'n ja'lo nimaqkawil, tkyaqilju' tnam Israel nnayon teya tu'n tmanteya alkyeju' kkawil te t-xela.
21Qatzun min, ajtkyima nimaqkawil, kqo kb'el b'yo'ne' tuk'i'lju' wale' Salomon, chij.
22Akxtoqtzun nyolin B'et-sab'e tuk'i'l nimaqkawil tej tokpun Natan t-sanjelal Dyos, 23xiq'ma'ntzun tpakb'altz te nimaqkawil. Tetzunj tokpunju' t-sanjelal Dyos twitzju' Nimaqkawil, majx kub'joqe twitz, 24xitqani'ntzuntz te:
—Nimaqkawil, ¿Ma oje txitma'na te Adoniy qa a kkawil te t-xela? 25Qu'n lu matxi' ku'x, matxi' che Kub' tb'yo'n tman wakx e'qpoj tman wakx, ex txqan rit, ex macheb'aj ttxko'nju' tk'wala, kyuk'i'lju' nejenel kye xjal te q'oj, ex ikxju' pale Ab'yatar, luqe' nche wan ex nche k'wan tuk'i'l, ex njaw kyma'n kuw: ¡Nimanjtzxwita Adoniy nimaqkawil! chechij. 26Atzunwe' min ẍin ttxoke' ex min xttxokju' pale Sadok, ex B'enayiy, tk'wal Joyada, ex Salomon ju' tk'wala nimaqkawil. 27¿Ma xi'tzun tma'na tu'n tok te t-xela nimaqkawil, extzun min tmaya weye' ayine' ajb'el teya alkyeju' kjelten toju' tq'uqb'ila tik'lenxi'ya? chi Natan.
Tma Dab'i tu'n tok Salomon te t-xel
28Tchaq'tzun nimaqkawil Dab'i tu'n ttxketu' B'et-sab'e, qu'n matxitoq tz'etz. Tetzunj tpon B'et-sab'e, kyej we' twitzju' nimaqkawil. 29Xi'tzun ttziya'n nimaqkawil twitz Qman Dyos te kjalu:
—Kxel ntziya'ne' twitz Qman Dyos, ju' matxi' chin tkole' te tkyaqil yajb'ilweye', 30kjapumelju' xintziya'ne' teya twitz Qman Dyos ja'loxi'x: kjapumelju' tala Salomon toju' q'uqb'il te kawb'il te nxele' ex kkawil wik'lenxi'ye', chij te.
31Majxtzun kub'joqe B'et-sab'e twitz tx'otx' twitzju' nimaqkawil, tmatzuntz:
—¡Nimanjtzxwita kukxju' nimaqkawil Dab'i! chij.
32Tchaq'tzun nimaqkawil Dab'i tu'n ttzaj txko'nju' pale Sadok, ex Natan t-sanjelal Dyos (ju' matxitoq tz'etz), ex B'enayiy tk'wal Joyada. Tetzunj kyb'ajpon twitzju' nimaqkawil, 33xitzun tma'n kye:
Kukyxi'ye' kyuk'i'lju' nche aq'unan wuk'i'le' toju' kawb'il, kyq'onkxju'ye' nk'wale' Salomon tib'aju' ncheje' ex kyiq'inxe' ttzi a' Kyiyon; 34ajtzun tokq'o'n kyu'n pale Sadok ex Natan t-sanjelal Dyos te nimaqkawil toj Israel, kxe'l kyxuxi'ne' tuk'a rit ex che jawil ẍch'ine': ¡Nimanjtzxwita nimaqkawil Salomon! chechiku'ye'. 35Che okye' te xq'uqilte, tu'n ttzajtzuntz ex tu'n tkub' qe toju' nq'uqb'ile' tu'n tkawin te nxele', qu'n matxi' kub' nxima'ne' qa a k'okyel te nejenel toj Israel ex Juda, chi Dab'i. 36Xi'tzun ttzaq'we'n B'enayiy tk'wal Joyada teju' nimaqkawil:
—¡Ikxwitju', ikxwit japuna'ju' tu'n Qman Dyos,! 37Ikxwittzu'n xten Qman Dyos tuk'i'la qman nimaqkawil Dab'i, tenxwit tuk'i'l Salomon, ch'iyxi'xwitju' tkawb'il twitzju' tkawb'ila tu'n Qman Dyos, chij.
38Exi'tzu'n pale Sadoktz, ex Natan t-sanjelal Dyos, ex B'enayiy tk'wal Joyada, exqe'tzu'n seretey ex peletey, ex jaxkyq'o'n Salomon tib'aju' kuwtchej nimaqkawil Dab'i, xikyiqi'ntzuntz ttzi a' Wiyon. 39Atzuntzu' jawa' tiq'i'n pale Sadok aseyt tku'x toj tuk'a rit tzaj tiq'i'n toju' ja xjan, ex jax tqo'n toj twi' Salomon tu'n tok te nimaqkawil. Xi'tzun kyq'ajtza'n tuk'a rittz, ex kykyaqilju' ate'toq e'jaw ẍch'in: ¡Nimanjtzxwitju' nimaqkawil Salomon! chechij. 40Exi' lpetzuntz kykyaqil ti'j, nche xuxin. Nxi'xtoq che tzalaj b'a'nxi'x naku'j oktoq kxel aq'puju' tx'otx' tu'n tq'ojq'ojel kywi'.
41Akxtoq kyb'aj wan Adoniy kyuk'i'l kykyaqilju' ttxokin tej txi' kyb'i'nju' tq'ojq'ojel. Tetzunj t-xitb'i'n Joab' tq'ojq'ojel tuk'a rit, tma:
—¿Tiqu'ntzulo nxi'x che b'aj ẍch'in txqan xjal toju' nintnam? chij.
42Akxtoqtzun tb'aj yolin, o'kx tpon Jonatan tk'walju' pale Ab'yatar. Xi'tzun tma'n Adoniy te:
—Kutoka, qu'n nimta toklen, atilo jun tqanil b'a'n saj tiq'i'na, chij. 43Xittzaq'we'n Jonatan te Adoniy:
—A pena'te' ja'lo. Luju' qman Dab'i nimaqkawil, matxi' tz'oktq'o'n Salomon te nimaqkawil, 44Ex matchaq' kyeju' pale Sadok ex Natan t-sanjelal Dyos, ex te B'enayiy tk'wal Joyada, ex kye' xjal te q'oj kyeretey ex peletey tu'n kyxi' tuk'i'l Salomon; aye'tzunkye majaxkyq'o'n Salomon tib'aju' kuwtchej nimaqkawil. 45Expe' matxi' xjansanjtz te nimaqkawil kyu'n pale Sadok ex Natan t-sanjelal Dyos ttzi a' Wiyon, ex matxi' tz'anjtz kyi'j atzu' nxi'x che tzalaj. Qu'mtzun nxi'x che tilj xjal toju' nintnam, atzun tq'ojq'ojelju' xxikyb'i'ne'. 46Matxi' pena' tz'okx Salomon toju' q'uqb'il te kawb'il, 47exqe'tzu'n nche kawin tuk'i'l nimaqkawil Dab'i matxi' che pon q'olb'elte ex matxikyma'n te qa ch'iyxwit ex chmet-xwitu' tkawb'il Salomon kyetwitzu' te Dab'i tu'n Qman Dyos. Expena' aku' nimaqkawil Dab'i makub' tzipe k'ulul te Dyos toj tkuẍb'il, 48ex matma: Nimanxwit tb'i Qman Dyos, tu'nju' mataq' anb'il tu'n tok jun nyajajile' toju' q'uqb'il te kawb'il ex matz'ok nka'yi'ne', chij, chi Jonatan.
49Aye'tzu'n ttxokyen Adoniy eb'jaw lu'lun; eb'jawe'tzuntz kykyaqil ex teyile junjun tiq'tb'e. 50Atzunte Adoniy, jawe' ex xi' toju' ja xjan tu'n t-xob'el te Salomon, atzuntzu' tkola'tib', ok ye' kyi'ju' tuk'a q'olb'eb'l. 51Pon jun xjal q'malte te Salomon:
—Nxob' Adoniy teya nimaqkawil, ex matxi' tz'okx kloltib' ti'ju' q'olb'eb'l. Ntqani'n tu'n ttziyanteya nimaqkawil qa lay kub' tb'yo'na, chij.
52Atzunte Salomon xittzaq'we'n:
—Qama tz'ok b'a'n xjal, mixti' jun t-xya'mal twi' kb'eltz'aq twitz tx'otx'; qatzun mab'injtz jun taq'wixil ti'j, kkyimel, chij.
53Tchaq'tzun Salomontz tu'n telq'in ti'j q'olb'eb'l. Pontzun Adoniytz twitz nimaqkawil Salomon ex kub' tzipe, xitzun tma'n nimaqkawil te tu'n tanj tja.
Currently Selected:
1 R 1: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999