SOFONIYA 1
1
Law kat Yuda hiɗi Yerusalem
1Ma-Vatɗina di yoboyn tam Sofoniya goora vi Kusi, goora vi Gedaliya, goora vi Amarya, goora vi Ezekiyas, kayni hay buura vi Yosiyas, goora vi Amon, mulla vi Yuda.
2Ma-Vatɗina di'e:
Slen ma kay nagat kafna nan min ɓulakam goyo.
3Sumuna hiɗi farayna nan min ɓulaksi goyo,
layayn ma dukalawna hiɗi kuluf ma goloŋŋa kaw,
nan min ɓulakam goyo,
slen ma dab sem sana hiɗi sum sa joona;
sum sa kay nagatna nan min vatsi goyo,
Din mi Ma-Vatɗina.
4Sum sa hay Yudana nan min meɗ ɓan goy kisiya,
sum sa hay Yerusalem kaf kaw.
Caw slen ma hin hay liy namna,
ma ir vi Baal kaf nan min vatam goyo.
Sum sa li ɗifin mi Baal hay liy namna kaf,
nan min vatsi goyo,
5sum sa dab voksi gaa hiɗi sem Lawna,
may yum vunsi mi sem mulla visiyana,
nan min vatsi goy lay.
6Nisi sa muɗ ŋorsi tam Ma-Vatɗina,
nisi sa may gar Ma-Vatɗinɗina,
sa min jobomɗina nan ma vatsiya.
Buura vi Ma-Vatɗina
7Lakgi ŋal kiliŋ vok Bum-Sumuna,
Ma-Vatɗina, kay buura valam ka goboyo,
kay Ma-Vatɗina kot ɗifinna valamawa,
sa yiyna valamu nam porsiyawa.
8May hay buur ma li ɗifinna van ɗawni,
nan ma ka kitat kay muliyana hiɗi gurona visiya,
hiɗi nisi kaf sa cuk sligar ma pulla.
9Hay buur namna ɗawni,
nan ma ka kitat kay nisi sa pir goy kay vun-ziyna,
nisi sa hob ziyna vi mulaysina hiɗi ɦawlata,
hiɗi sle ma ɗutna.
10Ma-Vatɗina di'e:
Hay buur namna ɗawni,
ciriyn ma li ŋolo,
ma tun caway hay vun-galana vi kulufna pa,
tiyn ma li ŋolo goy hay gal ma hena vi hoyok-ziyna.
Boŋoloŋŋa ma ɦo gaa ŋolo.
11Tiygiya, nigi sa ziyna vigi hay Maksesna,
kay nisi kaf sa li filiwna vatawa goyo,#1:11 Sa li filiwna muɗi hay liy hena ala «Kanaan».
sum sa li lop hiɗi gurjuta kaf vatawa goyo.
12Hay li namna ɗawni,
sum sa hay Yerusalem nan ma bilersi hiɗi kuta,
nan ma ka kitat kay sum sa siri gaa jislik' lakŋa,
nisi sa ka di ala Ma-Vatɗina may li va ma ŋaaɗi,
may li va ma jooɗi kawna.
13Farayna visiya sumun ma vurumumu,
ziyna visi ma ɦo gaa'a,
ziyn ma nisi inimna nisi ma bur hayam loɗi,
gulda-gulda ma nisi pumna,
nisi ma ci vinna valam loɗi.
14Buur ma ŋolla vi Ma-Vatɗina ka goboyo,
nam ka goboyo,
nam hebawa,
buura vi Ma-Vatɗina ka di delemu,
sum sa donon ka tiy ir haw ŋolo.
15Buura namna mi buura vi ɦiyda ŋolda,
buur ma sum-zlata hiɗi lasta ŋolda,
buur ma ɓulakka hiɗi ɦo-gaata vi slena,
buur ma jufunda ŋolda,
buur ma ɗugulla hiɗi tukŋa.
16Buur ma togolomna vi duura ma buwa,
ɗuwulta vi duura ma ci'e kaw,
kat hoyok-ziy ŋulo ma gulmun ŋuyi talamna.
17Nan ma kal sumun vun zlata,
nisi ma muɗ poy ki sum sa dukin nala,
kay nisi li sulukawa kat Ma-Vatɗina;
nan ma ɦoksi busuwsi goyo,
ki san ko butuwn goy nala,
sliwsi ma koys goyo ki tugosna nala.
18Hay buur ŋol ma ɦiyda van ɗawni,
gurjuta visiya hiɗi or fi butsi goy hay ɓan loɗi;
nagat kaf ma vat goyo,
hiɗi kuta ta ɗek hunayta valamu,
kay sum sa hay nagat kaf nam ma co kisi wilik',
kay ŋalsi goyo.
Currently Selected:
SOFONIYA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001