YouVersion Logo
Search Icon

Jon 8

8
Dako ma gimako ka timo abor
1Ento Yecu ocito wa i wi got Jeituni. 2Odiko con en dok odwogo i ot pa Lubaŋa; jo ducu gucokke bote, en obedo piny, opwonyogi. 3Lupwonycik ki Luparicayo gukelo dako mo ma gimako ka timo abor. Gukete i dyere, 4guwacce ni, “Lapwony, dako man gimako ka timo abor, ginoŋe iye kikome. 5#Levi 20.10; Nwo 22.22-24 I cik Moses ocikowa ni, dano macalo man myero gicel woko ki got. I kono iŋolo niŋniŋ?” 6Guwaco lok man pi teme, wek ginoŋ lok ma gibidote kwede. Ento Yecu okulle piny, ocoyo ŋom ki lwete. 7Ka gumedde ka penye, en oille malo, owaccigi ni, “Ŋat ma i kinwu ma pe ki bal okwoŋ cele ki got.” 8En dok okulle piny, ocoyo ŋom ki lwete. 9Ka guwinyo lok man, ci guket ki acel acel, kun ocakke ki i kom jo madito; ci Yecu odoŋ kene kun dako-nu pud ocuŋ i dyere. 10Yecu oille, openyo dako ni, “Dako, gin kono gitye kwene? Pe tye ŋat mo ma oŋolo kop loyi?” 11En ogamo ni, “Pe tye ŋat mo, ladit.” Yecu owaco ni, “An bene pe abiŋolo kop loyi. Cit giri; cakke tin pe dok ibal.”]
Yecu en ceŋ me lobo
12 # Mat 5.14; Jon 9.5 Yecu dok oloko ki gin kun waco ni, “An a ceŋ me lobo; ŋat ma luba pe biwoto i piny macol, ento bibedo ki ceŋ me kwo.” 13#Jon 5.31 Luparicayo guwacce ni, “In giri ibolo lok me caden i komi keni, lok ma ibolo pe me ada.” 14Yecu odok iye ni, “Kadi bed abolo lok i koma kena, lok ma abolo me ada, pien aŋeyo ka ma aa iye, ki ka ma acito iye, ento wun pe wuŋeyo ka ma aa iye, ki ka ma acito iye. 15Wun wuŋolo kop i kit pa dano, ento an pe aŋolo kop i kom ŋat mo. 16Kadi bed aŋol kop, ŋolo koppa tye atir, pien pe atye kena, ento wan ki ŋat ma oora. 17I cikwu gicoyo ni, lok pa caden aryo bedo ada; 18an abolo lok me caden i koma kena, dok Wora ma oora bene cadenna.” 19Gipenye ni, “Woru tye kwene?” Yecu odok iye ni, “Wun pe wuŋeyo an, kadi Wora. Kono wuŋeya, kono wuŋeyo Wora bene.” 20En oloko lok man i kare ma pwonyo dano i ot pa Lubaŋa, i ot lim, ento pe tye ŋat mo ma omake, pien karene peya oromo.
Ka ma acito iye wun pe wutwero bino iye
21En dok owaco ki gin ni, “An abicito woko. Wun wubiyenya, wubito i balwu; ka ma acito iye, wun pe wutwero bino iye.” 22Lujudaya guwaco ni, “En binekke kene, pien owaco ni, ‘Ka ma acito iye wun pe wutwero bino iye’?” 23En owaccigi ni, “Wun wua ki piny, an aa ki malo; wun jo me lobo, an pe a dano me lobo. 24Atyeko wacciwu ni, wubito i balwu; pien wubito i balwu ka pe wuye ni an a en.” 25Gupenye ni, “In aŋa?” Yecu odok ki gin iye ni, “An a ŋat ma yam atittiwu con nia i acakki. 26Atye ki lok mapol me aloka i komwu, ki kop mapol me aŋola; ento ŋat ma oora en me ada, atito ki lobo gin ma doŋ awinyo ki bote.” 27Pe guniaŋ ni en tye ka tittigi pi Lubaŋa Won. 28Omiyo Yecu owaco ki gin ni, “Ka doŋ wutiŋo Wod pa dano malo, ci wubiniaŋ ni an a en, dok ni pe atiyo gin mo pira kena, ento aloko gin ma Wora opwonya iye. 29Ŋat ma oora tye kweda; pe oweka kena, pien nino ducu atiyo gin ma iye mito.” 30Ka oloko lok man, jo mapol guye en.
Lok me ada bigonyowu
31Yecu owaco bot Lujudaya ma guye en ni, “Ka wumoko i lokka, ci wun lupwonnyena adada; 32miyo wubiŋeyo lok me ada, lok me ada bigonyowu.” 33#Mat 3.9; Luka 3.8 Gudokke iye ni, “Wan likwayo pa Abraim; ma naka yam peya wabedo opii pa ŋatti mo. Man doŋ in iwaco niŋniŋ ni, ‘Gibigonyowu’?”
34Yecu odokkigi iye ni, “Adada awacciwu ni, dano ducu ma timo bal, en opii me bal. 35Opii pe bedo i ot nakanaka, ento latin anywalli bedo gire nakanaka. 36Pi meno, ka Wod ogonyowu gibigonyowu atika. 37Aŋeyo ni wun likwayo pa Abraim; ento wumito neka, pien lokka pe noŋo kabedo i iwu. 38An aloko gin ma aneno ki bot Wora, wun wutiyo gin ma wuwinyo ki bot wonwu.”
Wonwu Catan
39Gudok iye ni, “Abraim en wonwa.” Yecu owaccigi ni, “Kono wun litino pa Abraim, kono wutiyo macalo Abraim. 40Ento koni wumito neka, an dano ma atittiwu lok me ada ma awinyo ki bot Lubaŋa; Abraim yam pe otiyo kit meno. 41Wun wutiyo gin ma wonwu otimo.” Gidok iye bote ni, “Wan pe ginywalowa i abor; watye ki wonwa acel, en aye Lubaŋa.” 42Yecu ogamo doggi ni, “Kono Lubaŋa wonwu, kono wumara, pien an aa ki bot Lubaŋa, koni doŋ atye kany; pe abino pira kena, en aye oora. 43Piŋo pe wuniaŋ lok ma awaco? Pien pe wutwero winyo lokka. 44Wun wua ki bot wonwu, Catan, wumito cobo gin ma wonwu mito. Nia i acakki piny en con lanek, pe cuŋ i ada, pien lok me ada pe i iye. Ka en loko lok goba, en lok macalo kite tye, pien en lagoba, doki won goba. 45Ento pe wuye an, pien an aloko lok me ada. 46Aŋa i kinwu ma nyuto lok me bal i koma ma loya? Ka atito lok me ada, piŋo pe wuye an? 47Ŋat ma oa bot Lubaŋa winyo lok pa Lubaŋa; gin ma omiyo wun pe wuwinyo, pien pe wua bot Lubaŋa.”
Ma Abraim pud pe onoŋo doŋ an atye
48Lujudaya gudokke iye ni, “Wan pe wawaco kakare ni, in Lacamaria, itye ki cen?” 49Yecu odok iye ni, “An pe atye ki cen; ento aworo Abana, wun pe wuwora. 50An pe ayenyo deyona pira kena; tye Ŋat ma yenyo ma kakara, en aye biŋolo kop. 51Adada awacciwu ni, ka ŋat mo mako lokka, pe bito matwal.” 52Lujudaya gudokke iye ni, “Koni doŋ waniaŋ ni itye ki cen. Abraim yam oto, ki lunebi bene guto, ento in iwaco ni, ‘Ka ŋat mo mako lokka, ci pe bibilo to matwal’. 53In i dit ikato kwarowa Abraim, ma ceŋ oto-ni? Lunebi bene guto, do! In ikette ni in aŋa?” 54Yecu ogamo ni, “Ka aketo deyo i koma kena, deyona mwa; Wora aye keto deyo i koma, en ma wun wuwaco ni Lubaŋawu-ni. 55Wun pe wuŋeye; ento an aŋeye. Ka kono awaco ni pe aŋeye, kono adoko lagoba macalo wun; ento an aŋeye, amako lokke. 56Kwarowu Abraim yam obedo ki yomcwiny ni ebineno ninona; ci oneno, cwinye obedo yom matek.” 57Lujudaya guwacce ni, “In ma mwakani bene peya oromo pyerabic-ci, ineno Abraim?” 58Yecu ogamo doggi ni, “Adada awacciwu ni, ma Abraim pud pe, onoŋo doŋ an atye.” 59Omiyo gukwanyo got me cele; ento Yecu okanne, ci okato woko ki i ot pa Lubaŋa.

Currently Selected:

Jon 8: Aco85

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy